དྲིན་ཅན་ཨ་ཕའི་རྗེས་དྲན་རིང་མོ།
ཡིད་འོངས་འདབ་རྒྱ་སྟོང་དུ་གྲོལ་བའི་ཆུ་སྐྱེས་དཀར་པོའི་གདན་སྟེང་ན། །
སྙན་འགྱུར་འབུམ་གྱི་འགྱུར་ཁུག་རྫོགས་པའི་བཻཌཱུརྱའི་པི་ཝང་གིས། །
བླང་དོར་གནས་རྣམས་ཇི་བཞིན་སྟོན་མཛད་ངག་དབང་ལྷ་མོ་དབྱངས་ཅན་མ། །
སྨྱུག་རྩལ་སྒེག་མོའི་ཟློས་གར་འདི་ལ་སྙན་འགྱུར་འབུམ་གྱིས་རམ་འདེགས་མཛོད། །
དཔལ་དང་སྟོབས་ཀྱི་ནུས་ཤུགས་རྫོགས་པའི་མཚུངས་མེད་ཆོས་ཀྱི་རྒྱལ་པོ་དང༌། །
སྐད་རིགས་ཀུན་ལ་ཆགས་ཐོགས་མེད་པའི་འགྲན་ཟླ་བྲལ་བའི་འཇིག་རྟེན་མིག །
བཅུ་ཕྲག་རིག་པའི་ནོར་གྱི་མཛོད་ལ་དབང་བསྒྱུར་པན་ཊི་ཏ་ཡི་ཚོགས། །
ཞབས་ཟུང་གསེར་གྱི་འཁོར་ལོའི་རི་མོས་ཤིས་པར་གང་དུ་སྒྲུབ་པའི་གཞི། །
སངས་རྒྱས་བསྟན་པའི་ཞིང་ས་དང་ནི་འཚེ་མེད་ཞི་བའི་བསྟེ་གནས་ཏེ། །
འཛམ་གླིང་ཟླུམ་པོའི་མཐོ་སྒང་ཞེས་ཏེ་སྙན་གྲགས་ཀུན་ཏུ་འབར་ན་ཡང༌། །
ད་ལྟ་རྒྱ་དམར་ཀླ་ཀློའི་དཔུང་གིས་དམྱལ་བའི་ཁམས་སུ་སྒྱུར་བཞིན་པའི། །
རྩམ་གཟན་ས་ཡ་དྲུག་གི་ཕ་ཡུལ་བསིལ་ལྡན་ཁ་བའི་གངས་ལྗོངས་ཀྱི། །
ཆོས་ཁ་གསུམ་ཞེས་གྲགས་པའི་ནང་ནས་མདོ་ཁམས་སྨད་ཀྱི་ཞིང་ཁམས་ཏེ། །
དཔའ་བོ་སྟོང་གི་འཚང་ཁ་རྒོད་པའི་ཨ་རོགས་ཁམས་པའི་ཕ་ས་ཡི། །
ཤར་མཐའི་མཚམས་སུ་མན་ཌལ་ལྟར་ཆགས་ཏྲེ་བོ་ཧོར་གྱི་ལུང་བ་དེར། །
དབུལ་དང་ཕྱུག་གི་ཧེ་བག་ཆེ་བའི་ཁྱིམ་ཚང་སྟོང་དུ་ཆགས་པའི་ནང༌། །
སྟོབས་དང་འབྱོར་བས་གནས་ས་བསྒུལ་བའི་རྫ་རྒྱ་གཉིས་ཞེས་གྲགས་པ་ལས། །
ཉམ་ཆུང་ཞི་བའི་བྱམས་ཀྱིས་སྐྱོང་ཞིང་རྒོད་པོ་དཔའ་ཡིས་གཉའ་བཅོམ་པའི། །
རྫ་བ་ཚང་ཞེས་མཚན་གྱི་སྙན་པ་རྣ་བའི་བུ་གར་ལྷང་ཙམ་གྱིས། །
མཐོ་དམན་ཀུན་གྱི་འགྲམ་ཆུའི་ཐིགས་པ་དབང་མེད་ས་ལ་འཐོར་བ་དེར། །
གང་ཁྱེད་སྐུ་ཡི་པད་དཀར་ལྗོན་པ་རིན་ཆེན་སྒྲོལ་མའི་སྲས་སུ་བཞད། །
སྣབས་དང་ངུ་སྐད་མཉམ་དུ་ལུད་པའི་བྱིས་པའི་སྙུག་སྣོད་དྲོ་བོའི་ནང༌། །
དྲིན་ཆེན་ཨ་མའི་མྱོས་བུམ་ས་ནས་འོ་མའི་ནུ་ཐག་མ་ཆོད་གོང༌། །
རྒྱ་དམར་ཀླ་ཀློའི་དམག་དཔུང་ཚོགས་ཀྱིས་དཀར་མཛེས་གྲོང་ཁྱེར་དབང་དུ་བསྒྱུར། །
མདའ་དང་མདེ་འུའི་སྐད་སྒྲ་ལྷན་དུ་རང་རིགས་འབུམ་ཕྲག་ས་ལ་བསྒྱེལ། །
མེ་སྒྱོགས་དྲག་པོའི་ཤུགས་ལ་བརྟེན་ནས་དགོན་དང་མཆོད་རྟེན་རྡུལ་དུ་བསྒྱུར། །
རྩ་ཆེའི་ནོར་དང་འབྱོར་བ་ཡོངས་རྫོགས་བཙན་པོ་དབང་གིས་འཕྲོག་པ་སོགས། །
གཉའ་གནོན་འདི་ཀོ་དྲན་པ་ཙམ་གྱིས་སྙིང་གི་བུ་ཆུང་འགད་ལ་ཁད། །
དེ་སྐབས་རྒྱ་དམར་ཀླ་ཀློའི་དམག་གིས་རྫ་བ་ཚང་གི་ཁྱིམ་ཚང་ཡང༌། །
བསད་འཕྲོག་བཅོམ་གྱིས་བཙན་འཛུལ་བྱས་ཏེ་ནང་མི་ཡོངས་རྫོགས་ཕྱི་རུ་ཕུད། །
གང་ཁྱེད་གོམ་པའི་ཁོ་ལག་མ་རྫོགས་གོག་གིན་གོག་གིན་ཕྱི་ལ་བུད། །
ཆོ་ངེ་དྲག་པོས་གྲོང་ཚོ་དཀྲོགས་ཀྱང་སྙིང་རྗེས་གཟིགས་མཁན་སུ་ཡང་མེད། །
ཤོག་བུའི་ཞྭ་མོ་མགོ་ལ་གཡོགས་ཏེ་མི་ཚོགས་གསེབ་ཏུ་ཕར་ཚུར་དྲུད། །
བཙོན་ཁང་ནང་དུ་ཚར་འདྲི་བཏང་ཞིང་གློག་དང་རྒྱུགས་པས་རྡུང་ཞིང་རྡེག །
ས་བདག་གྲལ་རིགས་ཉེས་མིང་འོག་ནས་གཉའ་གནོན་ཚད་མེད་བྱས་པའི་རྐྱེན། །
ཨ་ཡུམ་ཨ་ནེ་དྲིན་ཆེན་གཉིས་ཀྱི་ལང་འཚོའི་འདབ་མ་ས་ལ་ལྷུང༌། །
རྒྱབ་ཏུ་གྱོན་པའི་གོས་སློག་མེད་པས་གྲང་ངར་སྟོང་གིས་ཀུན་ནས་གཙེས། །
ཁ་ལ་ཟ་རྒྱུའི་བཟའ་བཅའ་མེད་པས་དཀྲིས་སྐོམ་བརྒྱ་ཡིས་ཀུན་ནས་མནར། །
ཟོག་དང་ལྷན་དུ་ཟོག་རའི་ནང་དུ་བྱིས་པའི་དུས་སྐབས་སྡུག་གིས་རྫོགས། །
བྱིས་པའི་དུས་ནས་དཀའ་སྡུག་མང་བའི་ཨ་ཕ་ཁྱོད་ལ་ཤ་རེ་ཚ། །
སློབ་གྲྭར་འགྲོ་ན་གྲལ་རིགས་བུ་ཞེས་སྒོ་ཡི་ཁ་ནས་ཕྱི་རུ་ཕུད། །
ཆོས་སྒོར་ཞུགས་ན་རྨོངས་དད་ཅན་ཞེས་ཆོས་བྱེད་སྐལ་བ་ཁྱོད་ལ་མེད། །
ཤེས་བྱ་རིག་པའི་ཞིང་ཁམས་འགྲིམས་པའི་སྐལ་བ་ཡེ་ནས་མ་རྙེད་པར། །
གཞོན་ནུའི་དུས་བཟང་རིམ་གྱིས་རྫོགས་ནས་ཕ་རྒོད་དར་མའི་ལང་འཚོ་མངོན། །
མཱ་འོ་འདྲེ་ཡི་ངན་བྱུས་འོག་ནས་མཉམ་ལས་བྱེད་མགོ་བཙུགས་པ་འི་སྐབས། །
ཆུ་དང་ཆར་པའི་དཀའ་སྡུག་གསེང་ནས་ཉིན་མཚན་ཞིང་ལས་གཉེར་བ་དང༌། །
ཉི་མའི་འོད་རླབས་འབར་བའི་འོག་ཏུ་ས་རྐོ་རྡོ་ལས་བྱེད་ན་ཡང༌། །
ཟས་གོས་ལྟོ་ཡི་དཀའ་སྡུག་འབུམ་གྱིས་གང་ཁྱེད་ལུས་སེམས་ལྟོང་དུ་འབིགས། །
ནང་དུ་འཛུལ་སའི་ཁང་བ་མེད་པར་སྲང་ལམ་ཁྲོད་དུ་འཁྱམས་ཤིང་ཉུལ། །
ཡོན་ཏན་སློབ་པའི་སྐལ་བ་མེད་པར་སྨོངས་པའི་བརྟུལ་ཞུགས་དང་དུ་བླངས། །
བློ་སེམས་མཐུན་པའི་གྲོགས་པོ་མེད་པར་ཁེར་རྐྱང་འཕྲང་ལམ་དལ་གྱིས་བསྐྱོད། །
དབང་ཤེད་རྒྱུ་གསུམ་གང་ལ་མེད་ན་གྲོགས་དང་གཉེན་སྤུན་མེད་འདི་སྐྱོ། །
ཚེ་རབས་སྔོན་མའི་ལས་འཕྲོ་ཞིག་གིས་སྤྲང་པའི་སྲང་ལམ་ཟུར་ཁ་ནས། །
བརྩེ་དུང་འོད་ཀྱི་ཞགས་པ་དཀར་པོས་ཡེ་ཤེས་བཟང་མོར་དམ་དུ་འཁྱུད། །
བརྩེ་དུང་མདུད་པ་གྲོལ་ཐབས་མེད་པས་གཉེན་སྒྲིག་ངེས་པར་བྱེད་དགོས་ཞེས། །
གཉིས་ཀས་མགྲིན་པ་གཅིག་ཏུ་སྒྲོག་པས་བརྩེ་གདུང་རིན་ཐང་དངོས་དེ་བསྟན། །
སྟོབས་དང་ནུས་པ་གཅིག་ཏུ་བསྒྲེལ་ཏེ་ཁྱིམ་གྱི་ལས་དོན་ཆེ་ཕྲ་ཀུན། །
གང་ཁྱེད་གཅིག་པའི་ཕྲག་ཏུ་བླངས་ནས་ཡུན་རིང་འབད་པས་བསྒྲུབས་པའི་རྗེས། །
ཁྱིམ་གྱི་འཚོ་བ་ཡར་རྒྱས་ཕྱིན་ཏེ་ཁྱེད་དང་གུས་པའི་ཡུམ་ཆེན་ཟུང༌། །
དགའ་སྐྱིད་འཚོ་བ་ལྷན་དུ་རོལ་ན་གཞོན་དུས་སྐབས་མཉམ་དུ་བསྐྱལ། །
ལོ་ཟླ་ཞག་གི་འཕྲེང་བའི་འཁོར་ལོ་ཡུད་ཀྱིས་ཡུད་ཀྱིས་འཁོར་མཚམས་སུ། །
གང་ཁྱེད་ཟུང་གི་རིགས་རྒྱུད་ཟོལ་དུ་གུས་པ་གང་གི་བུ་རུ་སྐྱེས། །
ས་ལ་རྡེའུ་སྟོང་དུ་བརྩིགས་ཤིང་གནས་ལ་རླུང་རྟ་གཏོར་བ་སོགས། །
གང་ཁྱེད་སེམས་ཁམས་དགའ་བས་མྱོས་ཏེ་དགའ་སྟོན་ཤུགས་ཆེར་བྱས་ཞེས་ཐོས། །
ནང་གི་རིན་ཆེན་ནོར་བུའི་ཟོལ་གྱིས་ལྷད་མེད་བྱམས་པས་ཀུན་ནས་བསྐྱངས། །
ཕུགས་བསམ་རིང་བོ་ཐུགས་སུ་བཟུང་སྟེ་རེ་བའི་འོད་ཞགས་ང་ལ་བཅིངས། །
མདོར་ན་བདག་གི་ཡབ་ཡུམ་གཉིས་ཀྱིས་བརྩེ་བས་ཀུན་ནས་བསྐྱངས་པའི་ཚུལ༌།
ཆ་ཡི་ཆ་ཤས་རེ་ཡི་དྲིན་ལན་བསྐལ་བའི་བར་དུ་མཇལ་མི་ནུས། །
འཇམ་པའི་གོན་ཆས་ང་ལ་བསྐོད་ནས་རྙིང་ཧྲུལ་སློག་པ་ཁྱེད་ཀྱིས་བསྣམས། །
ཞིམ་པའི་བཟའ་བཅའ་ང་ལ་གནངས་ནས་སྐྱ་བའི་ཆུ་པགས་ཁྱེད་ཀྱིས་བཞེས། །
ཁ་ལུད་སྣ་ལུད་ལྕེ་ཡིས་ཕྱིས་ཤིང་བྱམས་པའི་ཕྱག་གིས་བྱིལ་བྱིལ་མཛད། །
དྲིན་ཆེན་ཡབ་ཡུམ་ཟུང་གི་སྐུ་དྲིན་ང་ཡིས་ནམ་ཡང་བརྗེད་མི་ན྄ུས། །
ཚེ་སྔོན་ལས་ངན་བསགས་པའི་འབྲས་བུ་དུས་སུ་ཐོག་ཏུ་བབ་པ་བཞིན། །
ཡུམ་ཆེན་དམ་པ་ནད་ཀྱིས་གདུང་སྟེ་མལ་སར་ཡུན་རིང་ལུས་པའི་སྐབས། །
ཨ་ཕ་ཁྱེད་ཀྱང་སྐྱོ་བས་མནར་ཏེ་ང་ལ་ཡང་ཡང་འཐམ་བཞིན་དུ། །
འོ་འདོད་ཆོ་ངེ་ཀུན་ཏུ་སྒྲོག་ཀྱང་སེམས་གསོ་བྱེད་མཁན་མེད་འདི་སྐྱོ། །
གང་ལ་སྟོབས་འབྱོར་དབང་ཐང་ཡོད་ན་ཀུན་གྱིས་སྤེལ་ལད་འཁྲབ་པ་དང༌། །
གང་ལ་སྟོབས་འབྱོར་རྒུད་པར་གྱུར་ན་ཁྱི་ཡིས་ཀྱང་ནི་བརྙས་པ་འདི། །
འཇིག་རྟེན་འཁོར་བའི་ཆོས་ཉིད་ལགས་ན་ཡ་མཚན་ཆེ་དོན་མི་འདུག་པས། །
རང་གི་གནས་བབ་རང་གིས་ཤེས་ནས་མིག་ཆུ་ཁོག་བར་མིད་ནས་བསྡད། །
ཡུམ་ཆེན་དམ་པ་མལ་སར་ལུས་ནས་ཕྱག་ལས་གནང་བར་མི་ཐུབ་པས། །
ཁྱིམ་ཚང་དེ་ལ་མི་མཁོ་ཟེར་ཏེ་ཁྱིམ་ནས་བཙན་གྱིས་ཕྱི་རུ་ཕུད། །
ངེད་ཅག་ཕ་མ་མཉམ་ཆུང་གསུམ་པོ་མཚན་ཕྱེད་ཙམ་ལ་སྤུད་པ་འདི། །
ད་ལྟ་ལ་ཡང་གསལ་བོར་དྲན་ཞིང་ང་ཡིས་ནམ་ཡང་བརྗེད་མི་སྲིད། །
ཁྱིམ་མཚེས་གྲོགས་པོར་གནས་ཚང་གཡར་སྟེ་ཁྱིམ་གྱི་སྒོ་ཟོག་ལྷན་ཅིག་ཏུ། །
ངེད་ཅག་གསུམ་པོ་ཆོ་ངེ་ཤོར་བཞིན་མཚན་མོར་གཉིད་ཀྱང་མ་ཁུག་པར། །
འདས་དོན་བྱུང་བར་བསམ་གཞིགས་བྱས་ཤིང་མ་འོངས་མི་ཚེའི་མདུན་ལམ་ཆེད། །
གྲོས་བསྡུར་ཡང་ཡང་བྱེད་བཞིན་བྱེད་བཞིན་ཞོགས་པའི་སྐྱ་རེངས་མཁའ་ནས་ཤར། །
ཞོགས་ཇ་སྐོལ་སའི་མེ་ཐབ་མེད་པས་རྡོ་གསུམ་དལ་གྱིས་བརྩིགས་བྱས་ཏེ། །
ཧ་ཡང་ཆུངཆུང་་ཁ་ཆག་དེའི་ནང་བོད་ཇ་ཉུང་ཞིག་བསྐོལ་བྱས་ནས། །
ངེད་གསུམ་ཟས་ལ་རོལ་བའི་སྐབས་སུ་ཁོ་བོས་ངུ་རྒྱངས་སྒྲོགས་བྱས་ཤིང༌། །
ཁྱེད་ལ་སུན་པོ་ཚད་མེད་བཟོས་པས་ད་ལྟར་སྙིང་ནས་འགྱོད་པ་འཕྱོ། །
གྲྭ་བ་བླ་མས་ཞབས་རིམ་གནང་ཤིང་སྨན་ཁང་གང་སར་བསྟེན་ན་ཡང༌། །
ཡུམ་ཆེན་སྙུང་གཞི་ལྕི་རུ་ཕྱིན་ཏེ་མཐའ་མར་ཉེན་ཁའི་མཚམས་སུ་སླེབས། །
འགུལ་དང་སྨྲ་བརྗོད་ཅི་ཡང་མི་ནུས་ཡུམ་གྱིས་ང་ལ་ཅེར་བཞིན་དུ། །
མིག་ཆུའི་ཐིགས་ཕྲེང་སྟོང་དུ་ཉིལ་ཏེ་ཐུགས་སེམས་སྐྱོ་བའི་ཚུལ་དུ་བཞུགས། །
དེ་ལྟར་དེ་ལྟར་ཉིན་ཤས་རྗེས་ནས་ཡུམ་ཆེན་དྲག་སྐྱེད་མ་སོང་བར། །
སྙིང་རྗེ་ཤ་ཚ་ཀུན་ནས་བྲལ་བའི་འཆི་བདག་ཞགས་པས་དུམ་དུ་བཅིངས། །
ཨེ་མ་ཀྱེ་ཧུད་ཕ་བུ་ངེད་གཉིས་རྒྱུས་མེད་ཁང་སྟོང་འདི་ཡི་ནང༌། །
གཅིག་པུར་གཡུགས་ཤིང་ཁྱེད་ཉིད་འདི་ལྟར་བྲེལ་བས་ཕེབས་དོན་ཅི་ལགས་སམ། །
ཨ་ཕ་དམ་པས་ཡུམ་ཆེན་གྲོངས་ཁར་དམ་བཅའ་ཇི་ལྟར་གནངས་པ་ལྟར། །
རྒྱུ་དངོས་ཀུན་གྱིས་མཆོད་འབུལ་བྱས་ཤིང་ཆུང་མ་གསར་པ་མ་བླངས་པར། །
བུ་ང་སྒལ་པའི་ཐོག་ཏུ་ཁུར་ཏེ་བལ་བོད་འཕྲལ་ལམ་དོག་པོའི་གསེབ། །
ཚེ་སྲོག་དམར་པོ་གཏའ་མ་བཞག་སྟེ་རྒྱ་གར་ལྷོ་མཐའ་འདི་རུ་སླེབས། །
སྐྱོ་དང་སྡུག་གི་སྐྲ་ལོ་རིང་མོ་བླ་མས་གྲི་ཡིས་དུམ་བུར་བཅད། །
འཇིག་རྟེན་འཁོར་བའི་ཕུད་ཐུང་རྩབ་ཧྲལ་ངེས་འབྱུང་གྲི་ཡིས་རྩད་ནས་བཏུབ། །
འཁོར་བའི་ཕུན་ཚོགས་ཞེན་པ་ལོག་པའི་ངེས་པ་དོན་གྱི་དགེ་སྦྱོང་ཁྱེད། །
ཤེས་བྱ་ཡོན་ཏན་ཅི་ཡང་མེད་ཀྱང་ཀུན་གྱི་བསྟོད་པའི་ཡུལ་དུ་གྱུར། །
རྒྱུས་མེད་རྒྱ་གར་ལྷོ་མཐའ་འདི་ན་མགོན་དང་དཔུང་གཉེན་མ་མཆིས་ཀྱང༌། །
དཀའ་སྡུག་འཚོ་བ་དང་དུ་བླངས་ཤིང་བརྙས་བཅོས་འདྲ་མིན་མགོར་བཟེད་ནས། །
ཞུམ་མེད་སྙིང་སྟོབས་སེམས་སུ་འབར་བཞིན་བུ་ངར་བྱམས་སྐྱོང་ཚུལ་བཞིན་དུ། །
གནང་བའི་ཚུལ་དེ་དྲན་པ་ཙམ་གྱིས་བརྩེ་བའི་བ་སྤུ་ཀུན་ནས་ལྡང༌། །
ཀུ་ཤུ་ལྟ་བུ་གང་ཞིག་ཡོད་ན་ཁྱེད་ཀྱིས་བཞེས་པར་མ་ནུས་ནས། །
ང་ལ་གནང་ཞིང་ང་ཡི་ཆེད་དུ་ཁྱེད་ཀྱིས་ཡོད་ཚོད་བཏང་གནང་ཡང༌། །
ང་ཡིས་དེ་ལ་དྲིན་ཏུ་མ་ཤེས་ཁྱེད་ལ་ཁ་ལན་སློག་པ་རྣམས། །
ད་ལྟ་སེམས་སུ་ཤར་བ་ཙམ་གྱིས་འགྱོད་པའི་རྒྱ་མཚོ་ཀུན་ཏུ་འཕྱུར། །
བློ་གླིང་སློབ་གྲྭར་འགྲིམས་པའི་སྐབས་སུ་རྩེ་སོན་བྱ་དགའ་བླངས་པ་དང༌། །
གྲྭ་ཚང་ནང་དུ་ལོ་ངོ་རྟག་པར་རྩེ་ཕུད་དང་པོ་ཐོབ་པ་རྣམས། །
གང་ཁྱེད་སྙན་གྱིས་གསན་པ་ཙམ་གྱིས་ང་ཡི་དཔྲལ་བར་འོ་གནངས་ཏེ། །
ང་ལ་ཡང་ཡང་དམ་གྱིས་འཁྱུད་པ་ད་ལྟ་ལ་ཡང་གསལ་བར་དྲན། །
དེ་ལྟར་དེ་ལྟར་ལོ་ཟླའི་ཕྲེང་བ་ཡུད་ཀྱིས་ཡུད་ཀྱིས་འཁོར་མཚམས་སུ། །
ཨ་ཕ་ཁྱེད་ལ་ཕོ་སྐྲན་ནད་ཀྱིས་དབང་མེད་ཧོབ་སྟེ་གདུང་བྱས་ཏེ། །
སྨན་ཁང་གང་སར་བསྟེན་པར་བྱས་ཏེ་སྨན་རིང་ཉིས་འབུམ་ཙམ་བཏང་ཡང༌། །
དྲག་སྐྱེད་གང་ཡང་བྱུང་བ་མེད་མཐར་ཚེ་སྲོག་དབུགས་ཀྱི་རྒྱུ་བ་ཆད། །
ཀྱེ་ཧུད་ཀྱེ་ཧུད་ནམ་མཁའི་བླ་མ་ཁྱེད་ལ་སྙིང་རྗེ་མེད་ལགས་སམ། །
ཀྱེ་མ་ཀྱེ་མ་ལས་དབང་ཁྱེད་ལ་དྲང་བདེན་ཅི་ཡང་མེད་ལགས་སམ། །
ཉེས་མེད་ཉམ་ཆུང་ཕ་བུ་ཟུང་ལ་ཆད་པ་འདི་ལྟར་བཅད་དོན་ཅི། །
ཤུས་དུ་ལུས་པའི་ད་ཕྲུག་ང་ལ་སྙིང་རྗེས་མི་གཟིགས་ཅི་ལགས་སམ། །
རྒྱལ་བ་རིན་པོ་ཆེ་ཞེས་ཟེར་བཞིན་ཁྱེད་ཉིད་ང་ལ་ཁ་བྲལ་སྐབས། །
སྐྱོ་གདུང་རྒྱ་མཚོ་སེམས་སུ་འཁོལ་ཞིང་མིག་ཆུའི་རྦ་རླབས་འཕྱོ་ན་ཡང༌། །
མིག་ཆུའི་ཐིགས་པ་སེམས་སུ་མིད་དེ་མཆོག་གསུམ་རྒྱལ་བར་གསོལ་འདེབས་དང༌། །
ཁྲི་ལ་ཉེ་བའི་འདུས་ཚོགས་དབུས་སུ་བསྔོ་སྨོན་མཆོད་འབུལ་ཤུས་ཡོད་ལགས། །
འཕྲད་ནས་བྲལ་དང་སྐྱེས་ནས་ཤི་བ་དངོས་པོ་ཀུན་གྱི་ཆོས་ཉིད་ཅེས། །
མཚན་ཉིད་སྨྲ་བ་ཀུན་གྱིས་གླེང་ཞིང་ངས་ཀྱང་གསལ་བར་ཤེས་ན་ཡང༌། །
ཨ་ཕ་ཁྱེད་དང་ཁ་ཁར་བྲལ་དུས་སྡུག་གིས་སེམས་ཁམས་གས་གྱུར་ནས། །
རང་ཤག་ནང་དུ་ཁེར་རྐྱང་གནས་བཞིན་མིག་ཆུའི་ཐིགས་པས་གཟན་ཤམ་བརླན། །
སྐུ་དྲིན་མཚུངས་མེད་བཤེས་གཉེན་རྣམ་པའི་དམིགས་མེད་ཐུགས་རྗེའི་བྱིན་རླབས་དང༌། ། ཨ་ཕ་ཁྱེད་ཀྱིས་རང་གི་སྲོག་བཞིན་བྱམས་པས་བསྐྱངས་པའི་བཀའ་དྲིན་ལས། །
མཁས་པའི་གདན་ལ་མ་ཚུད་ན་ཡང་བླུན་པོའི་གྲལ་དུ་མ་ལྷུང་བར། །
ལོ་མཉམ་ཁྲོད་ན་ཞུམ་པའི་མགོ་བོ་ནམ་ཡང་སྨད་པར་མ་མྱོང་ལགས། །
གང་ཁྱེད་འདི་ནས་ཕེབས་པའི་རྗེས་སུ་བུ་ང་ཁེར་རྐྱང་ཤུལ་ལམ་དུ། །
སུ་དང་གང་གིས་མགོན་སྐྱབས་མེད་པར་གཅིག་པུར་འདི་རུ་ལུས་ན་ཡང༌། །
སྐྱོ་གདུང་མིག་ཆུ་ཁོག་ཏུ་མིད་བཞིན་རང་ཉིད་མི་ཚེའི་མདུན་ལམ་སྟེང༌། །
ཨ་ཕ་ཁྱེད་ཀྱི་ཞལ་ཆེམས་ཇི་བཞིན་བུ་ངས་དེ་ལྟར་ལོས་སྒྲུབ་ལགས། །
དཔལ་དང་འབྱོར་བས་གཞན་ཡིད་འགུགས་པའི་སྟོབས་དང་ནུས་པའི་དཔའ་རྩལ་དང༌། ། ལྡན་པ་མིན་ཡང་གནའ་དང་དེང་གི་རིག་པའི་གཞུང་ལུགས་ཡོད་དོ་ཅོག །
རྣམ་དཔྱོད་ཟབ་མོས་སོ་སོར་འབྱེད་དེ་དེ་དག་འཆད་རྩོད་རྩོམ་གསུམ་གྱི། །
རྒྱལ་མཚན་མཐོན་པོ་ནམ་མཁའི་དབྱིངས་སུ་ནམ་ཡང་མི་ནུབ་སྒྲེང་ན་འདོད། །
བྱིས་པའི་ནུ་ཐག་མ་ཆད་གོང་ནས་ཡུམ་ཆེན་འཇིག་རྟེན་ཕྱིར་མར་ཕེབས། །
གཞོན་ནུའི་ལོ་ཚད་སྨིན་ལ་ཁད་ནས་ཡབ་ཆེན་ང་དང་སོ་སོར་བྲལ། །
ཤ་ཁྲག་གཅིག་པའི་སྤུན་མཆེད་མེད་ཅིང་མགོན་སྐྱབས་གནང་བའི་ཚ་ཞང་མེད། །
བློ་སེམས་མཐུན་པའི་གྲོགས་པོ་མེད་ལ་སེམས་གསོ་གནང་བའི་ངོ་ཤེས་མེད། །
ད་ཕྲུག་ཁེར་རྐྱང་ཤུལ་ལམ་འདི་ན་སྙིང་སྟོབས་དཔལ་འབར་མ་ཉམས་པར། །
མགོན་སྐྱབས་མེད་པའི་མུག་ནག་ཁྲོད་ནས་རང་གི་མདུན་ལམ་འཚོལ་བྱས་ཏེ། །
རྒྱང་རིང་བཞུགས་པའི་དྲིན་ཆེན་ཕ་མ་ཁྱོད་ཀྱི་དྲིན་ལན་མཇལ་ངེས་ཡིན། །
ང་ལ་ཐུགས་ཁྲལ་ཅི་ཡང་མི་དགོས་ཐུགས་སེམས་བདེ་བོ་མཛོད་ཅིག་ཀྱེ། །
ཞེས་པ་འདི་བཞིན་མངོན་བརྗེད་དང་བརྡ་རྙིང་སོགས་ཀྱིས་མ་བཅིངས་ཤིང་སུས་ཀྱང་གོ་བའི་སྙན་ངག་གདུང་དབྱངས་སུ་འདྲེན་པ་འདི་ནི་རྒྱ་གར་ལྷོ་མཐའ་ན་ཁེར་རྐྱང་གིས་འཚོ་བའི་དྭ་ཕྲུག་བེ་རི་དཔལ་ལྡན་རྣམ་རྒྱལ་ལམ་མིང་གཞན་རི་བོ་གངས་ཅན་པའི་སྙན་ངག་སྨྲ་བའི་གྲལ་མཐའི་མཐའ་མ་ན་འཁོད་པའི་བེ་རི་སྨྱོན་ཕྲུག་ཅེས་བྱ་བས་ ༢༠༠༨ ༦ ༧ ཉིན་རང་ཤག་ཏུ་བྲིས་སོ།།
མཆོད་མེའི་འོད་ངོགས་ན།
ཡུམ་ཆེན་དམ་པ་ལ་རྗེས་དྲན་དུ་ཕུལ།
གང་ཁྱེད་ཞལ་གྱི་དུང་ཟླའི་དཀྱིལ་འཁོར་ལས། །
རྟེན་འབྲེལ་ཟབ་མོའི་ལེགས་བཤད་ག་བུའི་ཐིགས། །
འབུམ་དུ་འཇོ་བས་མི་ཤེས་སྨག་རུམ་ཀུན། །
བསལ་མཛད་ཤཀྱིའའི་མགོན་དེས་སྲུང་གྱུར་ཅིག །
གར་འགྲོ་རང་དབང་མེད་པའི་ས་མཐའ་འདིར། །
ཡོད་ཚད་གཞན་ལ་བཅོལ་བའི་ས་མཐའ་འདིར། །
རེ་བའི་དབུགས་རིང་འབྱིན་པའི་ས་མཐའ་འདིར། །
ཐམས་ཅད་སྟོང་ལྷང་གི་ས་མཐའ་འདིར། །
དྲིན་ཆེན་ཕ་མ་གཉེན་སྤུན་མ་མཆིས་ཤིང༌། །
སྙིང་གཏམ་བཤད་པའི་གྲོགས་ཤིག་མ་རྙེད་ལ། །
ནམ་ཡང་ཁེར་རྐྱང་རྐང་ལམ་ཕྲ་མོ་དེར། །
འཁྱར་འཁྱོར་གོམ་སྟབས་བསྒྱུར་བའི་ཉམ་ཆུང་ངས། །
བསིལ་ལྷང་ལྷང་གི་ལྷོ་རླུང་རྔུབ་ཞོར་དུ། །
ཕྲ་ཆུང་མིག་གི་ལོ་འདབ་ཟུམ་གྱུར་ཏེ། །
གྲོགས་མེད་ཁེར་རྐྱང་ལུས་པའི་ཤུལ་ལམ་ནས། །
བསམ་གཞིགས་ཁོར་ཡུག་ཐེངས་གཅིག་ཉུལ་བའི་སྐབས། །
འདས་དོན་མངར་སྐྱུར་འདྲེས་མའི་མི་ཚེ་ཡི། །
འཕྲང་ལམ་དེ་ལས་གཟུགས་མཐོང་གློག་བརྙན་བཞིན། །
ང་ཡི་མིག་ལམ་དལ་བུར་འཆར་བ་ནི། །
ད་ལྟ་མཇལ་དུ་མེད་པའི་ཨ་མ་ལགས། །
ཨ་མ་ཨ་མ་རྒྱང་རིང་ཨ་མ་ལགས། །
བུ་ང་ན་ཚོད་ཡལ་འདབ་མ་རྒྱས་གོང༌། །
བྲེལ་བའི་ངང་ནས་ཕེབས་དོན་ཅི་ཡིན་ཞེས། །
ཁྱེད་ལ་འཁང་ར་ཞུས་པ་ཉུང་ཉུང་མིན། །
དེ་ལྟ་ན་ཡང་སྔོན་མའི་ལས་སྐལ་དེ། །
ཟློག་ཏུ་མེད་པ་ད་ལྟར་ཤེས་གྱུར་བས། །
ཨ་མ་ཁྱེད་ལའང་ཐུང་ཁག་མི་འདུག་ཅེས། །
རྒྱང་རིང་དག་པའི་ཞིང་ལ་ལན་འདི་ཕུལ། །
མ་ཁྱེད་འཇིག་རྟེན་འདི་དང་ཁ་བྲལ་ཚེ། །
ཨ་ཕ་ང་གཉིས་གདུང་བས་ནོན་གྱུར་ཏེ། །
གཅིག་གི་གཅིག་ལ་སེམས་གསོ་བྱས་པའི་ཚུལ། །
ད་ལྟ་དྲན་དུས་ངའི་སེམས་སྐྱོ་ལྷང་ལྷང༌། །
འོན་ཏེ་དྲིན་ཆེན་ཨ་ཕ་ངེད་གཉིས་ཀྱིས། །
ཡུན་རིང་འབད་པས་བསགས་པའི་རྒྱུ་ནོར་ཀུན། །
སྐྱབས་གནས་ཚོགས་ལ་མཆོད་འབུལ་ཞུས་ཡོད་ན། །
གང་ཁྱེད་དག་པའི་ཞིང་ནས་ཐུགས་བདེར་མཛོད། །
ངུར་སྨྲིག་ན་བཟའི་རྒྱན་གྱིས་བཀླུབས་གྱུར་པའི། །
ཨ་ཕ་ང་གཉིས་རྒྱུན་དུ་གང་གི་ཆེད། །
གསོལ་བ་ཆད་མེད་འདེབས་བཞིན་ཡོད་ལགས་ན། །
གང་ཁྱེད་དག་པའི་ཞིང་ནས་ཐུགས་བདེར་མཛོད། །
མཁས་པའི་གོ་འཕང་བསྙེགས་པའི་ཡོན་ཏན་ཞིག །
ད་ལྟ་བུ་ངས་ཤེས་པ་མ་གྱུར་ཀྱང༌། །
མཇུག་མཐར་མི་ལུས་པ་ཡི་ཡོན་ཏན་ཞིག །
སློབ་བཞིན་ཡོད་པས་གང་ཁྱེད་ཐུགས་བདེར་མཛོད། །
ད་ལྟ་མ་ཁྱེད་མཇལ་དུ་མེད་ན་ཡང༌། །
ཕ་མ་གཉིས་ཀའི་འོས་འགན་སྒྲུབ་མཛད་པའི། །
ཁྱེད་ཀྱི་ཚེ་གྲོགས་ང་ཡི་ཨ་ཕ་་ཡི། །
བཀའ་དྲིན་བསྐལ་པའི་བར་དུའང་མཇལ་མི་ནུས། །
དེ་རིང་ག་ཟླ་བའི་བཅོ་ལྔ་འདིར། །
གསོལ་འདེབས་འདོན་པའི་རྟ་དབྱངས་སྙན་ལྷང་ལྷང༌། །
འདི་ན་མཆོད་མེ་རླབས་དམར་ལམ་ལམ། །
གང་ཁྱེད་བཞིན་རས་དུང་ཟླ་གསལ་ལྷམ་ལྷམ། །
མི་མངོན་དབྱིངས་སུ་བཞུགས་པའི་ཨ་མ་ལགས། །
ས་མཐའི་བུ་ཆུང་ཁོ་བོར་གཟིགས་ལགས་སམ། །
ཁྱེད་ཀྱིས་བུ་ཆུང་གཅིག་པུ་དཔལ་རྒྱལ་གིས། །
ཕུལ་བའི་འཕྲིན་ཡིག་འདི་ཀོ་གསན་ལགས་སམ། །
༢༠༠༧ ༦ ༡ ཉིན་ས་ག་ཟླ་བའི་ཚེས་པ་བཅོ་ལྔའི་མཚན་མོར་ཆུ་ཚོད་ ༡༠ ཐོག་
ས་མཐའི་དྭ་ཕྲུག་བེ་རི་དཔལ་ལྡན་རྣམ་རྒྱལ་བས་ཕུལ།
བསྟོད་ཚོགས་མེ་ཏོག་ཚོམ་བུ།
སྐུ་ཚེ་བརྟན་གྱུར་ཅིག
གང་གི་ཞབས་སེན་གང་ལ་རེག་ཙམ་གྱིས། །
སྐྱེས་རྒུའི་བསོད་ནམས་དཔལ་དུ་བསྒྱུར་མཛད་པའི། །
ཞི་བདེའི་དེད་དཔོན་གངས་ཅན་མགོན་པོ་ཁྱེད། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
མུ་མཐའ་བྲལ་བའི་སྐུ་རབས་འཕྲེང་བ་རུ། །
བསྟན་དང་འགྲོ་བའི་དོན་དུ་སྤྲུལ་བའི་གར། །
ཅི་དགར་རོལ་བའི་རང་ཅག་ཡོངས་ཀྱི་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
ཡང་བསྒོས་སྨག་རུ་འཐིབས་པའི་བོད་ཡུལ་དུ། །
སྔོན་གྱི་ཐུགས་བསྐྱེད་ཇི་བཞིན་བོད་འབངས་རྣམས། །
ཡང་དག་ལམ་དུ་འདྲེན་མཛད་གངས་ཅན་མགོན། །
སྐུ་ཚེ་རྡོ་རྗེའི་གཞིས་སུ་བརྟན་གྱུར་ཅིག །
གང་ལ་གང་འདོད་དེ་ལ་དེ་བཞིན་དུ། །
རྒྱལ་བློན་ལོ་པཎ་ལ་སོགས་སྤྲུལ་བའི་གར། །
སྒྱུར་མཛད་ང་ཡི་བླ་མ་གངས་ཅན་མགོན། །
སྐུ་ཚེ་རྡོ་རྗེ་གཤིས་སུ་བརྟན་གྱུར་ཅིག །
མ་རུང་འདུལ་དཀའི་སྙིགས་དུས་འགྲོ་བ་རྣམས། །
ཐུགས་རྗེའི་ཡུལ་ལས་ནམ་ཡང་མི་འདོར་བར། །
བྱམས་པས་བུ་བཞིན་སྐྱོང་བའི་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
ཀླ་ཀློའི་དཔུང་གིས་ས་མཐར་སྤྱུགས་ན་ཡང༌། །
སྙིང་སྟོབས་དབུགས་ཀྱི་རྒྱུ་བ་མ་ལྷོད་བར། །
ཞུམ་མེད་ལྷག་བསམ་འབར་བའི་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
རྒྱུས་མེད་ས་མཐའི་ཡུལ་གྱི་གྲུ་ཁ་འདིར། །
མཛད་འཕྲིན་གཟི་འོད་འབར་བའི་འོད་སྣང་གིས། །
ཀུན་གྱི་བློ་མུན་འཇོམས་པའི་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
ཚན་རྩལ་རིག་པའི་ཟང་ཟིང་ཡོ་ལང་གིས། །
གཡོ་བའི་དེངས་རབས་གསར་བའི་ལུས་ཅན་ལ། །
ཆོས་ཀྱིས་ཞི་བར་མཛད་པའི་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
ཕྱི་ཡི་བདེ་སྐྱིད་སྒྲུབ་པའི་རིག་གསར་དང༌། །
ནང་གི་གཏན་བདེ་སྒྲུབ་པའི་དམ་པའི་ཆོས། །
འགལ་མེད་ཟུང་དུ་འབྲེལ་བའི་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
འཛམ་གླིང་ཆེ་རྒུ་ཀུན་གྱིས་གང་ཁྱེད་ཞལ། །
སྐར་ཆ་གཅིག་ལའང་མཇལ་བའི་རེ་སྒུག་ཅིག །
འབུལ་ཡུལ་ང་ཡི་སྐྱབས་གཅིག་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
མདོར་ན་ཕྱོགས་བཅུའི་རྒྱལ་བ་ཀུན་འདུས་པའི། །
མི་ཡི་གར་དུ་ཤར་བའི་གངས་ཅན་མགོན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ནས། །
མཛད་འཕྲིན་གཟི་འོད་ཀུན་ཏུ་འབར་གྱུར་ཅིག །
ཉམ་ཐག་གནས་སུ་གྱུར་བའི་བོད་འབངས་འགྲོ། །
སྐྱབས་དང་མགོན་དང་དཔུང་གཉེན་ཁྱེད་ཉིད་ལས། །
གཞན་ཞིག་གང་དུའང་འཚོལ་བར་མི་ནུས་པས། །
གང་ཁྱེད་སྐུ་ཚེ་ཡུན་དུ་བརྟན་གྱུར་ཅིག །
སྙིང་ན་སྐྱོ་གདུང་འབར་བའི་འོ་འདོད་ཀྱིས། །
གསོལ་འདེབས་ཚིག་གསུམ་འདི་ན་ཞུས་ཡོད་པས། །
གང་ཁྱེད་སྙན་གྱི་དབང་པོས་གསན་ཡོད་ན། །
སྐུ་ཚེ་རྡོ་རྗེའི་གཤིས་སུ་བརྟན་གྱུར་ཅིག །
དཔལ་དང་འབྱོར་བའི་ཚོགས་ཀྱིས་ཕོངས་ན་ཡང༌། །
དབྱིན་བོད་ཤེས་བྱ་རིག་པའི་ཡོན་ཏན་གྱིས། །
ཕྱུག་པའི་གངས་ཅན་ལྗོངས་ཀྱི་སྙན་ངག་པ། །
བེ་རི་སྨྱོན་ཕྲུག་ཁོ་བོས་ཤར་མར་སྤེལ། །
༢༠༠༧ ༡ ༣ ཉིན་ྋགོང་ས་མཆོག་འབྲས་སྤུངས་ཚོགས་ཆེན་དུ་བཀའ་ ཆོས་ཟབ་མོ་སྩལ་སྐབས་བྲིས།
དགེ་འདུན་ཆོས་འཕེལ། ང་ཁྱེད་མཇལ་ན་འདོད།
ཚ་རླབས་གཤེད་དུ་འབར་བའི་ལྷོ་མཐའ་འདིར། །
དགེ་ཆོས་གསུང་འབུམ་ལག་ཏུ་འཆང་བྱས་ཏེ། །
རེ་རེ་བཞིན་དུ་ཐར་ཐོར་བཀླགས་པའི་རྗེས། །
དགའ་སྐྱོ་འདྲེས་མའི་ཚོར་འདུས་སྙིང་ཁམས་བརླན། །
མཁས་དབང་གང་གི་མཚན་དང་རྣམ་པ་ཐར། །
བྱིས་པའི་དུས་ནས་གསལ་བར་ཐོས་མྱོང་ཡང༌། །
གང་གི་ལེགས་པར་བཤད་པའི་བདུན་རྩིའི་རྒྱུན། །
མྱོང་བའི་སྐལ་བཟང་ད་ལྟ་གཞིས་ནས་རྙེད། །
མཁས་གྲུབ་སྟོང་གིས་བཀབ་པའི་གདན་ས་འདིར། །
སྙིང་ནས་དད་པའི་བླ་མ་མང་བཞུགས་ཀྱང༌། །
གང་གི་ལེགས་བཤད་མཇལ་བའི་དུས་དེ་ནས། །
དད་པའི་ཞིང་ཀུན་ཁྱེད་ཀྱིས་དབང་བར་གྱུར། །
གང་གི་ལེགས་བཤད་མཐོང་བས་དགའ་ལྷང་ལྷང༌། །
ད་ལྟ་མཇལ་དུ་མེད་པས་སྐྱོ་ལྷང་ལྷང༌། །
ཡང་ཡང་སེམས་སུ་འཆར་བས་དྲན་ལྷང་ལྷང༌། །
གང་ཏུ་བཞུགས་སམ་ང་ཡི་བླ་མ་ཁྱེད། །
རྗེས་ལུས་འདམ་དུ་བྱིངས་པའི་གངས་ལྗོངས་སུ། །
རང་རིགས་ཞེན་པ་དཀར་པོའི་སྙིང་སྟོབས་ཀྱིས། །
དེང་རབས་དཔལ་ཡོན་གསར་པའི་སྒྲོན་མེ་ཆེ། །
སྨག་རུམ་མུན་པའི་ཀློང་ནས་མཁའ་རུ་བཏེགས། །
དེ་ལྟར་ན་ཡང་སྐུ་དྲག་བླུན་པོ་ཚོས། །
མུན་ནག་བཙོན་གྱི་དོང་དུ་བརྫངས་བྱས་པས། །
ད་ལྟའི་དུས་སུ་བོད་རིགས་སེམས་ལྡན་ཀུན། །
སྐྱོ་བའི་དབུགས་རིང་མི་འབྱིན་སུ་ཡང་མེད། །
རྒྱང་རིང་གི་རྒན་རིན་པོ་ཆེར་ཕུལ་བ།
ལུགས་གཉེས་ཤེས་བྱའི་གནས་ལ་གཟིགས་པ་ཡི། །
སྤྱན་དཀྱུས་ཨུཏ྄པ་ལ་ལོ་འདབ་རབ་ཡངས་པའི། །
འཇིགས་མེད་སྨྲ་བའི་དབང་ཕྱུག་གང་དེའི་དྲུང༌། །
ཚིག་གསུམ་ཞུ་བ་འབུལ་གྱི་གསན་དུ་གསོལ། །
སྤྱི་དོན་སྒྲུབ་པའི་ལས་ཀྱི་བྲེལ་བ་ཡིས། །
ལུས་སེམས་ལྷོད་ཀྱིས་གནས་པའི་སྐལ་བྲལ་ཡང༌། །
སྐུ་གཟུགས་དཔག་བསམ་ལྗོན་དབང་རབ་བརྟན་ཅིང༌། །
མཛད་འཕྲིན་ལོ་འདབ་རྒྱས་བཞིན་བཞུགས་ཡོད་ཤག །
རྒན་ཉིད་བདེ་བར་བཞུགས་པའི་ཚིག་འབྲུ་རེ། །
གུས་སློབ་རྣ་བའི་བུ་གར་རྒྱུ་ཙམ་གྱིས། །
མ་འདྲེས་དད་གསུམ་སེམས་ཀྱི་ནམ་མཁའ་རུ། །
དགའ་སྤྲོའི་རྒྱུ་སྐར་འབུམ་ཕྲག་གསར་དུ་བསྐྲུན། །
གང་སློབ་གྲལ་མཐར་འཁོད་པའི་ཐ་ཤལ་ང༌། །
ཚོགས་ཆོས་སློབ་གཉེར་བྲེལ་བའི་འདུ་འཛིའི་འོག །
རྒན་གྱི་བསླབ་བྱ་སེམས་དབུས་ཉར་བྱེས་ཏེ། །
ཐར་ཐོར་རྩོམ་ཡིག་འགའ་རེ་འབྲི་བཞིན་མཆིས། །
ཡོད་ཚད་མགོ་རྟིང་སློག་པའི་འཇིག་རྟེན་འདིར། །
ཇི་ཙམ་བསམས་ཀྱང་སྙིང་པོ་མི་འདུག་ཀྱང༌། །
སྨྱུག་གུའི་རྩེ་ནས་ངུ་སྐད་ཤོར་བཞིན་དུ། །
མི་ཚེ་བསྐྱལ་དགོས་བྱུང་འདི་ལས་ཡིན་སྙམ། །
སྔན་བྱོན་སྙུག་ཐོགས་དབང་པོ་དེ་དག་གིས། །
རྒྱལ་ཁབ་དང་ནི་མི་རིགས་བཅས་ཀྱི་སླད། །
ཤིན་ཏུ་གཅེས་པའི་རང་སྲོག་དམར་པོ་ཡང༌། །
སྙུག་གུའི་རྩེ་ནས་ཤོར་བ་གྲགས་ལགས་ན། །
ངེད་ཅག་རྣམས་ཀྱིས་རང་གི་རྒྱལ་ཁབ་ཆེད། །
གཅེས་པའི་རང་སྲོག་གཏོང་བ་མི་ཕོད་ཀྱང༌། །
འཛམ་གླིང་སྤྱི་ཡི་ཞི་བདེའི་ཁོར་ཡུག་དང༌། །
སྤུན་ཟླ་མང་པོའི་རང་དབང་ལ་བསམ་ནས། །
གཤེན་རྗེ་རྒྱལ་པོའི་མགྲོན་ཤོག་མ་སླེབས་པར། །
ཆེ་ས་སྐུབ་སྟེགས་ཐོག་ནས་མ་མཇོན་ཡང༌། །
མི་མངོན་སྨོན་ལམ་ཚུན་ཆད་བཏབ་བྱས་ཏེ། །
ཡོད་ཚད་བོད་དོན་ཆེད་དུ་འབུལ་དགོས་དྲན། །
གངས་ཅན་མགོན་པོའི་མཛད་འཕྲིན་ཉི་ཟེར་འོག །
གངས་ཅན་བོད་ཀྱི་བདེན་མཐའ་སེལ་བ་དང༌། །
གངས་རིའི་དབུས་ཀྱི་རིག་པའི་སེང་གེ་གང༌། །
གངས་ཀྱི་རི་བོ་བཞིན་དུ་བརྟན་གྱུར་ཅིག །
ཉིན་མཚན་ཀུན་ཏུ་སྨྱུག་རྩལ་སྒེག་མོ་ལ། །
དམ་དུ་འཁྱུད་པའི་བེ་རི་སྨྱོན་ཕྲུག་ངས། །
རྒན་མཆོག་དྲན་པའི་གདུང་བ་མ་བཟོད་ནས། །
སྐྱོ་གདུང་སྙུག་གུའི་རྩེ་ནས་འདི་ལྟར་ཐལ། །
༢༠༠༦ ༣ ༣༠ ཉིན་ཕྱག་ཁང་དུ།
བོད་ཀྱི་བུད་མེད་ངོ་མ།
བུད་མེད་རྩོམ་པ་པོ་ཚེ་རིང་འོད་ཟེར་ལགས་ལ་ཕུལ།
ཁ་བའི་ལྗོངས་སུ་བཞུགས་པའི་རྩོམ་པ་བོ། །
འོད་ཟེར་ཞེས་ཏེ་མཚན་གྱི་སྙན་པ་དེ། །
སྔ་མོ་ཞིག་ནས་ཐོས་སྐལ་བྱུང་ན་ཡང༌། །
འདྲ་པར་ཙམ་ཡང་མཇལ་སྐལ་བྱུང་མ་གྱུར། །
དེ་རིང་གློག་ཀླད་དལ་གྱིས་སྒོ་ཕྱེ་ནས། །
འཇམ་དབྱངས་ནོར་བུའི་དྲ་རྒྱ་ཀློག་པའི་སྐབས། །
གང་ཁྱེད་ཉེ་ཆར་བརྩམས་པའི་སྙན་ངག་ཅིག །
ཁོ་བོའི་མིག་གི་དགའ་སྟོན་ཟོལ་དུ་ཤར། །
དལ་གྱིས་བཀླགས་པས་དགའ་སྐྱོ་ཟུང་འབྲེལ་གྱིས། །
ཁོ་བོའི་སེམས་ཁམས་ཀུན་ཏུ་བརླན་པར་གྱུར། །
གཟན་གྱི་སྣེ་ཡིས་མིག་ཆུ་ཕར་ཕྱིས་ནས། །
ཁྱེད་ཀྱི་རྩོམ་ཡིག་གཞས་རྣམས་ཀློག་མགོ་བརྩམས། །
དེ་ལྟར་དེ་ལྟར་རིམ་བཞིན་བཀླགས་པའི་སྐབས། །
ཆུ་ཚོད་གསུམ་ཙམ་ཟིན་གྲབས་བྱས་འདུག་པས། །
སྟོད་འགག་ཨམ་ཕྲག་ནང་གི་སྒོར་མོ་ཡིས། །
རིན་པ་མི་འདངས་བསམ་ནས་ལོག་དགོས་བྱུང༌། །
ལྷ་སའི་འཇིགས་སྣང་ཞེས་པའི་སྙན་ངག་དེ། །
བོད་བསྒྱུར་བྱེད་དགོས་དྲན་ཏེ་མཚན་མོ་ཏུ། །
རང་ཤག་ནང་ནས་གང་ཁྱེད་དྲན་བཞིན་དུ། །
སྒྲོན་མོའི་འོག་ཏུ་དལ་གྱིས་བསྒྱུར་མགོ་བརྩམས། །
བེ་རི་སྨྱོན་ཕྲུག་ཅེས་བྱའི་སེང་གེའི་བུ། །
དབྱིན་བོད་རིག་པའི་གཞུང་ལུགས་དུ་མ་ལ། །
འཆད་རྩོད་རྩོམ་པའི་གཤོག་ཟུང་ཅུང་རྒྱས་ནས། །
གཞུར་ལྡིང་རྩེན་པའི་ངོ་ནོངས་མི་དགོས་ཀྱང༌། །
རྒྱ་ཡིག་སྦྱང་པའི་སྐལ་བ་མ་ཐོབ་པས། །
ཁྱེད་ཀྱི་རྩོམ་ཡིག་གཞན་རྣམས་ཀློག་མ་ཐུབ། །
དེ་ལྟར་ན་ཡང་དབྱིན་བསྒྱུར་བྱས་པ་རྣམས། །
ཀློག་གིན་ཀློག་གིན་ངའི་སེམས་ཅི་ཡང་སྤྲོ། །
ལར་ཞེན་འབུམ་གྱིས་སེམས་ཁམས་ཡོངས་བཟུང་བའི། །
གངས་རི་རྒྱབ་ཀྱི་ངེས་དོན་རྩོམ་པ་པོ། །
ང་ཡི་ཨ་ལྕག་ཚེ་རིང་འོད་ཟེར་ལགས། །
ཞུམ་མེད་སྙིང་སྟོབས་བཟུངསྟེ་ཐུགས་བདེར་བརྗོད། །
གངས་དཀར་རི་བོའི་ཉམས་རྒུད་ལོ་རྒྱུས་རྣམས། །
ག་ལེར་ཡིད་ལ་དྲན་ཚེ་སྐྱོ་གདུང་གིས། །
གས་ལ་ཁད་གྱུར་སྙིང་ཆུང་དམར་པོ་འདི། །
སྙིམ་པ་ཟུང་གིས་དལ་གྱིས་ཡར་ལ་སྐྱོར། །
སྙིང་ནས་ཟགས་པའི་ཕྲག་གི་ཐིགས་པ་དང༌། །
མིག་ནས་ལྷུང་བའི་མིག་ཆུའི་ཐིགས་པ་གཉིས། །
སྣག་ཚ་ནག་པོའི་ལྷན་དུ་བསྲེགས་བྱས་ཏེ། །
སྙན་ངག་འདྲ་མིན་དྲན་རྟེན་ཟོལ་དུ་བཞག །
བདེན་པའི་དོན་ལ་མཐའ་ཞིག་གསལ་ཡོང་ཞེས། །
ཆོས་སྲིད་ཀུན་གྱིས་རྟག་ཏུ་གླེང་བས་ན། །
གོ་ལ་ཟླུམ་པོའི་འཁོར་བསྐྱེད་ཅིག་གི་འོག །
ཁ་བའི་ལྗོངས་ལ་འོད་ཅིག་ལོས་འཕྲོ་ལགས། །
འོད་སྟོང་ལྡན་པའི་ཉི་མ་གཞོན་ནུ་ཞིག །
ངེད་ཅག་རྣམས་ཀྱིས་མིག་གིས་མ་མཐོང་བར། །
འཐབ་རྩོད་རྒྱུད་རིམ་འདི་ཡི་ལམ་ཁ་ནས། །
ཕྱི་མིག་ནམ་ཡང་མ་བལྟས་མདུན་བསྐྱོད་མཛོད། །
༢༠༠༨ ༩ ༤ ཉིན་རང་ཤག་ཏུ་བྲིས།
འོད་སྟོང་འབར་བའི་རྡོ་རིང་གསུམ།
མཁས་དབང་བེ་རི་དགེ་བཤེས་འཇིགས་མེད་དབང་རྒྱལ་མཆོག
བཅུ་ཕྲག་གཞུང་ལུགས་གང་གའི་ཆུ་རྒྱུན་རྣམ་དཔྱོད་ཟབ་མོས་ཧུབ་ཀྱིས་བཏུངས། །
ཐུན་གསུམ་མཚན་མོའི་མུན་པའི་ཀློང་དུ་སྔོན་མེད་ཟླ་བའི་འཛུམ་རླབས་ཀྱིས། །
མཐའ་ཡས་སློབ་མ་རྒྱ་མཚོ་ཆེ་རྣམས་བློ་གྲོས་མཐའ་རྒྱ་སྐྱེད་མཛད་པའི། །
འཇིགས་མེད་སྨྲ་བའི་དབང་ཕྱུག་ཁྱེད་ཀྱི་མཛད་རྗེས་ནམ་མཁའི་མཐའ་དང་འགྲོགས། །
རྒན་ངག་དབང་སྐལ་བཟང་མཆོག
ངག་གི་དབང་ཕྱུག་སྙིང་ཁར་རོལ་ཞིང་རབ་འབྱམས་གཞུང་ལུགས་བང་མཛོད་ཀུན། །
དབང་དུ་བསྒྱུར་ཀྱང་ཁེངས་པས་མ་སྦགས་ལྷག་བསམ་སྤྲིན་གྱི་བ་གམ་ལས། །
སྐལ་ལྡན་སློབ་མའི་གདུལ་བྱའི་ཚོགས་ལ་ལེགས་བཤད་གྲུ་ཚར་བསྙིལ་མཛད་པའི། །
བཟང་པོའི་དགེ་རྒན་ཁྱེད་ཀྱི་སྐུ་དྲིན་སྟོང་གསུམ་ཁྱོན་འདིར་ཤོང་བར་དཀའ། །
རྒན་བརྩོན་འགྲུས་བཟང་པོ་མཆོག
དེང་རབས་ཤེས་བྱའི་ནམ་མཁའི་གནམ་འཕང་མཚུངས་མེད་དབང་དུ་བསྒྱུར་མཛད། །
ངུར་སྨྲིག་རྒོས་ཀྱིས་སྤྲས་པ་མིན་ལྷག་བསམ་མགོ་རིམ་ལྟོང་ལས་ལྷག །
ལེགས་པར་བཤད་པའི་འོད་སྣང་དཀར་པོས་སློབ་བུའི་པད་དཀར་རྒྱས་མཛད་པའི། །
དྲིན་ཅན་དགེ་རྒན་བརྩོན་འགྲུས་བཟང་པོའི་ལྷག་བསམ་དཀར་པོ་བརྗོད་ལགས་འདས། །
གསོལ་འདེབས་སྨོན་ལམ།
མཐའ་བྲལ་ཀུན་གསལ་ནམ་མཁའི་དབྱིངས་སུ་ཉི་ཟླ་སྐར་མའི་འོད་ཟེར་འཕྲོ། །
མཁས་མང་བློ་གླིང་སློབ་གྲྭ་འདི་རུ་ཁྱེད་ཅག་གསུམ་གྱི་གཟི་འོད་འབར། །
ཁྱེད་ཅག་གསུམ་གྱི་བཀའ་དྲིན་དྲན་ཚེ་དད་པའི་རླབས་ཕྲེང་མཁའ་ལ་འཕྱོ། །
དགེ་རྒན་ཁྱེད་གསུམ་བསྐལ་བརྒྱར་བཞུགས་པའི་གསོལ་འདེབས་སྙིང་གི་དབུས་ནས་ཕུལ། །
༢༠༠༥ ༩ ༢༠ ༵༵ནོར་ལྡེ། ཐོག་བཀོད།
དྲན་གདུང་གི་ངུ་འབོད།
སྐུ་དྲིན་མཚུངས་མེད་བདག་གི་དགེ་རྒན་མཁས་དབང་བེ་རི་འཇིགས་མེད་ལ་ཕུལ།
ལུགས་གཉིས་སྤྱན་གྱི་ཨཏ྄པལ་ལོ་འདབ་ཡངས། །
མཚན་སྙན་འོད་ཞགས་འཛམ་གླིང་མཐའ་ནས་འཁྱུད། །
འཇིགས་མེད་སྨྲ་བའི་དབང་ཕྱུག་གང་དེ་ཡི། །
ཞབས་རྡུལ་གཙུག་གི་སྤྱི་བོའི་རྒྱན་དུ་བསྟེན། །
འདི་ན་ཁྱེད་ཀྱི་ཐུགས་རྗེའི་འོད་རླབས་ཀྱིས། །
འཚོ་བའི་ཉམ་ཆུང་སློབ་མ་ཁོ་བོ་ཡིས། །
དྲང་གདུང་སྙིང་གི་བུམ་པར་མ་ཤོང་ནས། །
གདུང་འབོད་འདི་ཀོ་སྙུག་གུའི་རྩེ་ནས་ལུད། །
རྒྱུས་མེད་མི་ཡུལ་ས་མཐའི་གྲུ་ཁ་འདིར། །
སུ་དང་གང་གི་མགོན་སྐྱབས་མ་མཛད་པར། །
ཤུལ་དུ་ལུས་པའི་ད་ཕྲུག་ཉམ་ཆུང་ངའི། །
འཕྲིན་ཡིག་འདི་ཉིད་སྙན་གྱིས་གསན་པར་མཛོད། །
མིག་གི་ཡོལ་བ་ག་ལེར་ཚུར་རྒྱབ་ནས། །
བསམ་གཞིགས་ཀློང་དུ་དལ་གྱིས་ཉུལ་བའི་སྐབས། །
མངར་སྐྱུར་འདྲེས་མའི་འདས་དོན་བྱུང་བ་འགའ། །
བསམ་བློའི་ངོས་སུ་གློག་བརྙན་བཞིན་དུ་ཤར། །
སྣ་ལུད་ཅན་གྱི་བྱིས་པ་གསར་བུ་ང༌། །
སློབ་དཔོན་ཁྱེད་ཀྱི་བརྩེ་བས་རྗེས་བཟུང་སྟེ། །
ཀ་ཁ་མགོ་ནས་སློབ་པའི་ཚུལ་བསམ་ཚེ། །
དད་གུས་སྤྲོ་བའི་མིག་ཆུ་ཆར་དུ་ལྷུང༌། །
དེ་སྐབས་གུས་པས་སྐུ་དྲིན་མ་བསམས་ནས། །
ལྐོག་ལྐོག་སུལ་ནས་མིག་ལོག་བལྟས་འདུག་པས། །
ད་ལྟར་དྲན་དུས་འགྱོད་གདུང་མིག་ཆུའི་ཐིགས། །
འཁུར་ཚོས་ངོས་སུ་འཚང་ཁའི་འགྲན་བསྡུར་ཞིག །
དེང་གི་དུས་སུ་བེ་རི་སྨྱོན་ཕྲུག་ཅེས། །
དབྱིན་བོད་རིག་པའི་གཞུང་ལུགས་དུ་མ་ལ། །
འཇུག་པའི་གཤོག་ཟུང་ཅུང་ཟད་སྐྱེས་པ་འདིའང༌། །
སློབ་དཔོན་ཁྱེད་ཀྱི་སྐུ་དྲིན་ཉིད་དུ་འཁུམས། །
སློབ་དཔོན་ཆེན་པོའི་ཐུགས་རྗེའི་བྱིན་རླབས་དང༌། །
ཡབ་ཆེན་དམ་པའི་བཀའ་དྲིན་ཟུང་ལ་བརྟེན། །
ལོ་མཉམ་མཛའ་གྲོགས་ཀུན་གྱི་གྲལ་གསེབ་ཏུ། །
ཞུམ་པའི་མགོ་བོ་ནམ་ཡང་སྨད་མ་མྱོང༌། །
དེ་ལྟ་ན་ཡང་ཚེ་སྔོན་ལས་ངན་གྱིས། །
ཡབ་ཆེན་དམ་པ་གློ་བུར་གཤགས་གྱུར་ནས། །
མགོན་སྐྱབས་མེད་པའི་ཁེར་རྐྱང་ཤུལ་ལམ་དུ། །
སྐྱོ་གདུང་ཚོ་ངེ་ཤོར་བ་ཉུང་ཉུང་མིན། །
དམར་འབྱར་དུས་ནས་ཁྱིམ་ཚང་ནང་ནས་ཕུད། །
གཞན་གྱི་ཁྱིམ་ཚང་འོག་ཏུ་སྒོ་ཟོག་ལྷན། །
ལྟོ་སྐྱ་གོས་ཧྲུལ་དབུལ་བོའི་འཚོ་བ་བསྐྱལ། །
འདི་དག་ལས་ངན་ཅི་ཡི་འབྲས་ཡིན་སྙམ། །
དཀའ་སྡུག་ཚོར་བ་མང་དུ་མྱངས་པའི་རྗེས། །
ཡུམ་ཆེན་དམ་པ་འཆི་བདག་བཙོན་དུ་ཁྲིད། །
མ་མེད་ད་ཕྲུག་འཁྱམ་པའི་གྲལ་མཐའ་དེར། །
ཐལ་འཚུབ་ཁྲོད་དུ་ངུ་འབོད་ཅི་ཡང་ཤོར། །
བྱིས་པའི་ནུ་ཐག་མ་ཆད་གོང་ནས་ནི། །
རང་གི་ཕ་སའི་ཡུལ་དང་ཁ་བྲལ་ནས། །
ཨ་ཕ་དྲིན་ཆེན་དེ་ཡི་ཕྲག་པ་རུ། །
འཛེགས་ནས་རྒྱ་གར་ལུང་པར་ལས་ཀྱིས་སླེབས། །
ཨ་ཕ་རྒན་པོའི་ཕུགས་བསམ་མ་གྲུབ་གོང༌། །
ང་ཡིས་ཨ་ཕའི་དྲིན་ལན་མ་མཇལ་གོང༌། །
ཡབ་ཆེན་དམ་པ་གློ་བུར་གྲོངས་པ་འདི། །
ལན་གཅིག་དྲན་པས་སེམས་སུ་ན་ཟུག་ཟབ། །
དེ་ལྟ་ན་ཡང་མིག་ཆུའི་ཐིགས་པ་རེ། །
ཉམས་མྱོང་རྒྱ་མཚོའི་ནང་དུ་བླུགས་བྱས་ཏེ། །
ངེས་མེད་མ་འོངས་མདུན་ལམ་རབ་རིབ་ནང༌། །
འོད་སྟོང་ལྡན་པའི་མི་ཚེ་བསྐྱལ་ན་འདོད། །
དེ་ལྟར་བསམ་པའི་དྲན་གྱུ་རྒོན་ན་ཡང༌། །
ད་ལྟ་ཁོ་བོ་ཁ་སྟབས་འདི་འདྲ་ཡིས། །
ནམ་ཡང་ཡོང་ཐབས་མེད་པ་འདི་བསམ་ཚེ། །
སེམས་ཤུགས་བྱེ་མའི་ཁང་པ་དལ་གྱིས་ཞིག །
མདོར་ན་ཉམ་ཆུང་ད་ཕྲུག་ཁོ་བོ་ཡི། །
སྐྱབས་དང་མགོན་དང་དཔུང་གཉེན་འདྲེན་པ་མཆོག །
སློབ་དཔོན་ཁྱེད་ལས་གཞན་དུ་མ་མཆིས་པས། །
ཐུགས་བརྩེ་ཆེན་པོས་རྗེས་སུ་གཟུང་དུ་གསོལ། །
གང་གི་བཀའ་སློབ་ཉི་མའི་འོད་སྟོང་གིས། །
ཁོ་བོའི་མདུན་ལམ་ཡོངས་སུ་གསལ་མཛད་ནས། །
བེ་རི་སྨྱོན་ཕྲུག་ཅེས་བྱའི་སློབ་མ་འདི། །
ཀུན་ལས་ཁྱད་དུ་འཕགས་པར་འགྱུར་བར་ཤོག །
ཅེས་པའི་སྨོན་ཚིག་ཐུང་ངུས་མཚམས་སྦྱོར་ཏེ། །
ལྷོ་མཐར་ལུས་པའི་གང་ཁྱེད་སློབ་མ་སྟེ། །
བེ་རི་སྨྱོན་ཕྲུག་ཅེས་བྱའི་ད་ཕྲུག་ངས། །
གུས་ཕྱག་དང་བཅས་ཟླ་ཚེ་བཟང་པོར་ཕུལ། །
༢༠༠༨ ༤ ༢༤ ཉིན།
མགྱོགས་བྲིས་སྤྲིན་གྱི་བ་གམ།
མཁས་མང་བློ་གསལ་བྱེ་བའི་གླིང་གྲྭ་ཚང་གི་གཙུག་ལག་ཁང་
གསར་བཞེངས་ལེགས་གྲུབ་བྱུང་བའི་རྟེན་འབྲེལ་དུ།
བཤད་དང་སྒྲུབ་པ་ཡ་མ་བྲལ་བའི་ཐུབ་པའི་དམ་ཆོས་ཟབ་མོ་དེ།།
ཕྱོགས་མཐའ་ཀུན་ཏུ་འཛིན་སྐྱོང་སྤེལ་ལ་རྒྱན་དྲུག་པན་ཆེན་ཇི་བཞིན་དུ།།
མཁས་གྲུབ་བྱེ་བས་ཡོངས་སུ་ཁེངས་པའི་བློ་གསལ་གླིང་གི་ཆོས་སྡེ་འདིའི།།
སྙན་དང་གྲགས་པ་འབར་བའི་གཟི་ཡིས་ས་གསུམ་འཇིག་རྟེན་ཡོངས་སུ་གཡོས།།
དམར་པོའི་དམག་གིས་དམར་དར་བསྒྲེངས་ནས་གངས་རི་དམར་པོ་བསྒྱུར་བའི་སྐབས།།
བླ་ཆེན་ཕལ་ཆེར་བླ་ནས་ཕབ་ནས་བླ་མའི་གསེར་ཁྲི་བཤིགས་པའི་སྐབས།།
མི་མང་ཀུན་ལ་མི་སྤྱོད་འདས་པའི་མི་གསོད་ལས་འགུལ་རྩོམ་པའི་སྐབས།།
ྋསྐྱབས་མགོན་ཆེན་མོ་སྐྱབས་ཡུལ་འཚོལ་ནས་སྐྱབས་བཅོལ་ཡུལ་དུ་ཕེབས་པའི་སྐབས།།
ཆོས་སྡེ་འདི་ཡང་འབར་རྫས་འོག་ནས་གས་ཆག་དྲག་པོ་བྱུང་ན་ཡང༌།།
ྋགོང་ས་ཆེན་པོའི་དྲིན་ལ་བརྟེན་ནས་འཕགས་ཡུལ་མོན་གྷོ་འདོད་གླིང་དུ།།
བསྐྱར་འཛུགས་བྱས་ནས་བཤད་སྒྲུབ་འཆད་ཉན་སྔར་ལས་ལྷག་པར་འཕེལ་གྱུར་བས།།
བློ་གསལ་གླིང་གི་མཚན་གྱི་སྙན་པ་དད་ལྡན་རྣ་བའི་དཔྱིད་དུ་ཤར།།
ཉི་ཟླ་སྐར་མའི་ཚོགས་རྣམས་ཀྱིས་ཀྱང་དཔེ་ཡི་མཚོན་བྱེད་མི་ནུས་པའི།།
འཇམ་མགོན་རྒྱལ་བའི་གདུང་འཚོབ་དང་ནི་ཤར་བྱང་ཆོས་རྗེ་རྣམ་གཉིས་དང༌།།
སྟོད་སྨད་རྒྱུད་པའི་མཁན་ཁྲི་ལ་སོགས་དགེ་ལྡན་གསེར་ཁྲི་ཕལ་མོ་ཆེ།།
བློ་གླིང་མཁས་པས་བཟུང་འདུག་ཅེས་བྱའི་རྒྱལ་བའི་བསྔགས་པ་ཅི་ཡང་བདེན།།
དེ་བཞིན་ཟམ་གདོང་པན་ཆེན་ལ་སོགས་བློ་གླིང་མཁས་དབང་དུ་མ་ཡིས།།
བཀའ་སྤྱི་གསེར་ཁྲི་ཡོངས་སུ་བཟུང་སྟེ་རང་གཞུང་སྲི་ཞུ་སྒྲུབ་པ་སོགས།།
མདོར་ན་རང་ཅག་གངས་ཅན་པ་ཡི་ཆོས་དང་སྲིད་ཀྱི་རྒྱལ་མཚན་ཀུན།།
བློ་གླིང་པ་ཡིས་སྒྲེང་བཞིན་འདུག་པས་གཟུར་གནས་མཁས་པས་གཟིགས་ན་ཤེས།།
འདི་ཀོ་སེམས་སུ་དྲན་པ་བྱས་ནས་ཁེངས་པའི་འུར་བསྟོད་མ་ཡིན་གྱི།།
ྋགོང་ས་མཆོག་གི་སྐུ་ཕྲེང་ཀུན་དང་དགའ་ལྡན་ཕོ་བྲང་སྲིད་གཞུང་ལ།།
སྔ་ནས་ད་བར་བློ་གླིང་པ་ཡིས་ཞབས་འདེགས་ཚུལ་བཞིན་བསྒྲུབས་ཡོད་པས།།
འདི་ཀོ་སྐྱབས་མགོན་རྒྱལ་བའི་དབང་པོ་དགྱེས་པའི་མཆོད་སྤྲིན་དངོས་ཡིན་སྙམ།།
དཔལ་དང་འབྱོར་པའི་ཡོ་ལང་ཆེ་བའི་བཙན་བྱོལ་སྤྱི་ཚོགས་འདི་ཡི་ནང༌།།
བླ་སྤྲུལ་ཁ་ཤས་ཕྱི་རྒྱལ་འཕུར་ནས་ཆོས་ཚོགས་བཙུགས་པའི་འགྲན་བསྡུར་ཆེ།།
གྲྭ་རྐྱང་ཁ་ཤས་ཕྱི་རྒྱལ་ཐར་ནས་གསང་སྤྱོད་བཀྲུ་བའི་འགྲན་བསྡུར་ཆེ།།
བུ་མོ་ཁ་ཤས་ཕྱི་རྒྱལ་འཐེན་ནས་རང་ལུས་བཙོང་བའི་འགྲན་བསྡུར་ཆེ།།
ཁ་ཤས་གསེར་སྐུ་ཆེན་པོ་བཞེངས་ནས་གཞན་ལ་ངོམ་པའི་འགྲན་བསྡུར་ཆེ།།
ཁ་ཤས་འདུ་ཁང་རྫིག་པོ་རྒྱབ་ནས་གྲགས་པ་འཚོལ་བའི་འགྲན་བསྡུར་ཆེ།།
མདོར་ན་འདི་ཀོ་ཕལ་མོ་ཆེ་ཞིག་འགྲན་བསྡུར་ཡོ་ལང་འཚུབ་མོའི་འོག།
ཆོས་འབག་གྱོན་པའི་ཟློས་གར་ཙམ་ལས་ཆོས་ཀྱི་བྱ་བ་ཨེ་ཡིན་སྙམ།།
འོན་ཏེ་བློ་གླིང་དགེ་འདུན་སྡེ་འདི་ཡར་ངོའི་ཟླ་ལྟར་འཕེལ་གྱུར་བས།།
འདུ་ཁང་རྙིང་པར་མ་ཤོང་ན་ཡང་ཆོག་ཤེས་བྱས་ནས་བསྡད་པའི་སྐབས།།
ྋགོང་ས་མཆོག་གིས་འདུ་ཁང་གསར་བཞེངས་དགོས་ངེས་བཀའ་སློབ་ཕེབས་གྱུར་བས།།
འབྱོར་ལྡན་འགའ་ཡི་མཐུན་འགྱུར་འོག་ནས་འདུ་ཁང་འདི་ཉིད་གསར་དུ་བཞེངས།།
ཨེ་མ་ཕྱི་རོལ་གཙུག་ལག་ཁང་གི་གཟི་འོད་འབར་བའི་རྒྱས་སྤྲོས་དང༌།།
སྙིགས་མའི་དུས་ཀྱི་མཐའ་མ་འདིར་ཡང་ཐོས་བསམ་སྒོམ་པའི་སྐལ་བ་འདི།།
ྋགོང་ས་ྋསྐྱབས་མགོན་ཐམས་ཅད་མཁྱེན་པའི་སྐུ་དྲིན་ཉག་ཅིག་ཡིན་ལགས་ན།།
རྒྱལ་དབང་མཆོག་ཉིད་སྐུ་ཚེ་བརྟན་པའི་གསོལ་འདེབས་སྨོན་ལམ་ལོས་ཞུ་ལགས།།
བློ་གསལ་རྩོམ་རིག་དགའ་ཚལ་ཐོག་བཀོད།
ལྷོ་མཐའ་ནས་ཕུལ་བའི་གདུང་དབྱངས།
དགེ་བཤེས་བསོད་ནམས་ཕུན་ཚོགས་སྐུ་ཞི་བར་གཤེགས་པའི་རྗེས་དྲན་དུ།
དབུལ་ཕྱུག་བར་སྟོང་ཞན་ལས་ཆེ་བའི་མང་བཟང་ནང་གི་གྲོང་ཚེ་དེར། །
སྣ་ལུད་སྦགས་པའི་ལྤགས་ཚགས་གྱོན་ནས་ཕག་རྫི་ཆུང་ཆུང་བྱས་སྐབས་ནས། །
དགེ་བཤེས་བསོད་ནམས་ཞེས་བྱའི་མཚན་སྙན་རྣ་བའི་བུ་གར་རྒྱུ་དང་ལྷན། །
དད་པའི་མེ་ལྕེ་ལྷག་པར་འབར་ཞིང་ཁྱེད་ཞལ་མཇལ་བའི་སྐལ་བ་སྨིན། །
ཤེས་ཡོན་སྦྱོང་བའི་ན་ཚོད་མ་ཟིན་བློ་རིག་ཁོ་ལག་མ་རྫོགས་པས། །
གང་ཁྱེད་གསེར་ཞལ་མཇལ་བ་ཙམ་ལས་ཁྲིད་དང་དབང་ལུང་ཞུས་མ་མྱོང༌། །
ཕྱག་གིས་མགོ་ལ་བྱིལ་བྱིལ་གནང་ནས་དགྱེས་པའི་འཛུམ་མདངས་བསྟན་ཙམ་ལས། །
བླང་དོར་བཀའ་ཆོས་གནང་མྱོང་མེད་ཀྱང་དད་པའི་རྡོ་རིང་སེམས་ལ་བཞག །
དུས་དང་ལས་ཀྱི་འགྱུར་འགྲོས་ཤིག་གིས་རྒྱུས་མེད་ས་མཐར་དེད་པའི་རྗེས། །
ལོ་ཟླའི་འཕྲེང་བ་འགའ་ཤས་འཁོར་མཚམས་ཁྱེད་ཉིད་འདི་རུ་ཕེབས་འདུས་ཅེས། །
དྲི་བཞོན་བསིལ་བོ་རྒྱུ་བའི་ལྷན་དུ་གཏམ་བཟང་སྙན་པོ་ཐོས་བྱུང་བས། །
དགའ་དད་སྤྲོ་བའི་རླབས་ཕྲེང་འཕྱུར་ནས་ཁྱེད་ཞལ་མཇལ་བར་ཀུན་ཏུ་བྲེལ། །
དད་གདུང་དྲན་གདུང་ལྷན་དུ་འདྲེས་པའི་མིག་ཆུས་སྙིམ་པ་ཡོངས་བཀང་སྟེ། །
གང་ཁྱེད་གསེར་ཞལ་ཟླ་བའི་དཀྱིལ་འཁོར་མཇལ་ཁའི་གྲལ་དུ་འཚང་ཞིང་སྒུག །
བྱིན་དང་གཟི་ཡི་འོད་རླབས་འབར་ཞིང་མཛུམ་པའི་མདངས་ཀྱིས་ཡོངས་ཁེངས་པའི།།
ཁྱེད་ཞལ་ལན་གཅིག་མཇལ་བ་ཙམ་གྱིས་སྐྱོ་གདུང་མུན་པ་ཡོངས་སུ་བསལ། །
དད་པ་དམ་ཚིག་གཡོ་མེད་ངང་ནས་གསུང་ཆོས་བཀའ་དྲིན་བསྩལ་མཛད་པས། །
བྱེས་འབྱོར་གང་ཁྱེད་སློབ་བུའི་ཚོགས་རྣམས་དགའ་བའི་ཅ་ཅོ་ཤོར་དང་ལྷན། །
དད་གདུང་མཆི་མས་འཁུར་ཚོས་བརླན་ཞིང་དད་པའི་སྙིང་པ་བྲང་ལ་སྦྱོར། །
དཔོན་སློབ་མཛོམས་པའི་དགའ་སྟོན་འདི་ཀོ་མི་ཚེའི་དྲན་རྟེན་དངོས་ཡིན་སྙམ། །
ྋགོང་ས་རྒྱལ་དབང་ཐམས་ཅད་མཁྱེན་པས་ཁྱེད་ཉིད་བོད་ལ་ཕྱིར་ཕེབས་ཏེ། །
བསྟན་འགྲོ་སྐྱོངས་ཤིག་ཅེས་པའི་བཀའ་ཡི་མེ་ཏོག་སྤྱི་བོའི་རྒྱན་དུ་བབ། །
དེ་བཞིན་བོད་དུ་ཕྱིར་ཕེབས་གནང་ཏེ་ཉམ་ཆུང་གདུལ་བྱ་སླར་ཡང་བསྐྱངས། །
སྐར་ཆ་གཅིག་ལའང་བསྟན་འགྲོའི་དོན་མཛད་གང་ཁྱེད་མཛད་པ་བརྗོད་ལས་འགོངས།
སྤྱི་མཐུན་གདུལ་བྱའི་བསོད་ནམས་དམན་པས་འདྲེ་སེམས་ཁོག་ཏུ་ཞུགས་ལ་འགས། །
ཕྲག་དོག་ཁྲག་གི་རྒྱ་མཚོ་འཁོལ་ནས་ངན་སེམས་ཕྲག་རླབས་དགུང་ལ་འཕྱུར། །
ཏང་གི་དམག་མི་གྲོགས་སུ་འགུགས་ཏེ་གང་ཁྱེད་བཙན་བཟུང་བྱས་པའི་སྐབས། །
ཉམ་ཆུང་གདུལ་བྱ་སྟོང་ཚོ་མང་པོས་ངོ་རྒོལ་གྱེན་ལངས་ཤུགས་ཆེར་བྱས། །
སློབ་དཔོན་ཁྱེད་དང་སློབ་མ་མང་པོ་མི་མངོན་བཙོན་གི་དོང་དུ་བཙུད། །
ཉིན་མཚན་ཀུན་ཏུ་ཚར་འདྲི་བཏང་ཞིང་གློག་གི་རྒྱུགས་པས་རྡེག་པ་སོགས། །
རྡུང་རྡེག་མནར་གཅོད་ཚད་མེད་བཏང་སྟེ་སྐུ་ཡི་འོ་བརྒྱལ་ཅི་ཡང་ཆེ། །
འདི་ཀོ་སེམས་སུ་དྲན་པའི་མོད་ལ་ཟུར་གསུམ་སྙིང་ཆུང་ཁྲོ་བས་གས། །
ཉིན་མཚན་བསྟུན་མར་རྡུང་རྡེག་བཏང་བས་སྐུ་གཟུགས་ཧ་ཅང་སྐམ་པའི་སྐབས། །
བཙོན་ཁང་ནང་དུ་གྲོངས་བར་དོགས་ཏེ་ལོ་ཤས་འཕྲེང་བ་འཁོར་བའི་རྗེས། །
བཙན་གྲོལ་ཐོབ་ཏེ་ཕྱི་རུ་ཕེབས་ཀྱང་ཆོས་འབྲེལ་ནམ་ཡང་མི་ཆོག་ཅེས། །
བཙན་བཀའ་ཕབ་ཅིང་ཉིན་མཚན་ཀུན་ཏུ་ལྐོག་ནས་སོ་བལྟ་རྟག་ཏུ་བྱས། །
དེ་རིང་ཞོགས་ཇ་འཐུང་བའི་ཞོར་དུ་རླང་འཕྲིན་གློག་སྒོ་ཕྱེ་མ་ཐག །
དགེ་བཤེས་བསོད་ནམས་དགོངས་པ་རྫོགས་པའི་གཏམ་ངན་རྣ་བར་འཛུལ་བྱུང་བས། །
ལག་ཏུ་བཟུང་བའི་ཤེལ་ཕོར་དཀར་པོ་དབང་མེད་ས་ལ་ཁྲག་སེ་ལྷུང༌། །
ལུས་ཀྱི་བ་སྤུ་ཀུན་ནས་ལངས་ཤིང་མིག་ཆུའི་ཐིགས་པ་ས་ལ་འཐོར། །
ཀྱེ་ཧུད་ཀྱེ་མ་བསྟན་འགྲོའི་དཔལ་མགོན་མཚུངས་མེད་བཤེས་གཉེན་ཁྱེད་འདྲ་བ། །
འདི་ལྟར་ཞི་བར་གཤེགས་པར་གྱུར་ན་བསྟན་འགྲོའི་དགའ་ཚལ་སུ་ཡིས་སྐྱོང༌། །
མགོན་མེད་ཉམ་ཐག་གདུལ་བྱ་འདི་ཀོ་སྲིད་ཞིའི་མཐའ་ནས་སུ་ཡིས་འདྲེན། །
འཁང་ར་འདྲེས་མའི་འོ་འདོད་འདི་ཀོ་དབང་མེད་སྙུག་གུའི་རྩེ་ནས་ཤོར། །
ཉེ་ཆར་དམར་པོའི་དྲག་གནོན་འོག་ནས་སྤུན་ཟླ་བརྒྱ་ཕྲག་ཁ་ཤས་ཤིག །
དམར་གསོད་བཏང་བའི་སྙིང་གི་གདུང་བས་སེམས་སུ་རྨ་ཁ་བཟོས་པའི་སྟེང༌། །
མགོན་ཁྱེད་ཞི་བར་གཤེགས་པའི་གཏམ་གྱིས་རྨ་ཁ་རྙིང་པར་ཁ་སྣོན་བཏབ། །
སོས་དཀའི་རྨ་ཁ་ལག་པས་བསྐྱོར་ཏེ་དད་གདུང་གསོལ་འདེབས་མང་དུ་ཞུས། །
འཆད་རྩོད་རྩོམ་པའི་རྣམ་དཔྱོད་ཡངས་ཤིང་ལྟ་དཔྱོད་སྒོམ་པའི་ཉམས་ལེན་ཟབ། །
མཁས་བཙུན་བཟང་པོའི་མགོན་པོ་ཁྱེད་འདྲ་ལན་གཅིག་ཞི་བར་གཤེགས་ཙམ་གྱིས། །
འཇིག་རྟེན་ཁམས་འདི་མུན་ལས་ཁྱབ་ཅིང་བདེ་སྐྱིད་འོད་སྣང་ནུབ་འགྱུར་བས། །
བསྟན་འཛིན་སྐྱེ་བུ་ཤེས་ལྡན་ཀུན་གྱིས་སྤྱན་ཆབ་དབང་མེད་བཞུར་བར་ངེས། །
ཆོ་ངེ་དྲག་པོ་ཀུན་ཏུ་སྒྲོག་པའི་འོ་འདོད་འདི་ཀོ་གསན་མཛད་ནས། །
བསྟན་དང་འགྲོ་བའི་མགོན་དུ་ཤར་བའི་ཡང་སྤྲུལ་ཟླ་བ་གཞོན་ནུ་ཡི། །
གསེར་ཞལ་དཀྱིལ་འཁོར་དངོས་སུ་མཇལ་བའི་གསོལ་འདེབས་སྨོན་ལམ་ཡང་ཡང་དུ།།
བེ་རི་སྨྱོན་པའི་སྲས་ཀྱི་ཐུ་བོ་བེ་རི་སྨྱོན་ཕྲུག་བདག་གིས་ཞུས། །
འོད་སྟོང་འབར་བའི་ཉི་མ།
ང་ཡི་བླ་མ་ཁྲི་ཆེན་བློ་བཟང་ཉི་མ་མཆོག་རྗེས་དྲན་དུ།
ཅ་དངོས་ཉོ་ཚོང་འགའ་ཡི་ཆེད་དུ་རྒྱལ་ས་ཧོབ་ལིར་འགྲིམས་པའོ་མོད།།
ལག་ཐོགས་ཁ་པར་ངུ་བའི་ཟོལ་གྱིས་ཏིར་སྒྲ་ཤུགས་ཀྱིས་གྲགས་བྱུང་བས།།
ཅི་ཞིག་ཡིན་སྙམ་དལ་གྱིས་ཉན་པས་དགའ་ལྡན་ཁྲི་ཟུར་རྡོ་རྗེ་འཆང༌།།
དགོངས་པ་རྫོགས་པའི་མི་སྙན་གཏམ་ངན་ང་ཡི་རྣ་བའི་གཤེད་དུ་ལྷུང༌།།
དེ་མ་ཐག་ཏུ་སྐྱོ་གདུང་དྲག་པོས་ལུས་ཀྱི་བ་སྤུ་གྱེན་དུ་གཡོ།།
ལག་ཏུ་བཟུང་བའི་བདོག་པ་རྣམས་ནི་དབང་མེད་ས་ལ་ཕྲག་སེ་ཤོར།།
ཀྱེ་ཧུད་ཀྱེ་མ་མགོན་པོ་ཁྱེད་ཉིད་འདི་ལྟར་བྲེལ་བས་ཕེབས་དོན་ཅི།།
མགོན་སྐྱབས་མེད་པའི་གདུལ་བྱའི་ཚོགས་རྣམས་སྙིང་རྗེས་ཡལ་བར་འདོར་རིགས་སམ།།
ཤག་ཏུ་སླེབས་ནས་བློ་གསལ་ཆོས་འབྱུང་ཡང་བསྐྱར་ཐེངས་གཅིག་ཀློག་མགོ་བརྩམས།།
གང་ཁྱེད་མཛད་པའི་རྣམ་ཐར་རིང་བོ་ང་ཡི་སེམས་ངོས་ལྷ་མེར་གསལ།།
གསལ་མ་གསལ་གྱི་ལ་སྒྲོན་འོག་ཏུ་ཁྱེད་ཀྱི་སྐུ་པར་བལྟས་བཞིན་དུ།།
དད་གདུང་བསྣོལ་མར་འཐབ་པའི་ཁྲོད་ནས་མཆི་མས་གཟན་ཤམས་ཀུན་ཏུ་བརླན།།
ཀྱེ་ཀྱེ་ང་ཡི་དྲིན་ཅན་བླ་མ་ངེད་ཅག་རྣམས་ལ་གསན་མཛོད་དང༌།།
བློ་བཟང་རྒྱལ་བའི་བསྟན་པའི་ཉི་མ་གང་ཁྱེད་གཞན་དུ་གཤེགས་གྱུར་ན།།
ཕྱོགས་འདིར་མུན་པས་ཁྱབ་པར་འགྱུར་བས་ཐུགས་རྗེ་ཆེན་པས་གཟིགས་གནང་སྟེ།།
གང་ཁྱེད་མཆོག་སྤྲུལ་ཉིན་བྱེད་དབང་པོ་མྱུར་དུ་བྱོན་པར་མཛོད་ཅིག་ཀྱེ།།
སེམས་ཁོང་གི་ན་ཟུག
གཞིས་ལུས་རྒྱལ་གཅེས་དཔའ་བོ་ཚོར་ཕུལ་བ།
གངས་ཅན་ས་ཡི་རྡུལ་གྱི་ཆ་ཙམ་ཡང༌། །
རང་ལ་མི་དབང་རྒྱལ་ཁབ་གཞན་གྱི་སར། །
སྐྱབས་བཅོལ་བ་ཞེས་དཔྲལ་བར་བྲིས་བྱས་ཏེ། །
སློང་མོ་བ་བཞིན་ང་ཚོ་ཉམས་རེ་དམའ། །
སྐྱབས་བཅོལ་བ་ཡི་མིང་ཚིག་སྐྱུར་མོའི་འོག །
ལོ་དང་ཟླ་བའི་ཕྲེང་བ་ཡུད་ཀྱིས་འཁོར། །
རང་གི་ཕ་ཡུལ་དྲན་པའི་གདུང་བ་ཡིས། །
ངའི་སེམས་བདེ་བའི་དུས་ཤིག་བྱུང་མ་མྱོང༌། །
ལྷག་པར་རང་གི་ཤ་ཁྲག་གཅིག་པའི་སྤུན། །
འབུམ་དང་ས་ཡ་དམར་གསོད་བཏང་བའི་ཚུལ། །
ལན་གཅིག་སེམས་པའི་ངོས་སུ་དྲན་ཙམ་གྱིས། །
ཟུར་གསུམ་སྙིང་ཆུང་སྡུག་གིས་ཡོངས་སུ་གས། །
ྋགོང་ས་ཆེན་པོ་མི་ཡི་ཡུལ་དུ་བྲོས། །
ཤ་ཉེ་སྤུན་ཟླ་མང་པོའི་བླ་སྲོག་ཤོར། །
སྐྱབས་ཡུལ་དགོན་སྡེ་སྟོང་ཕྲག་རྨང་ནས་བཤིག །
འདི་ལས་སྡུག་པའི་གནས་ཚུལ་ཅི་ཞིག་མཆིས། །
འཛམ་གླིང་མི་མང་ཀུན་གྱིས་གཤམ་འོག་ན། །
མཐེ་བོང་གཉིས་པོ་མཁའ་ལ་བསྒྲེང་བྱས་ཏེ། །
སྐྱབས་བཅོལ་བ་ཞེས་ཀུན་གྱི་བརྙས་བཅོས་འོག །
མཐོང་ཆུང་རིན་མེད་ཉོ་བ་ཡིད་རེ་སྐྱོ། །
སྐྱབས་མགོན་ྋགོང་ས་མཆོག་གི་སྐུ་དྲིན་གྱིས། །
བྱེས་སུ་གྱར་བའི་བོད་རིགས་སྤུན་རྣམས། །
ཆོས་དང་ཟང་ཟིང་གཉིས་ཀྱིས་མི་ཕོངས་ནས། །
དགའ་སྐྱིད་འཚོ་བར་རོལ་སྐལ་ཅུང་ཐོབ་ཀྱང༌། །
གཞིས་སུ་ལུས་པའི་བོད་རིགས་སྤུན་ཟླ་རྣམས། །
ཉིན་མཚན་ཀུན་ཏུ་མདའ་དང་མེ་སྒྱོགས་འོག །
བཙན་གནོན་དྲག་པོས་མནར་དང་གནར་བཞིན་པས། །
ངེད་ཅག་འདི་ལྟར་སྡོད་བཟོད་ག་ལ་ཡོད། །
བོད་རིགས་འབུམ་ཕྲག་གྲི་རྩེར་གཤེགས་པ་རྣམས། །
ངེད་ཅག་ཀུན་གྱི་ཆེད་དུ་ཡིན་ལགས་ན། །
ཕ་གསོད་དགྲ་ལ་ཤ་ལེན་མ་བླང་བར། །
ངའི་སེམས་བདེ་བའི་དུས་ཤིག་འབྱུང་མི་སྲིད། །
གདོན་འདྲེ་སྙིང་ལ་ཞུགས་པའི་གུང་ཕྲན་ཏང༌། །
དཔལ་འབྱོར་བསླུ་བྲད་ཅིག་གིས་བོད་འབངས་རྣམས། །
འཆིང་ལ་འབད་ཀྱང་ནམ་ཞིག་རང་བཞིན་གྱིས། །
རྫུན་རྐུབ་བརྡོལ་བ་ཀུན་གྱིས་མངོན་སུམ་ཉིད། །
ལྷག་པར་དེང་སང་མདོ་དབུས་ཁམས་ནས། །
ཏང་གི་བཙན་གནོན་སྙིང་ལ་མ་བཟོད་དེ། །
མི་མང་གྱེན་ལང་གང་སར་འཕྱུར་བ་འདིས། །
རྒྱལ་སྤྱིའི་གཞུང་ལ་སྐུལ་ལྕག་ལན་གཅིག་བཏང༌། །
རང་དབང་དང་ནི་འཚེ་མེད་ཞི་བདེ་ཞེས། །
ཀུན་གྱིས་གཏམ་བཤད་སྤེལ་བ་བདེན་གྱུར་ན། །
ཚོང་དང་ཆབ་སྲིད་གཡོ་འོག་མ་ཚུད་པར། །
བདེན་པའི་ལན་ཞིག་གནང་རོགས་རྒྱལ་ཚོགས་ཀྱེ། །
གཏམ་བཤད་གནང་ལ་མཁས་པའི་སྐུ་ངོ་དང༌། །
སྒྱུ་རྩལ་སྙུག་གུ་བདེ་བའི་རྩོམ་པ་པོ། །
ལྕེ་རྩལ་བདེ་བའི་དབང་ཆེན་དཔོན་པོ་རྣམས། །
རྩལ་ཞིག་ཡོད་ན་ད་གཟོད་སྟོན་རན་འདུག །
མཐུ་དང་ནུས་པ་ཆེ་བའི་སྔགས་པ་དང༌། །
གྲོགས་དང་འཕྲིན་ལས་མྱུར་བའི་སྲུང་མ་དང༌། །
འགྲོ་ཀུན་སྲིད་ལས་འདྲེན་པའི་བླ་མ་རྣམས། །
ནུས་པ་ཡོད་ན་ད་གཟོད་སྟོན་རན་འདུག །
སྐུ་རབས་འཕྲེང་བ་སྒྲིག་པའི་སྤྲུལ་སྐུ་དང༌། །
གཤིན་པོའི་བླ་སྲོག་འགུག་པའི་གྲུབ་ཐོབ་དང༌། །
སེམས་ཅན་ཐམས་ཅད་ཟེར་བའི་ཆོས་པ་རྣམས། །
ཚོར་བ་ཡོད་ན་ད་གཟོད་ལང་རན་འདུག །
མདའ་དང་མི་སྒྱོགས་མཚམས་མེད་སྙིལ་བའི་ཁྲོད། །
ཉིན་ནས་ཉིན་རེར་སྤུན་ཟླ་རྫོགས་ལ་ཉེ། །
དེ་འདྲའི་གཉན་འཕྲང་ཅན་གྱི་དུས་སྐབས་སུ། །
ཚོར་བ་ཡོད་ན་ད་གཟོད་ལང་རན་འདུག །
ལོངས་ཤིག་ལོངས་ཤིག་ཚང་མ་ཡར་ལོངས་ཤིག །
ྋགོང་ས་མཆོག་གི་ཐུགས་རྗེའི་ལམ་སྟོན་འོག །
ཚང་མ་གཅིག་ཏུ་བསྒྲིལ་ནས་སྤུན་མཆེད་རྣམས། །
དགྲ་ཡི་ཁ་ནས་སྐྱོབ་ཆེད་ལོངས་ཤོག་ཀྱེ། །
༢༠༠༨ ༣ ༡༧ ཉིན་རང་ཤག་ཏུ་ཉེ་ལམ་བྱུང་བའི་གནས་ཚུལ་རྣམས་
སེམས་སུ་འཁོར་བཞིན་མཆོག་གསུམ་རྒྱལ་བ་ལ་གསོལ་འདེབས་དང་འབྲེལ་
ཕྲན་བེ་རི་སྨྱོན་ཕྲུག་ཅེས་བྱ་་བས་ཤར་མར་སྤེལ།
ཁེར་རྐྱང་གི་ཆིག་ལབ།
ང་ནམ་ཡང་དགོད་བྲོ།
མི་ལྤགས་གྱོན་པའི་ཝ་མོ་འགའ་ཡི་བྱ་སྤྱོད་མིག་ལམ་དུ་ཤར་རྗེས།
སྨྱུག་རྩལ་སྒེག་མོའི་རྐེད་པར་དམ་དམ་དུ་འཁྱུད་ནས།།
སྙན་འཇེབས་གླུ་ཞིག་ང་ཡིས་ལེན་འདོད་ཅིག་འདུག།
ཟང་ཟང་འཇིག་རྟེན་འདི་ལ་བསམ་གཞིགས་ཤིག་བྱས་དུས༌།།
ཡོད་ཚད་དགོད་མོ་བྲོ་བའི་སྣང་བ་ཞིག་སྟེར་བྱུང༌།།
ཕྲག་དོག་སྙིང་གི་འཁོན་འཛིན་སེམས་དབུས་སུ་བཅངས་ནས།།
གཡོ་སྒྱུའི་ཚིག་གིས་སྤྱི་ཚོགས་ནགས་ཀླུང་དེ་བསྲེགས་པའི།།
ཝ་སྐྱེས་མི་གཟུགས་འགའ་ཡི་བྱ་སྤྱོད་དེ་མཐོང་དུས།།
སྙིང་ནས་ཤ་ཚ་མི་སྐྱེས་རང་དབང་ཞིག་མི་འདུག།
པོད་ལྔའི་གཞུང་དོན་འཆད་པའི་ཡོན་ཏན་དེ་ཆེ་ཡང༌།།
སྐྱུར་དྲི་བྲོ་བའི་ཕྱོགས་དང་འཐེན་འཁྱེར་གྱི་འབར་རྫས།།
སེར་པོའི་གོས་ཀྱི་འོག་ཏུ་སྐུང་བ་དེ་མཐོང་དུས།།
མ་བཅོས་སེམས་ཀྱི་དད་པར་ཆག་གྲུམ་ཞིག་ཤོར་སོང༌།།
མཁའ་ནས་ཉི་མའི་འོད་ཟེར་ཕྱོགས་ཡོངས་ལ་འཕྲོ་དུས། །
ལག་པའི་སྦར་མོ་ཟུང་གིས་བཀབ་ཐབས་ཤིག་བྲལ་བས། །
མི་དགའ་ཕྱོགས་སུ་ལྷུང་བའི་འབྱུང་པོ་ཡི་བྱ་ཚོགས། །
མུན་པའི་ཁོང་བུར་འཇུག་ལས་ཐབས་གཞན་ཞིག་མི་འདུག །
ཕྱོགས་ལྷུང་འཐེན་འཁྱེར་ནག་པོའི་དུད་སྤྲིན་གྱི་འོག་ནས། །
ཕ་རོལ་རྒོལ་བར་བརྩམ་པའི་ཕྲག་དོག་གི་བློ་ཡིས། །
རྒྱུད་ཀྱི་སེམས་ཁམས་གཏིང་ནས་དཀྲུགས་པ་དེ་མཐོང་དུས། །
དངོས་གནས་སྙིང་རྗེ་མ་སྐྱེས་ཀ་མེད་ཅིག་རེད་འདུག །
མི་ལྤགས་མཐུག་པོ་གྱོན་པའི་ཁྲི་རྒན་འགའི་རྗེས་སུ། །
མི་ཤེས་སྲང་ལམ་གསེབ་ཀྱི་ཁྱི་ལྡོམ་གྱི་ཁྱུ་ཚོགས། །
གཅིག་རྗེས་གཉིས་སུ་མཐུན་ནས་ངུ་ཟུག་དེ་བྱས་དུས། །
དངོས་གནས་སེམས་ཀྱི་གཏིང་ནས་དགད་མོ་ཞིག་བྲོ་སོང༌། །
མདོ་དབུས་ཁམས་གསུམ་ཟེར་བའི་ཆོལ་ཁ་ཡི་ཞེན་ཁོག །
ས་དགེ་བཀའ་སྙིང་ཟེར་ནས་ཆོས་ལུགས་ཀྱི་འཐེན་འཁྱེར། །
བོད་ཁམས་སིལ་བུར་གཏོར་བའི་མི་མངོན་པའི་འབར་རྫས། །
ནམ་ཡང་སྤར་ར་མ་མཛོད་སྙིང་ཉེ་ཡི་སྤུན་ཟླ། །
རླུང་འཚུབ་དྲག་པོའི་ཁྲོད་ཀྱི་མར་མེ་བཞིན་གནས་པའི། །
ངོ་ཚོ་ཚང་མའི་ཕ་ཡུལ་བོད་ལྗོངས་ཀྱི་ཞིང་ཁམས། །
རྒྱ་དམར་ཀླ་ཀློའི་ཁ་ནས་སྲུང་སྐྱོབ་ཀྱི་ཆེད་དུ། །
ཆོལ་གསུམ་བོད་རིགས་རྡོག་རྩ་གཅིག་སྒྲིལ་ཞིག་གནང་དང༌། །
རིགས་རྒྱུད་གཅིག་ལས་བྱུང་བའི་དྭངས་གཙང་གི་མི་རིགས། །
ཁ་ཟས་གཅིག་ལ་བརྟེན་པའི་རྩམ་པ་ཡིས་གསོ་ཕྲུག །
བླ་མ་གཅིག་གི་སློབ་མ་བོད་རིགས་ཀྱི་སྤུན་ཟླ། །
ཚང་མ་གཅིག་ཏུ་བསྒྲིལ་ནས་མདུན་བསྐྱོད་ཅིག་གནང་རོགས། །
༢༠༠༦ ༥ ༥ ཉིན་ཆུ་ཚོད་ ༨།༡༥ ཐོག་བློ་གླིང་ཕྱག་ཁང་དུ་བྲིས།
ལག་ཐོགས་ཁ་པར་གྱི་སྙན་ངག
དུས་རབས་གསར་པའི་སྒོ་ཆེན་ནང་དུ་བོད་མིའི་མགོ་བོ་གཞིས་ནས་བསྲིངས། །
ལྟ་སྤྱོད་རྙིང་པའི་བམ་པོ་ཕུད་ཅིང་དེང་རབས་ལྗ་མ་ལུས་ལ་བཀླུབས། །
དཔལ་དང་འབྱོར་བའི་ཚོང་གི་བྲེལ་བས་ལུས་སེམས་གཉིས་ཀ་ཁོམ་པ་མེད། །
གངས་ཅན་བོད་ཀྱི་འགྱུར་འགྲོས་བསམ་ནས་བསམ་གཞིགས་མུན་པའི་ཀློང་དུ་ལྷུང༌། །
ཏིར་ཏི་སྒྲ་དང་ཧ་ལོའི་འབོད་སྒྲས་དབེན་གནས་སྤྱི་ཚོགས་གཉིས་ལས་དཀྲོགས། །
སད་མ་ཐག་པའི་ཕྲུ་གུ་འགའ་རེ་ལག་ཐོག་ཁ་པར་ཅེར་ཏེ་གནས། །
ཐུན་སུམ་མཚན་མོའི་གཉིད་ཀྱི་ཞིང་དུ་མོ་བྷེལ་ཉོས་པའི་རྨི་ལམ་རྨིས། །
མོ་བྷེལ་ཆེད་དུ་ལུས་པོ་བཙོང་ཡང་ནོངས་འགྱོད་མེད་པའི་སྙིང་སྟོབས་ཆེ། །
གྲོས་ཚོགས་ནང་དུ་ཕེབས་པ་བཞིན་དུ་ཁ་པར་རྣ་རྩར་སྦྱར་བྱས་ཏེ། །
རང་སྣང་ཨ་སྔོན་དགུང་ལ་བཏེགས་བཞིན་གོམ་པའི་འདེགས་འཇོག་མྱུར་བ་འདི། །
ཡར་རྒྱས་མཚོ་རླབས་འཕྱོ་བ་ཡིན་ནམ་སྙིགས་ལྔའི་རླུང་དམར་འཚུབ་པ་ཡིན། །
སྨྱུག་རྩལ་སྒེག་མོར་དམ་དུ་འཁྱུད་ནས་བསམ་གཞིགས་མ་བྱེད་ཀ་མེད་བྱུང༌། །
ཉམ་ཐག་ཟློས་གར་འཁྲབ་སྟོན་འོག་ནས་མགོ་སེར་སྦྱིན་བདག་མང་བ་འམ། །
ང་ན་ཁོ་ཤི་སྐྱབས་འཇུག་ཞུས་པའི་སྐུ་འགྱེད་མང་བས་ཡིན་ཡང་སྲིད། །
སྒྲ་ལོ་རིང་པོ་གྲི་ཡིས་བཏུབ་པའི་མགོ་རིལ་བྲེལ་ཅན་མང་པོ་ཡིས། །
ལག་ཐོགས་ཁ་པར་བསྟན་པ་སྤེལ་བའི་རྣམ་དཀར་མཛད་འཕྲིན་སྔར་ལས་ཆེ། །
ཞབས་ལ་ཀོ་བའི་ལྷམ་གོ་མེད་ན་མི་ཚོགས་གསེབ་ཏུ་འགྲོ་ཐབས་བྲལ། །
ལག་ཏུ་མོ་བྷེལ་ཁྱེར་རྒྱུ་མེད་ན་མི་དང་སྐད་ཆ་བཤད་ཐབས་བྲལ། །
ཨམ་ཕྲག་ནང་དུ་པད་ཤག་མེད་ན་མི་དང་གྲོགས་པོ་བྱེད་ཐབས་བྲལ། །
ཅི་ཡང་མེད་པའི་ཉམ་ཆུང་ང་འདྲ་འཇིག་རྟེན་འདི་ན་འཚོ་ཐབས་བྲལ། །
༢༠༠༦ ༥ ༡༥ ཉིན་རང་ཤག་ཏུ་བྲིས།
ཟ་ཁང་རྙིང་པའི་སྙན་དངགས།
ལྷང་ལྷང་སྒྲོག་པའི་ཆོས་ཀྱི་སྒྲ་དབྱངས་རྣ་བའི་བུ་གར་མངོན་པར་འཇེབས། །
རྣམ་དག་དམ་ཚིག་མཐུན་ལམ་གཙང་མར་དད་པའི་འོག་ཞགས་མཐའ་ནས་འཁྱུད། །
མཚན་སྙན་གྲགས་པས་གནམ་ས་དབྲལ་བའི་ཆོས་སྡེ་ཆེན་མོ་འབྲས་དཀར་སྤུངས། །
འཛམ་གླིང་སྤྱི་དང་གངས་ཅན་བོད་ཀྱི་བསྟན་པའི་མཛེས་རྒྱན་ཅི་ཡང་ཆེ། །
ས་དང་ཕྱོགས་ཀྱི་གནས་བབ་དབང་གིས་གྲྭ་ཚང་ཤར་དང་ནུབ་ཅེས་པའི། །
ཐ་སྙད་ཙམ་ལས་དམ་ཚིག་འོ་ཆུ་དབྱེར་མེད་གཅིག་ཏུ་འདྲེས་གྱུར་པའི། །
སྒོ་བློ་གཉིས་ཞེས་གཟུར་གནས་ཀུན་གྱིས་བསྟོད་པའི་རོལ་དབྱངས་འཁྲོལ་བའི་ཡུལ།།
ཆོས་སྡེ་འདི་འདྲ་མཇལ་བ་འདི་ཡང་ཚེ་རབས་འབུམ་གྱི་འབྲས་བུ་ཞིག །
ཆོས་སྡེ་འདི་དང་ན་ཚོད་མཉམ་པའི་བློ་གསལ་གླིང་གི་ཟ་ཁང་འདི། །
གྲྭ་རྐྱང་སྟོང་གིས་ཟས་ལ་རོལ་བའི་གསོལ་མགྲོན་ཁང་པ་དང་པོ་སྟེ། །
ད་ཆ་གཡས་གཡོན་ཕྱོགས་བརྒྱ་ཀུན་ཏུ་ཟ་ཁང་མང་པོ་བརྒྱབས་ཟིན་པས། །
གསོལ་ཁང་འདི་ལ་ཟ་ཁང་རྙིང་པའི་མི་སྙན་བླ་དྭགས་རིམ་གྱིས་ཐོགས། །
དབེན་གནས་འབྲས་སྤུངས་དགོན་ཆེན་འདི་ན་ཟང་ཟིང་སྤྲོས་པ་ཆེར་མེད་པས། །
ཟ་ཁང་འདི་ཡང་རྒྱས་སྤྲོས་གསར་གཏོད་འགྱུར་བའི་རྣམ་པ་ཅི་ཡང་མེད། །
འོན་ཏེ་གདན་སའི་གྲྭ་རྐྱང་ཐམས་ཅད་ཟ་ཁང་རྙིང་པའི་སྤྱིལ་བུ་འདིར། །
ལྷན་དུ་འདུས་ནས་ཟས་ལ་རོལ་བའི་མི་ཚོགས་འཚང་ཁ་སྔར་ལས་རྒོད། །
དེང་རབས་ཤེས་བྱའི་ལུས་སྟོབས་རྫོགས་པའི་སློབ་གྲྭའི་སློབ་མ་བརྒྱ་ཕྲག་དང༌། །
ལུང་དང་རིགས་པས་སེམས་ཁམས་བཟི་བའི་སྟོང་ཕྲག་མང་པོའི་དཔེ་ཆ་བ། །
གྲྭ་རྐྱང་ཡོད་ཚད་ལྷན་དུ་འདུས་ནས་སྐྱིད་པའི་དགོད་སྒྲ་གྱེར་བའི་གནས། །
ཟ་ཁང་རྙིང་པའི་སྤྱིལ་བུ་འདི་ན་སྙན་གཏམ་སྒྲོག་པའི་གྲྭ་རྐྱང་མང༌། །
བདེ་སྐྱིད་འབུམ་གྱིས་སེམས་ཁམས་མྱོས་པའི་གྲྭ་རྐྱང་ལོ་གཞོན་འདི་དག་དང༌། །
ལྷན་དུ་འཛོམས་ནས་སྒོར་མ་གཅིག་ཅན་གསོལ་ཇ་ཤེལ་ཕོར་གང་འཇུས་ཏེ། །
ཆོབ་གཏམ་འདྲ་མིན་བཤད་རེས་བྱས་པས་སེམས་སྡུག་ཡོད་ཚད་རླུང་གིས་ཁྱེར། །
ཟ་ཁང་རྙིང་པའི་སྤྱིལ་བུའི་ནང་དུ་གྲྭ་རྐྱང་འཚོ་བ་ཧ་ཅང་དྲོ། །
རོ་དྲུག་འདུས་པའི་ཟས་རིགས་མང་ཞིང་ཟས་ཀྱི་རིན་གོང་ཧ་ཅང་ཆུང༌། །
ཟ་ཁང་ཆེན་པོའི་ཡོ་བྱད་མེད་ཀྱང་ནང་གི་ཁང་པ་ཧ་ཅང་དྭངས། །
ཚོང་དཔོན་རྒྱགས་པ་ཡོང་མཁན་མེད་ཀྱང་གྲྭ་རྐྱང་སྟོང་ཕྲག་འཚང་ཁ་རྒོད། །
ཟ་ཁང་རྙིང་པའི་སྤྱིལ་བུའི་ནང་གི་འཆལ་གཏམ་རོལ་མོ་ཧ་ཅང་སྙན། །
དཔལ་འབྱོར་ཟིང་ཆས་གནས་ས་བསྒུལ་བའི་དུས་རབས་གསར་པའི་འཇིག་རྟེན་འདིར།
དཔལ་ལྡན་ལྷ་མོའི་འཕྲིན་ལས་ཡིན་ནམ་ནོར་ལྷའི་བགའ་ཆད་ཡིན་ཡང་སྲིད། །
ས་མཐའི་གྲྭ་རྐྱང་ཉམ་ཆུང་ཁོ་བོ་འབྱོར་པས་ཤིན་ཏུ་ཕོངས་གྱུར་ཀྱང༌། །
གྲྭ་རྐྱང་ང་ཡི་སེམས་ཁམས་ཆུང་ཆུང་བདེ་སྐྱིད་ཁོ་ནས་གང་སྟེ་ཡོད། །
༢༠༠༦ ༦ ༢ ཉིན།
འཚམས་འཕྲིན་སེམས་ཀྱི་རང་མདངས།།
ངའི་སྨྱུག་གྲོགས་གོང་དཀར་ངག་རྣམ་ལགས་སུ་ཕུལ་བ།
གང་ཁྱེད་བཞིན་གྱི་དཀྱིལ་འཁོར་མཇལ་འདོད་ཀྱང༌།།
ཡུལ་དུས་ངོ་བོ་གསུམ་གྱིས་ཤིན་ཏུ་བསྐལ།།
དེ་ལྟར་ན་ཡང་མཛའ་བརྩེའི་གསེར་གྱི་ཐག།
ནམ་ཡང་ལྷོད་ཐབས་མི་འདུག་གྲོགས་པོ་ལགས༌།།
གནའ་དེང་ཤེས་བྱ་རིག་པའི་གཞུང་ལུགས་ལ།།
འཆད་རྩོད་རྩོམ་གྱི་མཛད་འཕྲིན་བྲེལ་བའི་གསེང༌།།
ཇ་ཡུན་ཙམ་གྱི་དུས་ཤིག་རྙེད་གྱུར་ན།།
འཕྲིན་འདི་གཟིགས་ཙམ་གནང་རོགས་གྲོགས་པོ་ལགས།།
མཚན་མོར་སྤྲང་ཁྱི་རྒན་པོའི་ངུ་རྒྱངས་དང༌།།
དགོང་དྲོར་དུག་སྦྲང་ནག་པོའི་འཕུར་ལྡིང་དང༌།།
ཉིན་གུང་སྒྲིག་ལམ་བཙན་པོའི་གཉའ་ཤིང་འོག།
ཟུངས་ཁྲག་དམར་པོ་ཟད་ལ་ཉེ་བ་ཡི།།
ལྷོ་མཐའི་ཡུལ་གྱི་བན་ཆུང་ཁོ་བོ་ཡིས།།
དགའ་སྐྱོ་བསྣོལ་མར་འཐབ་པའི་ཧྲག་བར་ནས༌།།
མི་མངོན་སེམས་ཀྱི་སྙིང་གཏམ་ཛ་ཛོར་འགའ།།
འདི་ན་སྐྱུག་པའི་ཟོལ་གྱིས་ལུད་ནས་ཐལ།།
ཉི་གཞོན་དམར་པོ་དལ་གྱིས་ནུབ་ཏུ་བཞུད།།
བསིལ་རླུང་འཇམ་པོས་གཟན་ཤམས་རླུང་གིས་བསྐྱོད།།
ཐོག་ཏུ་བུད་ནས་འདྲ་མིན་བསམ་གཞིགས་ཁྲོད།།
གང་ཁྱེད་དྲན་པས་སེམས་ཁམས་ཡོངས་སུ་བསྡམས།།
ཤག་ཏུ་ཡོང་ནས་མདུན་འཇོག་སྒྲོན་མེ་སྤར།།
མཛུབ་གནོན་འཕྲུལ་འཁོར་གློག་སྒོ་དལ་གྱིས་ཕྱེས།།
ཚོར་ཀློང་རྦ་རླབས་དྲག་ཏུ་འཁྲུག་པའི་ཁྲོད།།
ཀྱག་ཀྱོག་ཡིག་རྙོག་འདི་དག་བྲིས་ལ་ཤོར།།
ཉེ་ལམ་ཟླ་ཤས་རིང་ལ་རྩོམ་སྒྲིག་དང༌།།
འགྲེམས་སྤེལ་སོགས་ཀྱི་ལས་དོན་འདྲ་མིན་ནང༌།།
ལག་པ་འཆང་ཙམ་འཆང་ཙམ་བགྱིས་ཁུལ་གྱིས།།
ཁྱེད་ལ་འཕྲིན་ཡིག་ཙམ་ཡང་བཏང་མ་ཐུབ།།
དེ་ལུགས་གང་ཁྱེད་ཐུགས་ཀྱི་ཀློང་ཡངས་སུ།།
དགོངས་བཞེས་ཅིས་ཀྱང་གནང་བར་མཛོད་ཅིག་གྲོགས།།
ཉམ་ཆུང་ང་ཡིས་རྒྱུན་དུ་སྨྱུག་རྩེ་ནས།།
གང་ཁྱེད་དྲན་པའི་སྣག་ཚ་སྐམ་མ་མྱོང༌།།
མི་ཡི་ལུས་ཤིག་བདག་གིས་རྙེད་གྱུར་ཀྱང༌།།
མི་ཁོམ་བརྒྱད་ཀྱི་འོབས་སུ་ལྷུང་གྱུར་ནས།།
མི་དགོས་ལས་དོན་འདྲ་མིན་སྒྲུབ་ཁུལ་གྱིས།།
མི་ཚེ་དོན་མེད་རྫོགས་འདི་ཡིད་རེ་ཕངས།།
དེ་ལྟར་ན་ཡང་ཆུང་ཆུང་བྱིས་དུས་ནས།།
ངུར་སྨྲིག་གོས་ཀྱིས་བཏུམས་ཏེ་ཤེས་བྱའི་གནས།།
སྦྱོང་བའི་ཁུལ་གྱིས་ཕོ་ལོ་ཉེར་གསུམ་ལ།།
ཟིན་པ་ཡིན་སྙམ་སྤོབས་པས་སེམས་ཁམས་བཏེགས།།
སློབ་གྲྭར་འགྲིམས་ནས་དབྱིན་བོད་ཧིན་གསུམ་བསླབས།།
ཆོས་གྲྭར་འགྲིམས་ནས་གཞུང་ཆེན་འབད་པས་སྦྱངས།།
ལས་ཁུངས་འགྲིམས་ནས་གྲྭ་ཚང་ཞབས་ཞུ་སྒྲུབ།།
གང་སར་འགྲིམས་ནས་ཀུན་ལ་ཇུས་གཏོགས་བྱས།།
ཕོ་ལོ་ཉེར་ཤུ་ཙམ་གྱི་དུས་ཡུན་ནང༌།།
མཐོ་དམན་ཀུན་གྱི་ལྷམ་གྱི་རྡོག་པའི་འོག།
ས་འབུ་ལྷན་དུ་ཤེས་བྱ་ཉུང་ཤས་ལ།།
སློབ་པའི་ཁུལ་གྱིས་མི་ཚེ་ཟད་ནས་ཐལ།།
མི་ཚེ་ལྷག་མ་ཅུང་ཙམ་ཡོད་གྱུར་ན།།
ཤེས་བྱ་རིག་པའི་གནས་ལ་སློབ་བྱས་ནས།།
ཐོས་བསམ་སྒོམ་པའི་ལག་རྗེས་མེད་ན་ཡང༌།།
འཆད་རྩོད་རྩོམ་གྱི་རྒྱལ་མཚན་འཛུགས་དགོས་སྙམ།།
བེ་རི་སྨྱོན་ཕྲུག་ཅེས་བྱའི་དྭ་ཕྲུག་བུ།།
ཀུན་གྱི་བརྙས་བཅོས་བྱ་སའི་ཉམ་ཆུང་གང༌།།
ནམ་ཞིག་ཕུགས་འདུན་མངོན་དུ་གྱུར་བ་ན།།
ཀུན་གྱི་རྣ་བར་ཀི་སྒྲ་གཏབ་དགོས་སྙམ།།
མཚམས་རེར་བརྙས་བཅོས་སེམས་ཀྱིས་མ་བཟོད་ནས།།
ཆིག་ལབ་རྒྱབ་ཞོར་མགོ་བོ་རུམ་དུ་བཅུག།
མིག་ཆུའི་ཐིགས་པས་ཉིན་ཐོ་འབྲི་དེབ་ཀྱང༌།།
ངུ་ནས་རླན་པར་གྱུར་བ་ཉུང་ཉུང་མིན།།
གང་ཁྱེད་སྐུ་ཡི་ཆ་ཤས་ཡོངས་རྫོགས་ཤིང༌།།
མཛད་པའི་རླབས་ཕྲེང་གཡོ་བཞིན་བཞུགས་ཡོད་ཤག།
ཆོས་སྲིད་ཟུང་གི་རིག་པའི་གཞུང་ལུགས་ལ།།
འཆད་རྩོད་རྩོམ་གྱི་བྲེལ་བས་བཞུགས་ཡོད་ཤག།
འབའ་བ་ཡེ་ཤེས་དགའ་བའི་ངག་ལམ་ནས།།
གང་ཁྱེད་བཞིན་གྱི་མཛེས་སྡུག་རྣམ་པ་ཡིས།།
དེ་གར་སྨན་ཤར་ཀུན་གྱི་ཡིད་སེམས་ཀུན།།
ཅིག་ཅར་འཕྲོག་ཅེས་ཐོས་འདི་དངོས་ལགས་སམ།།
གང་ཁྱེད་རྡ་སའི་སྲང་ལམ་འགྲིམས་པ་ན།།
བུ་མོ་ཀུན་གྱིས་གང་ལ་ཟུར་མིག་གི།
མདའ་མོ་ཡང་ཡང་འཕངས་ཀྱང་གང་ཉིད་ཀྱིས།།
ཀུན་ལ་སྣང་མེད་བཞག་པ་བདེན་ལགས་སམ།
ཕོ་ཡི་མིག་ལ་བུ་མོའི་སྐུ་གཟུགས་དང༌།།
བུ་མོའི་མིག་ལ་བུ་ཡི་ལུས་པོ་གཉིས།།
གཟུགས་ཀྱི་ནང་ནས་མཆོག་ཅེས་རྒྱལ་བ་ཡི།།
གསུང་འདི་བདེན་པ་ལོས་ཡིན་གྲོགས་པོ་ལགས།།
གཟུགས་མཆོག་མིག་གིས་རྒྱང་ནས་མཇལ་ཙམ་དང༌།།
སྒྲ་མཆོག་ཁ་པར་རྒྱུད་ནས་ཐོས་ཙམ་ལས།།
རེག་མཆོག་ལོངས་སུ་སྤྱོད་སྐལ་མེད་སྙམ་ནས།།
མཚམས་རེར་འགྱོད་པའི་མེ་རླབས་མཁའ་ལ་འཕྱུར།།
ལྐོག་ཏུ་གྱུར་པའི་ཕྱི་མའི་དག་ཞིང་དང༌།།
མུན་ནག་ནང་གི་ཐར་བའི་ཞིང་ཁམས་གཉིས།།
ཡོད་ན་ངེད་ཅག་ཁེ་བཟང་ཆེ་ན་ཡང༌།།
མེད་ཚེ་རང་ཅག་སྡུག་གྱོང་དགུ་བརྩེགས་ཤིག།
དེ་ལྟར་བསམ་བཞིན་མི་ཚེ་དལ་གྱིས་ཟད།།
རྙོག་འཛིང་ཆེ་བའི་མདུན་ལམ་འདི་རྒྱུད་ནས།།
རབ་རིབ་མ་འོངས་ཕུགས་བསམ་འགྲུབ་གྱུར་ན།།
དྲོད་འཇམ་ལྡན་པའི་དབུགས་ཤིག་གཏོང་ན་འདོད།།
གང་ཁྱེད་དེ་ན་ཕྱི་ནང་རིག་པའི་གནས།།
ཚངས་སྤྱོད་རིག་པའི་གྲོགས་པོ་རྣམས་དང་ལྷན།།
སློབ་པའི་སྐལ་བཟང་ཐོབ་པས་སྐྱིད་པ་ལ།།
སྔར་བཞིན་འབད་པས་སྦྱོངས་ཤིག་གྲོགས་པོ་ལགས།།
དཔལ་ལྡན་ཚངས་སྲས་དགྱེས་པའི་བློ་གྲོས་དང༌།།
ལྡན་པའི་ཉམ་ཆུང་བེ་རི་སྨྱོན་ཕྲུག་ཅེས།།
རྣམ་དཔྱོད་བློ་ཡིས་ཕྱི་ནང་རིག་གནས་ཀྱི།།
རྒྱལ་ཁམས་ཉུལ་བ་གང་དེས་སྤྲིངས་བ་འོ།།
༢༠༠༩།༡༡༨ཉིན་རང་ཤག་ཏུ།
སེམས་ཁོང་གི་ཟུག་གཟེར།
གྲྭ་རྐྱང་ང་ལ་མི་ཡུལ་ས་མཐའ་འདིར། །
གཉེན་ཉེ་སྤུན་དང་བློ་མཐུན་གྲོགས་མེད་པས། །
སེམས་ཀྱི་ཟུག་གཟེར་འབར་བའི་སྙིང་གཏམ་ཞིག །
མཁའ་དབྱིངས་ཟླ་བ་ཁྱེད་ལ་བཤད་ན་བསམ། །
འཇིག་རྟེན་འདི་ན་ཁུ་སིམ་སིམ་གྱིས་སླེབས། །
གཞོན་ནུའི་དུས་བཟང་ཁུ་སིམ་སིམ་གྱིས་རྫོགས། །
ཡོད་ཚད་ཁུ་སིམ་སིམ་གྱིས་འདས་གྱུར་ན། །
ཕོ་རྒོད་གཅིག་གི་མི་ཚེ་ཨ་ཡིན་སྙམ། །
འདི་ལྟར་བསམ་པའི་དྲན་འགྱུ་རྒོད་ན་ཡང༌། །
སྐམ་ལ་རིད་པའི་སོ་སོའི་གཟུགས་པོ་འདི། །
རང་གི་རྐང་པ་ཟུང་གིས་མ་ཐེག་ནས། །
ཕན་ཚུན་འཁྱོར་ལ་ཉེ་འདི་ཡིད་རེ་སྐྱོ། །
ཤུར་ཤུར་དབུགས་ཀྱི་རྒྱུ་བ་རེ་རེའི་ལྷན། །
རང་རྒྱལ་གཡང་ལས་སྐྱོབ་པའི་སྙིང་སྟོབས་ཤིག །
འོན་ཏེ་མདུན་བསྐྱོད་རྐང་ལམ་རེ་རེ་ན། །
མི་མངོན་མཆེ་སྡེར་བགྲད་པའི་ཇག་ཚོགས་འབུམ། །
ཁྱེད་ཀྱིས་ཕ་མའི་དྲིན་ན་འཇལ་དགོས་ཟེར། །
ཁྱེད་ཀྱིས་སྐྱེས་བབ་འོས་འགན་སྒྲུབ་དགོས་ཟེར། །
ཁྱེད་ཀྱིས་རང་མགོ་རང་གིས་ཐོན་དགོས་ཟེར། །
རྡོག་ཁྲིས་ལྕི་བོ་རང་གི་ཕྲག་ཏུ་ལྷུང༌། །
འཇིག་རྟེན་འདི་ན་དགོས་པའི་ནོར་གཉིས་ཏེ། །
ཤེས་ཡོན་དང་ནི་དཔལ་དང་འབྱོར་བའི་ཚོགས། །
གང་ལ་མེད་པའི་ཉམ་ཆུང་ང་འདྲ་ཡིས། །
འོས་འགན་དེ་དག་ཇི་ལྟར་སྒྲུབ་དགོས་སྙམ། །
ཕ་མར་དྲིན་ལན་མ་འཇལ་འདྲེ་ཕྲུག་ཟེར། །
སྐྱེས་བབ་འོས་འགན་མ་སྒྲུབ་ལོག་སྤྱོད་ཟེར། །
རང་མགོ་རང་གིས་མ་ཐོན་སྐྱག་ཕྲུག་ཟེར། །
དེ་ཚོ་གསུམ་ག་ང་ཡི་མིང་དུ་འབོད། །
ཕྱི་མར་རྐང་རྗེས་ཡོད་པའི་མི་ཚེ་ཞིག །
ང་ཡིས་བསྐྱལ་དགོས་དྲན་པའི་སྤོབས་པ་ཡོད། །
འོན་ཏེ་ཀུན་གྱི་ལྷམ་གྱི་རྡོག་པའི་འོག །
གྲོགས་མའི་ཚེ་དང་འདྲ་བར་ལུས་འདི་སྐྱོ། །
གསུངས་དང་རྒྱང་རིང་གྲོགས་པོ་ཟླ་བ་ལགས། །
ང་ཡི་མི་ཚེ་འདི་ཡི་མཐའ་མཇུག་ཏུ། །
འོད་སྟོང་ལྡན་པའི་ཉིན་བྱེད་གཞོན་ནུ་ཞིག །
བདག་ལ་སྒུག་བཞིན་ཡོད་པ་གཟིགས་ལགས་སམ། །
དུང་ཟླ་ཁྱེད་ཀྱང་སྐབས་ཤིག་ནག་ཕྱོགས་ཀྱིས། །
ཧམ་ཟོས་བྱས་ནས་མེད་པར་གྱུར་ལགས་ཀྱང༌། །
བར་སྐབས་ཤིག་ནས་མཛེས་པའི་འོད་སྟོང་གིས། །
སྤྲས་ནས་སླར་ཡང་འཁྲུངས་པ་མ་ལགས་སམ། །
མུན་ནག་འཇིག་རྟེན་འདི་ནས་ཀྱག་ཀྱོག་གི། །
འཕྲང་ལམ་དོག་པོ་འདི་ཉིད་བརྒལ་བའི་མཐར། །
ཡངས་པའི་འཇིག་རྟེན་གསར་པའི་ཞིང་ཁམས་དེར། །
དྲོད་འཇམ་ལྡན་པའི་དབུགས་ཤིག་གཏོང་ན་བསམ། །
ཕམ་པ་རྒྱལ་ཁའི་གཞི་ཞེས་གསུངས་ལགས་ན། །
ཏན་ཏན་ཉིན་གཅིག་བེ་རི་སྨྱོན་ཕྲུག་ང༌། །
མུན་པའི་དྲ་རྒྱ་འདི་ལས་གྲོལ་འགྲོ་བའི། །
ཡིད་ཆེས་རེ་བ་མ་ཟད་གདེང་ཚོད་ཡོད། །
༢༠༠༧ ༢ ༢༨ ཉིན་རང་ཤག་ཏུ་ཉོབ་སྣང་ཆེན་པོ་ ཞིག་གི་སྐབས་སུ་བྲིས།
པད་ཤག་དང་སྤྲང་པོའི་མི་ཚེ།
ཀ་ར་ཀུ་ཤུའི་ཤིང་ཏོག་མངར་མོ་དང༌། །
ཁ་ལ་ཟ་རྒྱུའི་ཁ་ལག་ཞིམ་པོ་སོས། །
གང་ཞིག་གཞན་གྱི་ས་ནས་ཉོ་བའི་སྐབས། །
ང་ལ་པད་ཤག་མེད་དུས་ཡིད་རེ་སྐྱོ། །
ཅ་ཅོ་གཏམ་གྱི་ངོ་དགའ་སྤྲེལ་ལད་དང༌། །
ཆ་ལུགས་སྒེག་མོའི་འཆོར་འགྲོས་མི་ཤེས་པས། །
ཇ་ཞིག་འཐུང་བའི་དངུལ་གྱིས་མ་འདང་ནས། །
ཉ་ར་ཉོ་རེས་མི་ཚེ་རྫོགས་འདི་སྐྱོ། །
ཏ་ཐ་ག་དའི་གསུང་རབ་ཀློག་བྱས་ཏེ། །
ཐ་དག་སྡུག་བསྔལ་རྒྱུ་རུ་ཤེས་ན་ཡང༌། །
ད་ཆ་དངུལ་གྱིས་ཕུང་ནས་སྡོད་པའི་སྐབས། །
ན་ནིང་སྦྱངས་པའི་གཞུང་དོན་བརྗེད་ལ་ཁད། །
ཕ་ཕ་རྒན་པོའི་འབད་རྩོལ་ལས་གྲུབ་པའི། །
ཕ་གི་ལྕགས་སྒམ་ནང་གི་པད་ཤག་དེ། །
བན་རྒན་དེ་ཚོའི་ལྷན་དུ་འཁྱམས་ཉུལ་ཆེད། །
མ་རབས་ང་ཡིས་བེད་སྤྱོད་གཏང་མི་འདོད། །
ཙ་རི་སོགས་ལ་གཏན་གྱི་གནས་བཅའ་སྟེ། །
ཚ་གྲང་ཁྱད་གསོད་དཀའ་སྤྱོད་མི་ནུས་པས། །
ཛ་ར་ཛོ་རེའི་མི་ཚེ་མ་རྫོགས་གོང༌། །
ཝ་ལེར་པད་ཤག་དོན་དུ་འབད་ན་བཟང༌། །
ཞ་ལྟར་འཁྱོག་པའི་དེང་སང་གྲོགས་པོ་དག །
ཟ་རྒྱུ་མཐོང་དུས་མིག་མེད་གྲོག་མ་བཞིན། །
འ་ཅག་དངུལ་གྱིས་ཕུང་བའི་སྐབས་རྣམས་སུ། །
ཡ་རབས་དེ་ཚོ་བཙལ་ནའང་རྙེད་པར་དཀའ། །
ར་རྒན་ལྟ་བུའི་དུད་འགྲོ་ཕར་ཕུད་པའི། །
ལ་དང་ལུང་པ་གང་དུ་འགྲོ་ན་ཡང༌། །
ཤ་ཁྲག་ལུས་འདི་ཐལ་བར་མ་བསྒྱུར་བར། །
ས་སྟེང་འདི་ན་པད་ཤག་མེད་ཐབས་མེད། །
ཧ་ཧ་པད་ཤག་ཡོད་ན་སྐྱིད་པ་ལ། །
་ ཧ་ཅང་འབྱོར་པ་ཆེ་ན་དགའ་བ་ལ། །
ཨ་རི་འགྲོ་རྒྱུའི་གཉིད་ལམ་རྟག་ཏུ་རྨིས། །
ཨ་སྒོར་བསམ་བཞིན་བསམབཞིན་མི་ཚེ་རྫོགས། །
༢༠༠༥ ༩ ༨ ཉིན་དགག་དབྱེའི་སྐབས་པད་ཤག་རྫོགས་ནས་ རང་ཤག་ཏུ་ཛམ་བྷ་བྷ་ལ་གསོལ་བ་འདེབས་བཞིན་བེ་རི་དཔལ་ལྡན་རྣམ་རྒྱལ་ བས་ཐོལ་བྱུང་དུ་སུག་བྲིས་སུ་བགྱིས་པའོ།།
དཀར་སེར་དམར་ལྷང་གི་སྙན་དངགས།
དཀར་མཛེས་བདེ་བ་ཅན་ལ་སྐྱེ་བའི་ཆེད། །
སེར་པོའི་ལག་ཁྱེར་མྱུར་དུ་བཟོ་བའི་སླད། །
དམར་པོའི་ཚ་རླབས་འབར་བའི་ས་མཐའ་འདིར། །
ལྗང་ཁུའི་དེབ་ཀྱི་ཚོང་འབྲེལ་ཤིན་ཏུ་ཟབ། །
དཀར་གཙང་བདེ་བ་ཅན་གྱི་གསང་སྤྱོད་ནང༌། །
སེར་པོའི་གོས་བཟང་སྐུང་ནས་བྲེལ་འཚུབ་ངང༌། །
དམར་པོའི་པད་ཤག་གསོག་པའི་ངལ་དུབ་ཀྱིས། །
ལྗང་ལྗང་ལོ་འདབ་ཟད་པའི་སྙིང་སྟོབས་ཆེ། །
དཀར་མཛེས་དབྱིན་མོའི་བཞིན་རས་མཐོང་བ་ན། །
སེར་པོ་གསེར་བཟང་སྟོང་གིས་མི་ཁུག་པའི། །
དམར་པོའི་སེམས་ཀྱི་མི་མངོན་རིན་ཆེན་ནོར། །
ལྗང་ལྗང་ཐང་ལ་བསྐྱུར་བའི་གློ་ཁོག་ཆེ། །
དཀར་མཛེས་འོག་མིན་ཞིང་གི་ཚེ་གཡོག་དྲུང༌། །
སེར་པོའི་གསེར་སྦྲང་པད་མར་འཁོར་བ་བཞིན། །
དམར་པོའི་ཚ་བའི་ཡུལ་འདིར་མི་ཀུན་གྱིས། །
ལྗང་ཁུའི་ནེ་ཙོ་ཇི་བཞིན་སྙན་སྒྲོག་མཁས། །
དཀར་ནག་དབྱེ་མཚམས་མེད་པའི་འཇིག་རྟེན་འདིར། །
སེར་མོ་བ་ནས་བཟུང་སྟེ་བྱིས་པའི་བར། །
དམར་པོའི་པད་ཤག་ཁོ་ནའི་རྗེས་འགྲོ་ཕྱིར། །
ལྗང་ཁུའི་ཀླད་ཅན་ཁོ་བོ་ཡིད་རེ་མུག །
༢༠༠༦ ༤ ༦ ཉིན་ཕྱག་ཁང་དུ།
ཅི་ཡང་མེད་པའི་སྙན་དངགས།
སྐྱེས་པའི་དྲིན་ཆེན་ཕ་མ་ང་ལ་མེད། །
ཤ་ཁྲག་གཅིག་པའི་སྤུན་མཆེད་ང་ལ་མེད། །
ཚ་ཞང་ཨ་ཁུ་ཨ་སྲུ་ང་ལ་མེད། །
སྡུག་བསྔལ་ཀུན་འབྱུང་ཁྱིམ་ཚང་ང་ལ་མེད། །
ཆེན་པོའི་ཐོབ་དང་གོ་ས་ང་ལ་མེད། །
ཀུན་དགའ་དཔལ་དང་འབྱོར་བ་ང་ལ་མེད། །
རིགས་རྒྱུད་མཐོན་པའི་རྒྱབ་རྟེན་ང་ལ་མེད། །
འཛུམ་དཀར་སྟོན་པའི་གྲོགས་པོ་ང་ལ་མེད། །
ཡིད་འོང་ཟླ་བའི་བཞིན་རས་ང་ལ་མེད། །
འདོད་འཇོ་ལུས་ཀྱི་སྒེག་འགྲོས་ང་ལ་མེད། །
སྨྲ་མཁས་ངག་གི་སྒྱུ་སྩལ་ང་ལ་མེད། །
མཛེས་ལྡན་སྙིང་གི་དགའ་གྲོགས་ང་ལ་མེད། །
ལྕེ་དཔྱང་མགོ་འཕུར་སྤྲེལ་ལད་ང་ལ་མེད། །
བསླུ་བྲིད་ངག་གི་རྫུན་ཚིག་ང་ལ་མེད། །
གཞན་མགོ་བསྐོར་བའི་ཐབས་ཇུས་ང་ལ་མེད། །
མགོ་ནག་མི་ཡི་རྩི་མཐོང་ང་ལ་མེད། །
ཕྱི་ཡི་སྤྱོད་པ་བཟང་པོ་ང་ལ་མེད། །
ནང་གི་ཤེས་བྱ་ཡོན་ཏན་ང་ལ་མེད། །
ཕྱི་ནང་ཡོན་ཏན་སྣ་གཅིག་ང་ལ་མེད། །
མགོ་བོ་བཏེགས་ནས་འགྲོ་ས་ང་ལ་མེད། །
ཅི་ཡང་མེད་མཁན་ང་འདྲ་གང་ན་མེད། །
མེད་ཀྱང་མེད་པའི་འགྱོད་པ་ང་ལ་མེད། །
མེད་པས་ཡོད་པར་བྱེད་སྙམ་ང་ལ་མེད། །
མེད་དོ་མེད་དོ་ཡོད་ཚད་ང་ལ་མེད། །
བསླུ་མེད་ལས་དང་རྒྱུ་འབྲས་ཁྱེད་ལ་མེད། །
བདེན་པའི་ལམ་སྣེ་ཡངས་པོ་ཁྱེད་ལ་མེད། །
ངོ་ཚ་ཁྲེལ་དང་གཞུང་པ་ཁྱེད་ལ་མེད། །
སེམས་ཀྱི་ཡིད་ཆེས་མཛེས་མ་ཁྱེད་ལ་མེད། །
ལེགས་ཉེས་འབྱེད་པའི་མིག་ཟུང་ཁྱེད་ལ་མེད། །
མི་འགྱུར་ངང་རྒྱུད་རིང་པོ་ཁྱེད་ལ་མེད། །
སྲོག་དང་བསྡོས་པའི་བརྩེ་གདུང་ཁྱེད་ལ་མེད། །
ང་ཡི་དུང་སེམས་མཛེས་མ་ཁྱེད་ལ་མེད། །
བདེན་དང་རྫུན་པའི་མགོ་མཇུག་འདི་ན་མེད། །
ཡིད་གཞུངས་མགོ་ནག་མི་ཞིག་འདི་ན་མེད། །
ལས་འབྲས་དྲང་གཏམ་སྒྲོག་ས་འདི་ན་མེད། །
འཇིག་རྟེན་འདིའི་ནང་བསྡད་འདོད་ང་ལ་མེད། །
༢༠༠༦ ༡ ༡༦ ཉིན་ཨ་མ་ར་བ་ཏི་འགྲེམས་སྟོན་ཁང་གི་མེ་ཏོག་ལྡུམ་ རའི་ནང་བྲིས།
མཐོང་ཆུང་མ་གནང་རོགས།
ངའི་ཉེ་འཁོར་གྱི་མི་ཚོར་རེ་སྐུལ་ཞུས་པ།
ཕྱི་ཡི་གྱོན་ཆས་སྐྱ་ཞིང་ཧྲུལ་གྱུར་ན། །
སྤྱང་ཁྱི་རྒན་པོ་ཡིས་ཀྱང་སྡང་ཡོང་ཞེས། །
འཇིག་རྟེན་རྒན་པོའི་ཉམས་མྱོང་སྡོམ་ཚིག་འདིར། །
ཡིད་འཆེས་རྙེད་པའི་བདེན་ཁ་གཞིས་ནས་ཐོབ། །
མགོ་མཇུག་མེད་ཅིང་ལེགས་ཉེས་མི་ཤེས་པའི། །
དུས་རབས་གསར་པའི་སྤྱི་ཚོགས་འདི་ཡི་ཁྲོད། །
ཉམ་ཆུང་མི་ལ་མཐོང་ཆུང་ཁྱད་གསོད་དང༌། །
སྤྲང་བོའི་བུ་ལ་མྱི་ཁ་སྟོང་དུ་རྒོད། །
ཉམ་ཆུང་ཟོལ་གྱིས་ག་ལེར་བསྐྱོད་པ་ན༌། །
ཟོག་པོ་ཞེས་ཏེ་ཀུན་གྱིས་བཤུང་ཚིག་འཕང༌། །
ཉམ་ཆུང་སྤྱོད་པས་ཁྱེད་ལ་ཅི་གནོད་ལགས། །
སྤྲང་བོའི་བུ་ལ་མཐོང་ཆུང་མ་གནང་རོགས། །
ཕོར་བ་འཁྱེར་ནས་ལྟོ་ཞིག་སློང་བ་ན། །
ཟས་ཀྱི་ཚབ་ཏུ་གཤེ་གཤེ་མང་དུ་གནང༌། །
རྐུ་ལས་སློང་བའི་བྱ་བ་མི་ལེགས་སམ། །
སྤྲང་བོའི་བུ་ལ་མཐོང་ཆུང་མ་གནང་རོགས། །
ཕན་པའི་སེམས་ཀྱིས་རོགས་ཤིག་བྱེད་ཙ་ན། །
དྲིན་ལ་དྲིན་དུ་མ་གོ་ཁྲལ་རྒོད་བྱེད། །
ང་ཡི་ཕན་སེམས་ངན་སེམས་ཡིན་ལགས་སམ། །
སྤྲང་བོའི་བུ་ལ་མཐོང་ཆུང་མ་གནང་རོགས། །
རང་དགོས་སློབ་གཉེར་འབད་པས་བྱེད་པ་ན། །
ཕྲག་དོག་གིས་མྱོས་གནོད་སེམས་ཁོག་ཏུ་བཅངས། །
ང་ཡི་སློབ་གསོས་ཁྱེད་ལ་ཅི་གནོད་ལགས། །
སྤྲང་བོའི་བུ་ལ་མཐོང་ཆུང་མ་གནང་རོགས། །
དཔལ་འབྱོར་མེད་པས་ཀུན་གྱིས་རྡོག་པས་རྫིས། །
གཉེན་སྤུན་མེད་པས་ཀུན་གྱིས་ཟུར་དུ་ཕུད། །
རྒྱབ་རྩ་མེད་པས་ཀུན་གྱིས་མཆིལ་ཞགས་འཕངས། །
སྤྲང་བོའི་མི་ཚེ་འདི་ལྟར་འཁྱོལ་བར་དཀའ། །
དེ་ལྟར་སྤྲང་བོ་དང་ནི་ཉམ་ཆུང་ལ། །
ཀུན་གྱིས་བརྙས་ཤིང་མཐོང་ཆུང་བྱེད་པ་འདི། །
འཇིག་རྟེན་འདི་ཡི་ཆོས་ཉིད་ཡིན་ལགས་ན། །
མགོ་བོ་སྒུར་ཏེ་མི་བཟེད་ཀ་མེད་ལགས། །
འོན་ཏེ་ནམ་ཞིག་བེ་རི་སྨྱོན་ཕྲུག་ངའི། །
ཕུགས་མདུན་བཟང་བོ་མངོན་དུ་གྱུར་བ་ན། །
ཁྱེད་ཆག་ང་ལ་གཟིགས་མོ་མཛོད་ཅིག་དང༌། །
འོད་སྟོང་འབར་བའི་ཉི་མ་མཐོང་བར་ངེས། །
དེ་སྐབས་ཁྱེད་ཅག་སླར་ཡང་ཁོ་བ་ལ། །
བརྙས་བཅོས་མཐོང་ཆུང་གནང་བར་མཛོད་ཅིག་དང༌། །
ཁོ་བོས་ཕྱིར་བལྟས་སློག་བཞིན་ཁྱེད་ཅག་གི །
རྣ་བར་གད་པའི་ཁྲལ་རྒོད་ལན་གཅིག་བྱེད། །
༢༠༠༨ ༡༡ ༢༨ ཉིན་དགའ་ཤར་ལྷོ་པ་ཁང་ཚན་གྱིས་ཡང་སྟེང་དུ་
གནས་ཚུལ་དུ་མ་ཞིག་གི་རྐྱེན་བྱས་ཏེ་ཤར་མར་སྤེལ།
རྟ་ལས་ལྷུང་ཡང་ས་ལ་རྡབ་མ་མྱོང༌།
༢༠༠༧ ལོ་འཁོར་རྒྱུགས་སྤྲོད་ཆེན་མོའི་གྲུབ་འབྲས་གསལ་བསྒྲགས་བྱས་རྗེས།།
ན་ནིང་ཁོ་བོའི་ཡབ་ཆེན་དམ་པ་སྙུང་གཞི་དྲག་པས་མནར་བའི་རྐྱེན།
བདག་ཀྱང་སྨན་ཁང་འདྲ་མིན་ནང་དུ་ཟླ་བ་ཁ་ཤས་སྡོད་པའི་རིང༌།།
ལོ་འཁོར་རྒྱུགས་སྤྲོད་མཉམ་དུ་འཁེལ་བས་ཨ་ཕའི་ནད་གཡོག་རྒྱུག་ཞོར་དུ།།
སྔོན་གྱི་གྲ་སྒྲིག་གང་ཡང་མེད་པར་ཡིག་རྒྱུག་ཚང་མ་བཏང་ཁུལ་བྱས།།
འོན་ཏེ་ལོ་འཁོར་སྔོན་མ་བཞིན་དུ་རྩེ་ཕུད་བྱ་དགའ་མ་ཐོབ་པས།།
ལ་ལ་ཕྲག་དོག་དུག་གིས་སྨྱོས་ནས་སྨོད་ཚིག་ལྐོག་མདའ་ཕྲེད་ནས་འཕངས།།
ལ་ལས་ཤ་ཚ་ཡིན་པའི་ཟོལ་གྱིས་ཨ་ཁ་ཁ་ཞེས་རྒྱུན་དུ་གླེང༌།།
ལ་ལ་སྙིང་ནད་སེལ་སོང་སྙམ་ནས་སྙིང་གི་དགོད་སྒྲ་གྱེར་འདུག་སྙམ།།
སྔོན་ནས་ད་བར་རྩེ་སོན་བྱ་དགའ་མི་ལྕོགས་པ་ཞིག་ཐོབ་མྱོང་ཡང༌།།
ཡིད་སེམས་སྤྲོ་བའི་དམིགས་བསལ་ཚོར་བ་ཅི་ཡང་བདག་ལ་བྱུང་མྱོང་མེད།།
འོན་ཏེ་ཀ་ཁ་མགོ་མཇུག་མི་ཤེས་ང་ཡི་ཨ་ཕ་དྲིན་ཅན་དེའི།།
ཐུགས་སེམས་སྤྲོ་ཆེད་ད་ལྟ་བར་དུ་རྩེར་སོན་བྱ་དགའ་རིམ་གྱིས་བླངས།།
ད་ལོ་འདི་ན་ཡོ་ལང་ཆེ་བའི་དུས་སྐབས་གཉན་འཕྲང་འདི་ཡི་ནང༌།།
རླུང་རྟ་ཞིག་གིས་སྐུལ་བ་ཡིན་ནམ་རྣམ་དཔྱོད་མེ་རླབས་འབར་བ་ཡིན།།
རྩེ་ཕུད་དང་བོའི་བྱ་དགའ་གཟེངས་བསྟོད་སྨྱོན་ཕྲུག་ང་ལ་ཐོབ་སོང་བས།།
ཉེ་འཁོར་སྤྱི་ཚོགས་ཆུང་ཆུང་འདིའི་ནང་བསྟོད་སྨད་འུར་སྒྲས་སླར་ཡང་གང༌།།
ཀ་ཁ་གཡག་གི་མགོ་ལྟར་བྲིས་ཀྱང་ང་ཡིས་ཨ་ཕས་མི་ཤེས་པས།།
བུ་ངས་འདི་ལྟར་ཤེས་སོང་ཟེར་ནས་ཁྱེད་ལ་འགྲེལ་བཤད་བྱེད་ཐབས་བྲལ།།
དེའི་ཕྱིར་བདག་གི་བྱ་དགའ་འདི་ཀོས་ང་ཡི་ཤེས་ཚད་འགྲེལ་བརྗོད་བྱེད།།
དེ་ལུགས་ཁྱེད་བདེ་བར་བཞུགས་ཤིག་ང་ལ་ཐུགས་ཁྲལ་དགོས་དོན་མེད།།
དྲིན་ཆེན་ཨ་མའི་ཞལ་ཆེམས་ཇི་བཞིན་གནའ་དེང་རིག་པའི་གཞུང་ལུགས་ཀུན།།
འཆད་རྩོད་རྩོམ་གསུམ་གང་ལ་འཇུག་ཀྱང་ཞུམ་མེད་སྤོབས་པ་རྙེད་བྱུང་བས།།
བདེ་ཅན་ཞིང་གི་ཨ་མ་དང་ནི་ཉལ་སར་ལུས་པའི་ཨ་ཕ་ཟུང༌།།
བུ་ཆུང་ང་ལ་ཐུགས་ཁྲལ་མི་དགོས་ཁྱེད་གཉིས་རེ་དོན་སྒྲུབ་ངེས་ཡིན།།
བེ་རི་སྤྱི་ཁང་དུ།
ང་དང་ངའི་ལས་དབང༌།
དབང་ཆེན་ལྷ་ཡི་བཀའ་ཆད་ཡིན་ནམ་ལས་དབང་བཙན་པོའི་བརྙས་བཅོས་ཡིན།
སུ་དང་གང་གི་མགོན་སྐྱབས་མེད་པར་ས་མཐའི་གྲུ་ཁའི་ཟུར་ཞིག་ན།།
ཆོ་ངེ་དྲག་པོས་གནམ་ས་བསྒུལ་ཀྱང་སྙིང་རྗེའི་སྤྱན་གྱིས་མི་གཟིགས་པར།།
མཐོང་ཆུང་ལྷམ་གྱི་རྡོག་པས་རྫིས་དུས་སྙན་ངག་མིག་ཆུའི་རླབས་དང་འདྲེས།།
རྒྱུ་དང་དཔལ་འབྱོར་དབང་ཐང་ཡོད་ན་བླུན་པོ་ཡིན་ཡང་ཀུན་གྱིས་བཀུར།།
དབང་དང་གོ་ས་གང་ལ་མེད་ན་མཁས་པ་ཡིན་ཡང་ཀུན་གྱིས་སྨད།།
ཆོས་བརྒྱད་རྦ་རླབས་རབ་ཏུ་འཁྲུག་པའི་དུས་རབས་གསར་པའི་འཇིག་རྟེན་འདིར།།
ཇི་ཙམ་འདི་རུ་སྡོད་ཡུན་རིང་ན་སྙིང་གི་ན་ཟུག་དེ་བས་ཆེ།།
སྙིང་གི་འཕར་ལྡིང་རེ་རེའི་ལྷན་དུ་སྐྱོ་གདུང་ན་ཟུག་ཤུགས་ཀྱིས་སློང༌།།
དབུགས་ཀྱི་རྒྱུ་བ་རེ་རེའི་ལྷན་དུ་ཆོ་ངེ་དྲག་པོ་ཁ་ནས་ཤོར།།
སྙན་ངག་ཚིག་འབྲུ་རེ་རེའི་ལྷན་དུ་སྙིང་གི་ན་ཟུག་གསལ་བར་བྱེད།།
མི་ཚེའི་སྐར་ཆ་རེ་རེའི་ལྷན་དུ་སྐྱོ་གདུང་འབུམ་ཕྲག་གྲོགས་སུ་མཆིས།།
སུ་དང་གང་གི་བྱམས་སྐྱོང་མེད་དུས་ད་ཕྲུག་ཡིན་པར་གཞིས་ནས་ཚོར།།
ཀུན་གྱིས་གྲོགས་ནས་ཕྱི་རུ་ཕུད་དུས་སྤྲང་བོ་ཡིན་པར་གཞིས་ནས་ཤེས།།
མཐོང་ཆུང་འཕྱ་སྨོད་ཀུན་གྱིས་བྱེད་དུས་ཉམ་ཆུང་ཡིན་པར་གཞིས་ནས་རྟོགས།།
གནས་བབ་ངོ་མ་གསལ་བར་ཤེས་དུས་འགྱོད་པའི་དབུགས་རིང་གཞིས་ནས་ཤོར།།
ལས་དབང་བཙན་པོས་འགྲམ་ལྕག་གཞུས་པས་མདུན་སྐྱོད་གོམ་པ་ཕྲེད་དུ་ཤོར།།
ཚ་ཞང་སྤུན་གྲོགས་སུས་ཀྱང་མ་གཟིགས་གོམ་པའི་འཕྱོར་འགྲོས་གསོ་མ་ཐུབ།།
འཕྱར་མ་འཕྱོར་གྱི་གོམ་འགྲོས་འདི་ཡིས་མི་ཚེའི་མདུན་ལམ་འཚོལ་བྱས་པས།།
ནམ་ཞིག་ཕུགས་འདུན་མངོན་དུ་གྱུར་ཚེ་ཁྱེད་ཅག་གཟིགས་མོར་མཛོད་ཅིག་ལོ།།
༢༠༠༨ ༡༠ ༡༠ ཉིན་མན་ཇུ་ཏྲི་ལར་བྲིས།།
ང་ང་རང་ལ་དགའ།
དུང་ཟླ་དཀར་པོའི་འཛུམ་མདངས་ཀུན་ལ་འཕྲོ། །
ལྷོ་རླུང་བསིལ་བོས་གཟན་ཤམས་རླུང་གིས་བསྐྱོད། །
ཡོད་ཚད་གཉིད་ལ་ཡུར་བའི་མཚན་མོ་དེར། །
ཁེར་རྐྱང་ཚིག་ལབ་མིག་ཆུའི་རླབས་དང་འདྲེས། །
རྒྱུ་མེད་སྤྲང་པོའི་རིགས་ལ་ཁྱི་ཡིས་ཀྱང༌། །
སྡང་ཡོང་ཞེས་པའི་གཏམ་འདི་ཅིས་མི་བདེན། །
སྤྲང་བོའི་བུ་ང་ཁྱེར་རྐྱང་འཕྲང་ལམ་དེར། །
མཐོ་དམན་ཀུན་གྱིས་སྡིགས་མོས་ཀུན་ནས་གཙེར། །
ཡར་ལ་འགྲོ་ན་མྱི་ཁའི་ལྐོག་མདའ་འཕང༌། །
མར་ལ་ལྷུང་ན་མཐོང་ཆུང་རྐང་འོག་རྫིས། །
གར་འགྲོ་རང་དབང་བྲལ་བའི་ཤུལ་ལམ་ནས། །
ཨ་ཐང་ཆད་པའི་དབུགས་རིང་སྟོང་དུ་བརྩེགས། །
བདེན་རྫུན་གོ་རིམས་ལྡོག་པའི་གྲུ་ཁ་འདིར། །
མཇུག་མེད་ཁྱི་རྒན་རྒྱལ་པོར་གྱུར་པའི་འོག །
བེ་རི་སྨྱོན་ཕྲུག་ཅེས་བྱའི་སེང་གེའི་བུ། །
ཞུམ་པའི་མགོ་བོ་སྨད་པ་ཅི་ཡིས་ལན། །
འཇིག་རྟེན་འདི་ན་རྒྱུ་དང་གོ་གནས་གཉིས། །
གང་ལ་མེད་ན་སྤུན་དང་གྲོགས་པོ་ཀྱང༌། །
བརྩེ་བའི་མིག་ཟུར་ཙམ་གྱིས་མི་གཟིགས་པས། །
རང་ཉིད་རང་ལ་བརྩེ་བས་གཅེས་དགོས་སྙམ། །
བརྙས་དང་མི་ཁའི་འཕྲང་ལམ་འདི་རྒྱུད་ནས། །
ནམ་ཞིག་ཕུགས་བསམ་མངོན་དུ་གྱུར་བ་ན། །
རེ་རྩེར་འཛིགས་ནས་བེ་རི་སྨྱོན་ཕྲུག་ངས། །
ཕྲལ་རྒོད་ལྷན་དུ་ཀི་ཞིག་བཏབ་ན་བསམ། །
༢༠༠༨ ༧ ༥།
འུ་ཅག་འཚོ་བ་འདི་ཅི་ཞིག་གི་ཆེད་དུ་རེད།
གཞུང་ཆེན་པོ་ཏི་ཁ་ཤས་མདུན་ངོས་སུ་བཞག་ཅིང༌། །
ལག་པ་ཟུང་གིས་ཕྲེང་བ་ཕུར་ཕུར་ཞིག་བཏང་ནས། །
མིག་རས་བཙུམས་ཏེ་བསམ་གཞིགས་ནན་ཏན་ཞིག་བྱས་དུས། །
ཡོད་ཚད་སྟོང་ལྷང་ལྷང་གི་སྣང་བ་ཞིག་སྟེར་བྱུང༌། །
ཐལ་སྐམ་ཚིག་གི་འཇའ་ལ་དམ་དམ་དུ་འཇུས་ནས། །
སྟོང་བསམ་ནམ་མཁའི་དབྱིངས་སུ་ལྡིང་བསྐོར་ལ་ཆས་ཏེ། །
གཞི་མེད་ཁེངས་པའི་ཀུ་ཆོ་ཇེ་ཆེ་རུ་སྒྲོག་དུས། །
ཞིབ་ཏུ་བསམ་ན་ཐམས་ཅད་ཤ་ཚ་ལས་མི་འདུག །
འཆད་རྩོམ་རྩོམ་པའི་ལག་པ་དུམ་བུ་རུ་ཆད་པའི། །
དཔའ་རྩལ་ཆེ་བའི་དཔའ་བོ་ལག་རྡུམ་གྱི་ཚོགས་ཀྱིས། །
སངས་རྒྱས་བསྟན་པའི་རྒྱལ་མཚན་ཇི་ལྟར་དུ་འདེགས་ལམ། །
སྙམ་ཞིང་ཨ་ཐད་ཆད་པའི་ཚོར་སྣང་ཞིག་སྐྱེས་བྱུང༌། །
འདི་ལྟར་བཤད་ཚེ་ཀུན་གྱིས་རུབ་བསྐྱོར་ཞིག་བརྒྱབ་ནས། །
ལྟས་ངན་སྨྱོན་པ་ཞེས་བྱའི་ཁ་དམག་གིས་སྡིགས་ཀྱང༌། །
ཕོད་པ་གསུམ་པོ་འདི་ནི་སྙུག་ཐོགས་པ་ཞིག་གི །
འགྱུར་མེད་ལངས་ཕྱོགས་ཡིན་པས་སྐྲག་སྣང་དེ་མི་འདུག །
འུ་ཅག་ཁ་བ་ཅན་པའི་རིག་པ་ཡི་གཞུང་ལུགས། །
འཆད་རྩོད་རྩོམ་གྱིས་དར་སྤེལ་བྱེད་འདོད་དེ་མེད་ན། །
བོད་པ་ཞེས་པའི་མིང་འདི་མགོ་ཐོག་ཏུ་ཁྱེར་ནས། །
བོད་པའི་རིགས་སུ་འཚོ་བའི་དགོས་པ་ཞིག་འདུག་གམ། །
༢༠༠༧ ༧ ༡༢ ཉིན་རྒྱུན་ལྡན་ཆོས་རའི་ནང་གི་དཔེ་ཆ་བ་
འགའ་ཞིག་གི་བྱ་སྤྱོད་མིག་ལམ་དུ་ཤར་རྗེས་ཐོལ་བྱུང་དུ་བྲིས།
སྨྱོན་པའི་བཟི་གླུ།
ཕྱིས་དྲགས་པའི་བརྩེ་དུང་སྐྱུར་མོ།
འབྲུག་གི་གྲོགས་མོ་རྙིང་པ ་ S. D་ཕུལ་བ།
ཀ་ར་བྱེ་རིལ་རོ་མངར་འཕྲོག་པའི་མཛེས་ལྡན་གང་གི་མཆུ་སྒྲོས་ལས། །
ཁ་ཙམ་མིན་པའི་བརྩེ་མདངས་འདྲེས་པའི་མ་བཅོས་སྙིང་གཏམ་དྲོད་མོ་དེ། །
ག་ལེར་སེམས་སུ་དྲན་ཐེངས་རེ་ལ་བརྩེ་གདུང་རྒྱ་མཚོ་འཁོལ་དང་ལྷན། །
ང་ཡི་གཉིད་ཀྱི་རྨི་ལམ་དུའང་ཁྱོད་ཀྱི་མིང་ནས་བོས་སུ་ཤོར། །
ཅ་ཅོ་འདུ་འཛིའི་ཡོ་ལང་ཆེ་བའི་ཨམ་ར་ཝ་ཏའི་གྲོང་བརྡལ་ན། །
ཆ་ལུགས་འགྲོ་སྟངས་གཅིག་པ་མིན་ཡང་བློ་སེམས་གཅིག་ཏུ་མཐུན་གྱུར་པའི། །
ཇ་དང་ཀོ་ཧཕི་འཐུང་བའི་ཞོར་དུ་སྙིང་གཏམ་ལྷུག་པོར་གྲོལ་མཛད་པའི། །
ཉ་མ་ང་ཡི་གྲོགས་མོ་རྙིང་པ་སྐུ་གཟུགས་བདེ་བར་ཞུགས་ལགས་སམ། །
ཏ་ཐ་གཱ་ཏའི་ཞུང་ལུགས་ནང་དུ་བརྩེ་བ་ཀུན་གྱི་རྟེན་ཡིན་གསུངས། །
ཐ་ན་མིག་མེད་གྲོག་མ་དག་ཀྱང་འདོད་པའི་བརྩེ་བའི་རྗེས་སུ་འགྲོ། །
ད་ཆ་ཁྱེད་ཉིད་བརྩེ་གདུང་དྭངས་མས་རེ་སྒུག་ཅུང་ཙམ་གནང་བར། །
ན་ཚོད་རྒས་པའི་ཕ་རྒན་དེ་དང་འཁྲུངས་ས་བསྐྱོན་དོན་ཅི་ཡིན་ནམ། །
པ་ཕ་འདྲ་བའི་ཕ་རྒན་ལྷན་དུ་ཚོར་བ་བདེ་བ་འདུག་ལགས་སམ། །
ཕ་རོལ་མི་ཡིས་འཕྱ་བའི་བརྙས་བཅོས་གང་ཁྱེད་ཐུགས་ཀྱིས་བཟོད་ལགས་སམ། །
བ་མོའི་སད་ཀྱིས་བཅོམ་པ་འདྲ་བའི་ངེད་གཉིས་བརྩེ་གདུང་དྲན་ལགས་སམ། །
མ་ངེས་ཁྱེད་ཀྱི་སྒྱུ་འཕྲུལ་དེ་ཀོ་དྲན་རྟེན་ཟོལ་གྱིས་སེམས་ལ་བརྐོས། །
ཙ་རི་བྲག་ཕུག་གྲུབ་ཁང་བསྟེན་ནས་བཀའ་སྤྱོད་སྒོམ་སྒྲུབ་མ་བྱས་བར། །
ཚ་བའི་མེ་ལས་ལྷག་པར་ཚ་བའི་ལྷད་མེད་བརྩེ་གདུང་དམར་པོ་དེ། །
ཛ་ཛོར་གད་ཀྱི་སྙིགས་མའི་ལྷན་དུ་ཕངས་མེད་གཡུག་པར་མི་ཕོད་ལ། །
ཝ་ལེར་སེམས་སུ་གཅེས་པར་བསྐྱངས་ནས་རྟག་ཏུ་ཉར་ནས་སྡོད་ངེས་ཡིན། །
ཞ་བོས་མིག་གིས་མཐོང་བར་ཐུབ་ཅིང་འོན་པས་རྣ་བས་གོ་ཐུབ་པའི། །
ཟང་ཟིང་འཁོར་བའི་ནོར་བུ་རིན་ཆེན་བརྩེ་གདུང་དྭངས་མའི་ཚོར་བ་འདི། །
འ་འུར་རྒྱུ་དངོས་ཕྲན་བུའི་དོན་དུ་ཕངས་མེད་བཙོང་བར་ཕོད་པ་དེ། །
ཡང་ཡང་སེམས་སུ་དྲན་ཐེངས་རེ་ལ་སྙིང་རླུང་གཟུགས་ཀྱི་སྟོད་ལ་འཚང༌། །
ལས་དབང་གི་བར་སྟོང༌།
ལམ་གྲོགས་ཨ་ལྕག T.S ལ་ཕུལ་བ།
མེ་རླབས་དམར་པོ་གྱེན་དུ་འཕྱོ་འདྲའི་ལྷ་མཐའི་ཚ་བས་ལུས་ཁམས་བསྲེགས། །
ང་ཡི་ཕ་ཡུལ་སྙིང་ནས་དྲན་པའི་གདུང་བའི་མེ་ལྕེས་སེམས་ཁམས་བསྲེགས། །
ཡོད་ཚད་ཐམས་ཅད་བསྲེགས་ལ་ཉེ་བའི་སྐྱབས་བཅོལ་ལོ་ཟླའི་སྲུབ་ཀ་ནས། །
དེ་རིང་སླར་ཡང་གསུམ་དུས་ཞེ་བརྒྱད་མ་བོས་མདུན་དུ་འབྱོར་ནས་འདུག །
ཆབ་སྲིད་ལྟ་བའི་ལང་ཕྱོགས་འདྲ་མིན་ཡོ་ལང་དྲག་པོའི་འདུ་འཛིའི་འོག །
ལ་ལས་རང་བཙན་གཙངམ་ཡིན་ཞེས་མ་བསྐུལ་མདུན་དུ་ངར་གྱིས་ཤོར། །
ལ་ལས་བྱང་ཆུབ་སེམས་མཆོག་བགྲངས་ཏེ་ཕྲ་ཆུང་བཙུམ་ནས་ཤར་གྱིས་བསྐྱོད། །
མདོར་ན་ཀུན་གྱི་སྐད་ངག་ནང་དུ་ཞུམ་མེད་སྙིང་སྟོབས་གསལ་བར་མཚོན། །
བདག་ཀྱང་དུས་དྲན་སྲུང་རྩི་ཞུ་སར་གཅིག་པུར་དལ་གྱིས་བསྐྱོད་པའི་སྐབས། །
བུ་མོ་ཞིག་གིས་ང་ཡི་མིང་ནས་གསལ་མ་གསལ་གྱིས་བོས་པ་ཐོས། །
ཕྱི་རུ་འཁོར་དུས་བུ་མོ་དེ་ནི་སྔོན་ཆད་ང་ཡིས་མཐོང་མྱོང་ཡང༌། །
སུ་ཞིག་ཡིན་དང་མཚན་ལ་གང་ཡིན་ད་དུང་དྲན་པའི་སྣེ་མ་ཟིན། །
འགྲམ་དུ་ཕེབས་ནས་འཛུམ་ཞིག་བསྟན་པས་ཕར་ལ་འཛུལ་ཞིག་ལམ་དུ་ཕུལ། །
ཁམས་བདེའི་འཚམས་འདྲི་བྱས་པའི་ཞོར་དུ་ཕན་ཚུན་ལབ་གླེང་བྱས་པའི་མཐར། །
ན་ཆུང་དེ་ནི་སྔོན་ཆད་ཁོ་བོ་རྡ་རམ་ས་ལར་བསྐྱོད་པའི་སྐབས། །
ལམ་བར་ཞིག་ནས་ཐུག་འཕྲད་བྱུང་བའི་ལམ་གྲོགས་ཡིན་པ་གཞིས་ནས་ཤེས། །
ན་ཆུང་བུ་མོ་དེ་ཡི་མིང་ལ་ཚེ་རིང་དབྱངས་འཛོམས་ཞེས་བྱ་ཞིང༌། །
ལྡི་ལི་མཐོ་རིམ་སློབ་གཉེར་ཁང་དུ་རྩོམ་རིག་སློབ་ཚན་སྦྱངས་པ་སོགས། །
ཁོང་གི་ལོ་རྒྱུས་ཕྱོགས་རེ་ཙམ་ལས་ཕུགས་ཀྱི་གནས་སྟངས་མི་ཤེས་ལ། །
ལམ་གྲོགས་ཤིག་གི་ངོ་ཤེས་ཙམ་ལས་དམིགས་བསལ་འབྲེལ་བ་གང་ཡང་མེད། །
ལྡི་ལིར་བསྐྱོད་པའི་མེ་འཁོར་དེའི་ནང་བོད་རིགས་གཞན་པ་མི་འདུག་པས། །
བུ་མོ་དེ་ཉིད་ངའི་འགྲམ་ཡོང་ནས་ཁྱེད་རང་གང་ནས་ཕེབས་ཡིན་ཞེས། །
སྤྱི་སྟངས་ལོ་རྒྱུས་འདྲི་བའི་ཟོལ་གྱིས་སྐད་ཆའི་མགོ་བོ་འདི་ནས་བཙུགས། །
ཆོབ་གཏམ་འདྲ་མིན་བཤད་ཁུལ་བྱས་ནས་འགྲུལ་བཞུད་ཉིན་མཚན་བསྐྱལ་ཐབས་བྱས།།
བུ་མོ་ཁོང་གི་བཀའ་མོལ་ནང་དུ་བདག་གིས་གོ་བ་མི་ལོན་པའི། །
རྙོག་འཛིང་ཆེ་བའི་གམ་ཚིག་ལྟ་བུའི་སྐད་ཆ་མང་དུ་གསུངས་སོང་ཡང༌། །
འཇིག་རྟེན་ཕོ་མོའི་ཟུར་ཟའི་ཚིག་ལ་ཉམས་མྱོང་གཏན་ནས་མེད་ལགས་ན། །
ཆོབ་ཀྱི་ཚུལ་དུ་ཉན་པ་ཙམ་ལས་དོན་གྱི་གོ་བ་བཙལ་མ་ཤིས། །
འདི་ནི་ང་ཡི་ཁ་བྱང་དང་ནི་ཁ་པར་ཨང་གྲངས་འདི་ཡིན་ཞེས། །
མིང་ཤོག་དུམ་ཞིག་ང་ལ་གནངས་ནས་ཁྱེད་ཀྱི་ཁ་བྱང་སྟེར་རོགས་ཟེར། །
ལམ་གྲོགས་ཤིག་གི་ངོ་ཤེས་ཙམ་ལ་འདི་ལྟར་བྱེད་དོན་ཅི་ཡིན་ནམ། །
བསམ་བཞིན་བསམ་བཞིན་ང་ཡི་ཁ་བྱང་ཁོང་ལ་དེ་ལྟར་ཕུལ་དགོས་བྱུང༌། །
ལྡི་ལི་མེ་འཁོར་བབ་ཚུགས་འབྱོར་ནས་ང་གཉིས་སོ་སོར་གྱེས་པའི་སྐབས། །
ཁ་པར་ངེས་པར་གཏོང་ཤོག་ཅེས་བྱའི་མངགས་ཆ་ནན་པོའི་ཁུལ་གྱིས་གནངས། །
སྒེག་པའི་ཉམས་ཀྱི་ཟུར་མིག་དང་བཅས་འཛུམ་མདངས་ཡང་ཡང་མངོན་པ་ཡང༌། །
དེང་རབས་གཞོན་ནུའི་འགྲོ་སྟངས་ཙམ་ལས་ཕུགས་ཀྱི་གནད་དོན་ཡེ་མ་རྟོགས། །
ཕྱིས་སུ་ཁོ་བོ་གདན་སར་འབྱོར་ནས་བདུན་ཕྲག་གཅིག་ལས་མ་མགོར་གོང༌། །
ན་ཆུང་ཁོང་གི་ཕྱག་བྲིས་དང་པོ་ང་ཡི་ལག་ཏུ་འབྱོར་བྱུང་ལ། །
སྔོན་ཆད་ལས་ཀྱང་རྙོག་འཛིང་ཆེ་བའི་བཀའ་མོལ་མང་པོ་གསུངས་འདུག་པས། །
ཉམ་ཆུང་ཁོ་བོའི་སེམས་པ་ཕྲ་མོ་ཐེ་ཚོམ་དྲ་བའི་རྙི་རུ་ཚུད། །
དེ་ལྟར་དེ་ལྟར་རྙོག་འཛིང་ཕྱག་བྲིས་མང་པོ་འབྱོར་སོང་ཡང༌། །
ད་ལྟ་བར་དུ་ང་ཡིས་ཁོང་ལ་ཡིག་ལན་རྐང་གཅིག་ཕུལ་མྱོང་མེད། །
མགོ་རིལ་མི་ཚེའི་བར་ཆད་ཡིན་སྙམ་འཇིགས་སྐྲག་སྟོང་གི་སེམས་ཁམས་དཀྲུགས། །
གས་ཆག་མེད་པའི་དཀའ་ཡོལ་འདི་ཉིད་རླུང་འཚུལ་ཁྲོད་ལས་སྲུང་དགོས་དྲན། །
དེ་རིང་འདི་ན་ལམ་ཟུར་ཞིག་ནས་མ་བསམ་ཧོབ་སྟེ་ཐུག་བྱུང་བས། །
རྙོག་འཛིང་ཆེ་བའི་འཇིགས་སྐྲག་རྙིང་པར་ཞེ་སྣང་གསར་པའི་ཁ་སྣོན་བཏབ། །
འོན་ཏེ་ཅི་ཡང་མེད་པའི་ཁུལ་གྱིས་མཉམ་དུ་འགྲོ་ཁུལ་བྱས་ན་ཡང༌། །
རྔམ་སྐྲག་སྟོང་གི་སེམས་པ་ཕྲ་མོ་རིམ་པ་དགུ་ཡི་དོང་དུ་ལྷུང༌། །
འཇིགས་ཤིང་འཇིགས་ཤིང་ཚོགས་ཁང་ནང་དུ་གསུང་བཤད་བཀའ་སློབ་ཉན་པའི་སྐབས།།
སྔོན་ཆད་ཁོང་གི་ཕྱག་བྲིས་དེ་ཚོ་བདག་ལ་འབྱོར་མིན་དྲིས་སོང་བས། །
དོག་མི་བདེ་བའི་ཚོར་སྣང་ལྷན་དུ་མགོ་བོ་གཡུག་གཡུག་ཙམ་ཞིག་བྱས། །
བརྗོད་ཐབས་བྲལ་བའི་ཚོར་བའི་རིས་ཤིག་ཁོང་གི་གདོང་ལ་རིམ་གྱིས་ཤར། །
ཡིག་ལན་མེད་པའི་རྒྱུ་མཚན་ཅི་ཞེས་དྲི་བའི་གནད་གཅིག་བཏང་བྱུང་བས། །
དེ་ཡི་ལན་དུ་ཕུལ་རྒྱུ་མ་རྙེད་མི་སྨྲའི་བརྟུལ་བཞུགས་འཆང་དགོས་བྱུང༌། །
ན་ཆུང་བུ་མོས་ང་རང་ཁྱེད་ལ་ཞེས་བྱ་ཟེར་ནས་བཤད་མཚམས་ཆད། །
གསལ་མ་གསལ་བྱེད་རྡབ་རྡིག་དེ་ཡིས་ཁོ་བོའི་སེམས་ཁམས་འཇིགས་གྱིས་གས། །
སྨན་ཤར་བུ་མོ་ཞིག་དང་ལྷན་དུ་མགོ་རིལ་བ་ཞིག་བསྐྱོད་པ་འདི། །
ཀུན་གྱི་མིག་ལམ་མཛེས་པ་མིན་ལ་ནང་གི་ཁྲིམས་དང་མཐུན་མ་ལགས། །
དེས་ན་གཏམ་བཤད་ཚར་བའི་མཚམས་སུ་ལམ་སེང་ཡར་ལ་ལོག་མགོ་བརྩམས། །
ན་ཆུང་བུ་མོའི་ཕྲ་ཆུང་མཐའ་རུ་མཆི་མས་ཡོངས་སུ་གང་སྟེ་འདུག །
ང་ཡི་སེམས་ཀྱི་གཡོ་འགུས་དེ་ནི་རྒྱ་མཚོའི་རྦ་རླབས་འཕྱུར་བ་བཞིན། །
ང་ཡི་ལུས་འདི་མྱོང་འགྱུར་བཏུང་བའི་ར་བཟི་རྒྱ་བོའི་གོམ་འགྲོས་བཞིན། །
ང་ཡི་ཁ་འདི་གདམ་གྱིས་བཅོལ་པའི་མི་ཡི་སྣང་བརྙན་སྐུ་འདྲ་བཞིན། །
ང་ཡི་ལུས་ངག་ཡིད་གསུམ་ཡོད་ཚད་བྱང་ཕྱོགས་རླུང་གིས་འཁྱེར་བ་བཞིན། །
རང་ཤག་སྤྱི་བུའི་ནང་དུ་ལོག་ནས་བསམ་གཞིགས་ཐིངས་ཤིག་བྱས་པའི་དུས། །
མངར་སྐྱུར་འདྲེས་མའི་ཚོར་སྣང་མང་པོས་རང་སེམས་གཅིག་ཏུ་གནས་མ་ཐུབ། །
འཇིག་རྟེན་འཁོར་བའི་གྲྭ་ཁ་ཞིག་ན་ཆ་མི་སྙོམས་པའི་ལས་དབང་འདི། །
བསམ་བཞིན་བསམ་བཞིན་འཁོར་བའི་ཆོས་ལ་ཞེན་པའི་བར་སྟོང་རིང་དུ་ཕྲིན། །
བུ་མོ་ཁྱེད་ཀྱི་མིག་ཆུ་ཞིག་གིས་ང་ཡི་གཟན་ཤམས་སྤུད་ཐབས་མེད། །
བུ་མོ་ཁྱེད་ཀྱི་སྒེག་འགྲོས་ཤིག་གིས་ང་ཡི་སྡོམ་པ་བསྐྱུར་ཐབས་མེད། །
བུ་མོ་ཁྱེད་ཀྱི་ལོངས་སྤྱོད་དེ་དང་ང་ཡི་མདུན་ལམ་བརྗེ་ཐབས་མེད། །
བུ་མོ་ཁྱེད་ཀྱིས་ཐུགས་བསམ་བཞེས་རོགས་ང་ཡི་ལམ་གྲོགས་ཚེ་དབྱངས་ལགས། །
འདབ་ཆགས་ཚོགས་ནི་ནམ་མཁའི་དབྱིངས་ལུ་གཤོག་པ་ཡངས་པོར་བགྲད་དེ་འཕུར།
ཉ་མོའི་ཚོགས་ནི་རྒྱ་མཚོའི་གཏིང་དུ་འཁྱུག་འཁྱུག་མཛེས་རྩལ་ངོམ་ཏེ་ཉུལ། །
རང་རང་སོ་སོའི་རིགས་དང་མཐུན་པའི་མི་ཚེ་འདི་ལྟར་བསྐྱལ་དགོས་འདི། །
དབང་ཆེན་ལྷ་ཡི་བཀའ་ཆད་མ་ཡིན་ཚེ་རབས་སྔོན་མའི་ལས་དབང་ཞིག །
འཛམ་གླིང་འདི་ཉིད་ཆུང་ཆུང་མིན་ལ་འཇིག་རྟེན་འདི་ཉིད་དེ་བས་མིན། །
རང་དང་མཐུན་པའི་ཕོ་གསར་ཞིག་དང་མི་ཚེ་ལྷན་དུ་བསྐྱལ་ཐབས་ཀྱིས། །
ང་ཡིས་འདི་ནས་སྔ་དགོང་རྣམས་སུ་ཁྱེད་ཉིད་གཏན་དུ་བདེ་བ་ཡི། །
གསོལ་བ་སྨོན་ལམ་ཡང་ཡང་འདེབས་ཆོག་ང་ཡི་ཨ་ལྕག་ཚེ་དབྱངས་ལགས། །
༢༠༠༧ ༣ ༡༣ ཉིན་རང་ཤག་ཏུ།
ཆ་མི་སྙོམས་པའི་ལས་དབང༌།
གཞས་མ་ཆོསསྐྱིད་ལ་ཕུལ་བ།
དབྱངས་ཅན་བྱིན་རླབས་ཁོག་ཏུ་ཞུགས་ཀྱང་སྲིད། །
ཆགས་པའི་གདོན་འདྲེ་སེམས་ནང་འཛུལ་ཡང་སྲིད། །
མཛེས་ལྡན་ཁྱེད་ཀྱི་སྐུ་པར་མཇལ་ཙམ་གྱིས། །
ཐར་ཐོར་སྙན་ངག་མ་འབད་ལྷུན་གྱིས་ཤོར། །
ང་རང་མཐོང་རྒྱུ་ཆུང་བས་ཡིན་ཡང་སྲིད། །
དངོས་གནས་དམ་པའི་དོནལ་གནས་ཀྱང་སྲིད། །
ཡིད་འཕྲོག་གཞོན་ནུ་ཁྱེད་ཀྱི་མཛེས་སྡུག་ལ། །
དཔེ་ཟླ་སྟོང་གསུམ་ཁྱོན་འདིར་རྙེད་པར་དཀའ། །
དེང་རབས་འཕྲུལ་ཆས་བཅོས་མ་ཡིན་ཡང་སྲིད། །
དྲུག་ཅུ་རྩ་བཞིའི་འགྱུར་ཁུག་ལྡན་ཡང་སྲིད། །
མཛེས་ལྡན་ཁྱེད་ཀྱིས་བཏང་བའི་གླུ་གཞན་དེ། །
ཉམ་ཆུང་བུ་ངའི་སྙིང་ལ་ཡོངས་སུ་སིམ། །
ང་གཉིས་ལས་འབྲེལ་མེད་པ་ཡིན་ཡང་སྲིད། །
ལས་འབྲེལ་དུས་ཀྱིས་བཀག་པ་ཡིན་ཡང་སྲིད། །
ཁྱེད་ཀྱི་སྐུ་པར་མཇལ་བ་ཕྱིས་དྲགས་སོང༌། །
ང་རང་མགོ་རིལ་བྱས་པ་སྔ་དྲགས་སོང༌། །
ཁྲེལ་མེད་ཞབས་འདྲེན་ཁྱོད་ཅེས་སྨད་ཀྱང་སྲིད། །
དངོས་གནས་བདེན་པ་འདུག་ཅེས་བསྟོད་ཀྱང་སྲིད། །
ཉམ་ཆུང་ཞིག་གི་བདེན་པའི་སྙིང་གཏམ་འདི། །
ཕྱི་རུ་མངོན་ལ་ཉེས་སྐྱོན་ཅི་ལ་མཆེས། །
ཤེས་འཇོན་གཉིས་མེད་ཞག་མགོ་ཆག་ཀྱང་སྲིད། །
རྣམ་ཤེས་ཕྲ་མོ་མཁའ་མཐར་ཡལ་ཡང་སྲིད། །
ཐེངས་གཅིག་བཅད་པའི་སྐུ་དང་ཕུ་ཐུང་གཉིས། །
ཡང་བསྐྱར་སྐྱེ་རུ་བཅུག་འདོད་བདག་ལ་མེད། །
ནམ་མཁའི་བླ་མས་ལམ་སྟོན་གནང་ཡང་སྲིད། །
བསླུ་མེད་ལས་ཀྱིས་རམ་འདེགས་བྱས་ཀྱང་སྲིད། །
མཛེས་སྡུག་ལྡན་པའི་མ་འོངས་འཇིག་རྟེན་ན། །
ང་གཉིས་ལྷན་དུ་བདེ་སྐྱིད་འཚོལ་བར་སྨོན། །
༢༠༠༥ ༡༠ ༧ ཉིན་ལྷོ་ཕྱོགས་ཕོ་ཉ་ ༢༢ ཐོག་བཀོད།
ང་དང་སྒྲོལ་མའི་ལས་དབང༌།
གྲོགས་མོ་ S.D ལ་སྲིངས་བ།
མ་རྒད་ཞུན་མ་སྟོང་དུ་བྱུག་འདྲའི་ནམ་མཁའ་སྔོན་པོ་འདི་ཡི་འོག །
འཇོ་སྒག་ཉམས་ཀྱི་མཛེས་པ་རྫོགས་པའི་བུ་མོ་སྒྲོལ་མ་ཁྱོད་ཉིད་དང༌། །
ཆ་རྒྱུས་མེད་པའི་ས་མཐའ་ཞིག་ནས་སེམས་ཁམས་གཅིག་ཏུ་འདྲེས་པ་འདི། །
ལས་དང་ནམ་མཁའི་དཀོན་མཆོག་གཉིས་ཀྱིས་སྔོན་ནས་བཀོད་བསྒྲིགས་བྱས་པ་བཞིན།།
ཡར་འགྲོ་མར་འོང་མི་ཚོགས་མང་པོའི་འཚང་ཁ་སྟོང་དུ་རྒོད་པའི་གསེབ། །
མིག་མཐའ་འཆི་མས་ཡོངས་སུ་ཁེངས་པའི་མཛེས་སྡུག་ལྡན་པའི་གཞོན་ནུ་ཞིག །
འཇམ་གཉེན་ཕྱག་གི་འདམ་མ་ཡངས་པོ་དལ་གྱིས་དལ་གྱིས་གཡོ་བ་ན། །
བརྩེ་གདུང་རྒྱ་མཚོ་སྙིང་ནས་འཁོལ་ཏེ་གྱེས་ཁའི་མིག་ཆུ་ས་ལ་འཐོར། །
མངར་སྐྱུར་ཟུང་གི་འཚོ་བ་འདྲེས་པའི་ཕོ་ལོ་ཉི་ཤུའི་རྒྱུད་རིམ་ནང༌། །
རྣམ་པ་ནམ་མཁའི་ལྷ་བཞིན་མཛེས་པའི་མཛེས་མ་མང་པོ་མཇལ་མྱོང་ལ། །
བརྒྱད་ཅུ་རྩ་བཞིའི་སྒྱུ་སྩལ་རྫོགས་པའི་འཇོ་སྒེག་འགའ་དང་འཕྲད་མྱོང་ཞིང༌། །
ཁུ་བྱུག་གསུང་སྐད་རྐུས་པ་འདྲ་བའི་སྙན་སྒྲོགས་མང་ཡང་གཤིབ་མྱོང་ཡང༌། །
བུ་ངའི་སེམས་ཀྱི་རྒྱ་མཚོའི་དབུས་སུ་འདོད་པའི་རྦ་རླབས་འཕྱུར་མྱོང་མེད། །
ཁ་ནས་འཛུམ་དཀར་སྟོན་པ་ཙམ་ལས་སེམས་ཁམས་གཅིག་ཏུ་མཐུན་མྱོང་མེད། །
མི་མངོན་བརྩེ་སེམས་འོད་ཀྱི་ཞགས་པས་སུ་ཞིག་ལ་ཡང་བཅིང་མྱོང་མེད། །
མི་ཚེའི་ལམ་ན་མཉམ་དུ་བཞུད་འདོད་སེམས་པའི་ཟུར་ན་འཁོར་མྱོང་མེད། །
ཀླུ་སྒྲུབ་ཞབས་ཀྱིས་བྱིན་གྱིས་བརླབས་པའི་ཨམ་ར་བ་ཏི་གནས་མཆོག་ན། །
ཆོས་ཞུ་འབུམ་ཕྲག་ལྷན་དུ་འདུས་པའི་གསུང་ཆོས་ར་བའི་སྡོད་གུར་འོག །
ང་གཉིས་དང་པོར་ཐུག་འཕྲད་བྱུང་སྟེ་སྙིང་གཏམ་བཤད་རེས་བྱས་ནས་བཟུང༌། །
ཁྱེད་ཀྱི་མཛེས་པའི་ལུས་ངག་ཡིད་གསུམ་བུ་ངའི་སེམས་ལ་ཡོངས་སུ་སིམ། །
བཤད་གིན་བཤད་གིན་ཡང་ནས་ཡང་དུ་ཉན་འདོད་ཁྱེད་ཀྱི་གསུངས་དབྱངས་དང༌། །
ཕྲ་སྦོམ་རན་ཞིང་དཀར་ནག་འཚམ་པོའི་འཇོ་སྒེག་ཁྱེད་ཀྱི་སྐུ་གཟུགས་དང༌། །
དྭངས་གཙང་ལྷད་མེད་བརྩེ་གདུང་ཅན་གྱི་གང་ཁྱེད་ཐུགས་རྒྱུད་འདི་རྣམས་ནི། །
ཡང་ཡང་སེམས་སུ་དྲན་པའི་མོད་ལ་བརྩེ་གདུང་མེ་ལྕེ་ལྷག་པར་འཕེལ། །
བསླུ་བྲིད་དྲི་མས་གཞར་ཡང་མ་གོས་ཟོལ་མེད་ཁྱེད་ཀྱི་གཤིས་ཀ་དང༌། །
རྒན་གཞོན་ཐམས་ཅད་འཛུམ་གྱིས་བསུས་པའི་ཡིད་འོང་ཁྱེད་ཀྱི་ཀུན་སྤྱོད་སོགས། །
བུ་ངའི་སེམས་སུ་འཆར་ཐེངས་རེ་ལ་བརྩེ་གདུང་རྒྱ་མཚོ་འཁོལ་གྱུར་ཏེ། །
ཕྲ་ཆུང་མིག་དང་སྨྱུ་གུའི་རྩེ་ནས་མིག་ཆུ་བཞུར་བ་ཉུང་ཉུང་མིན། །
མི་ཚེའི་ལམ་ན་ཁྱེད་དང་ལྷན་དུ་མཉམ་གཤིབ་མཉམ་བགྲོད་བྱེད་ན་འདོད། །
སྲོག་གི་རྟེན་དབང་སྙིང་ཆུང་དམར་པོ་ཁྱེད་ཀྱི་ཆེད་དུ་འབུལ་དགོས་དྲན། །
ང་ལ་བཅངས་པའི་ལྷད་མེད་བརྩེ་གདུང་ང་ཡིས་ནམ་ཡང་བརྗེད་མི་སྲིད། །
བློ་མཐུན་མཛེས་ལྡན་ཁྱོད་ཀྱི་སླད་དུ་ང་ཡི་ཡོད་ཚད་གཏོང་དགོས་དྲན། །
འོན་ཏེ་བདག་ནི་ལས་དབང་བཙན་པོས་འཆར་གཞི་གཏན་འབེབས་བྱས་པའི་འོག །
ལྕགས་རི་དམར་པོས་མཐའ་ནས་བསྐོར་བའི་བཙོན་ཁང་ནང་དུ་བཙུད་ཟིན་པས། །
འདོད་པའི་ནམ་མཁར་ཁྱེད་དང་ལྷན་དུ་འཕུར་ལྡིང་རྩེན་པ་འདོད་ན་ཡང༌། །
མི་མངོན་ཁྲིམས་ཀྱི་འཆིང་ཐག་དཀར་པོ་བཀྲོལ་ལ་ནམ་ཡང་འབད་མ་ནུས། །
ང་ཡི་ལས་ལ་བསམ་ཤེས་གནང་རོགས་ང་ཡི་མཛེས་ལྡན་སྒྲོལ་མ་ལགས། །
ཁྱེད་ཉིད་སྐྱིད་པོར་ཡོངས་བར་ཤོག་ཅིག་ང་ཡི་གྲོགས་མོ་སྒྲོལ་མ་ལགས། །
ང་གཉིས་ཕྱི་མར་མཉམ་འཛོམས་ཡོང་ངེས་ང་ཡི་སྙིང་གི་སྒྲོལ་མ་ལགས། །
ཁྱེད་ཀྱང་འདི་ལྟར་སྨོན་ལམ་འདེབས་རོགས་ང་ཡི་ཕྱི་མའི་སྒྲོལ་མ་ལགས། །
༢༠༠༦ ༣ ༡༦ ཉིན་ཕྱག་ཁང་དུ་བྲིས། ༼ནོར་ལྡེ་༽ཐོག་བཀོད།
ཕྱིར་དྲན་ཐེངས་གཅིག་གི་ན་ཟུག
སྙིང་གྲོགས་ K.P ལ་དྲན་རྟེན་དུ་ཕུལ།
གང་གི་མཚན་སྙན་རྣ་བའི་བུ་ག་རུ། །
རྒྱུ་བ་ཙམ་གྱིས་སྙན་རིག་སྨྲ་བའི་འདབ། །
ལྷག་པར་གྲོལ་བའི་དབྱངས་ཅན་ངག་གི་ལྟ། །
ཁོ་བོའི་མགྲིན་པའི་ཀློང་དུ་བཞུགས་པར་མཛོད། །
ང་ཡི་བླ་མ་མཁས་དབང་དགེ་ཆོས་ཀྱི། །
འདུ་བྲལ་སྙིང་པོ་མེད་པར་རྟོགས་པའི་གླུ། །
རྒྱུན་དུ་ཁ་འདོན་ཟོལ་གྱིས་ཀློག་ན་ཡང༌། །
འདུ་བྲལ་གདུང་བས་ངའི་སེམས་སྟོང་དུ་འབིགས། །
རྡ་རམ་ས་ལའི་ནགས་ཀླུང་མཐུག་པོའི་ཁྲོད། །
ཁྲི་གདུགས་གཞོན་ནུའི་འཛུམ་མདངས་ཀུན་པ་འཕྲོ། །
འདབ་ཆགས་ཁོ་མོའི་གྲེ་འགྱུར་མཁའ་ནས་སྒྲོག །
ཆོས་ཀྱི་སྒྲ་དབྱངས་ལྷང་ལྷང་རྣ་བར་ལྷུང༌། །
བུ་ངས་ཉིན་ཐོ་བྲིས་དེབ་ཚུར་ལ་བླངས། །
ལོ་གཉིས་གོང་གི་ཉིན་ཐོ་ལན་གཅིག་བཀླགས། །
རབ་རིབ་སྐྱོ་སྣང་འབར་བའི་ཟུར་ཁ་ནས། །
རྒྱང་རིང་མཛའ་གྲོགས་ཁྱེད་ཉིད་སླར་ཡང་ཤར། །
འདས་པའི་ལྷན་དུ་འཛོམས་པའི་སྤྲོ་སྣང་དང༌། །
ད་ལྟའི་སོ་སོར་གྱེས་པའི་སྐྱོ་སྣང་གཉིས། །
དགའ་སྐྱོ་བསྣོལ་མར་འཐབ་པའི་ཧྲག་བར་ནས། །
མིག་ཆུའི་ཐིགས་པ་དབང་མེད་ས་ལ་ལྷུང༌། །
ཁྱོད་ནི་རྒྱང་རིང་བལ་པོའི་ཡུལ་ནས་འོངས། །
ང་ནི་ཐག་རིང་ཁ་བའི་ལྗོངས་ནས་སླེབས། །
རྒྱས་མེད་ས་མཐའ་འདི་རུ་འཛོམས་པ་འདི། །
ཚེ་སྔོན་ལས་འཕྲོའི་མདུད་པ་ཐེབས་པ་ལགས། །
སུ་དང་གང་གིས་མཚམས་སྦྱོར་མ་བྱས་ཤིང༌། །
དབང་དང་ཤེད་ཀྱིས་བཙན་སྦྱོར་མ་བྱས་ཀྱང༌། །
སེམས་ཁམས་གཅིག་ཏུ་མཐུན་པའི་ལམ་སྣེ་ནས། །
བློ་སེམས་ལྷན་དུ་འདྲེས་པའི་སྣང་བ་བྱིན། །
ཤེས་རིག་འོད་སྣང་འབར་བའི་འཛིན་ཁང་ནང༌། །
ཁྱེད་ཀྱིས་མ་མཁྱེན་ང་ཡིས་བཤད་ཁུལ་དང༌། །
ང་ཡིས་མ་ཤེས་ཁྱེད་ཀྱི་སློབ་པ་སོགས། །
གཅིག་ཕན་གཅིག་གྲོགས་བྱས་པའི་ལོ་རྒྱུས་དྲན། །
ང་ཚོའི་སློབ་གྲྭའི་གུང་སེང་འགའ་ཤས་སྐབས། །
ཨམ་ཕྲག་ནང་དུ་དངུལ་ལོར་ཉུང་ན་ཡང༌། །
ཁྲོམ་དང་སྡུམ་རའི་ནང་ལ་སྤྲོ་འཆམ་དུ། །
ཕྱིན་པའི་སྤྲོ་སྣང་ཚོར་བ་སླར་ཡང་དྲན། །
ཁྱེད་ཀྱིས་ཕ་མས་ང་དང་མ་འགྲོ་ཞེས། །
བཀག་སྡོམ་ཇི་ཙམ་གནང་ཀྱང་ཁྱེད་ཉིད་ནི། །
ལྷད་མེད་བརྩེ་གདུང་སེམས་སུ་ཉར་བྱས་ཏེ། །
ང་དང་ལྷན་དུ་ཡོང་བའི་ཆུལ་དེ་དྲན། །
ཆོལ་ཁ་ལུང་ཚན་སོ་སོ་མི་གཅིག་ཅེས། །
ཕྱོགས་ཞེན་ནག་པོའི་སོག་ལེ་ཟད་ཏོ་ཡིས། །
སླད་མེད་བརྩེ་གདུང་དམ་པའི་རྡོ་རྗེ་འདི། །
ནམ་ཡང་བཏུབ་ཐབས་མེད་འདི་དངོས་པོའི་གཤིས། །
བརྩེ་གདུང་མངར་མོའི་ཚོར་བ་ལ་རོལ་ཏེ། །
ལོ་ཟླའི་འཕྲེང་བ་རྫོགས་པ་ངས་མ་ཤེས། །
ཡུད་ཀྱིས་རྫོགས་པའི་ལོ་ཟླའི་འཕྲེང་བའི་ནང༌། །
ཁྱེད་དང་ང་གཉིས་ཕན་ཚུན་ཁྲོ་མ་མྱོང༌། །
སྡུག་དུས་ཐུང་དུ་གཏོང་བའི་ཐབས་མེད་ན། །
སྐྱིད་དུས་རིང་དུ་གཏོང་ཐབས་ག་ལ་ཡོད། །
ཅེས་པའི་དགེ་ཆོས་སྨྱོན་པའི་ལེགས་བཤད་ལ། །
ཉམས་མྱོང་ཐོག་ནས་བདེན་ཁ་ལན་གཅིག་བྱིན། །
ང་གཉིས་ཕན་ཚུན་ལས་ཀྱིས་འཕྲད་གྱུར་ཅིང༌། །
ང་གཉིས་ཕན་ཚུན་ལས་ཀྱིས་བྲལ་གྱུར་བ། །
ཡོད་ཚད་ལས་ལ་བཅོལ་བའི་རྨོངས་ཞེན་ངས། །
ལས་ལ་འཁང་ར་བྱས་པ་ཉུང་ཉུང་མིན། །
ཁྱེད་ཀྱིས་མདུན་ལམ་ཁྱེད་ཀྱིས་འཚོལ་དགོས་ལ། །
ང་ཡི་མི་ཚེ་ང་ཡིས་བསྐྱལ་དགོས་པས། །
མདུན་ལམ་ཆེད་དུ་ཁྱེད་ཉིད་ཐག་རིང་དུ། །
ཕེབས་པ་དེ་ལ་འཕང་ར་ཅི་ཡང་མེད། །
མཉམ་དུ་ཡོད་དུས་ངའི་སེམས་སྐྱིད་དྲགས་ན། །
མཉམ་དུ་མེད་དུས་ངའི་སེམས་ཅི་མི་སྡུག །
སྡུག་གི་ཁུར་བོ་རང་གི་འཁྱེར་བྱས་ཏེ། །
མིག་ཆུའི་ཐིགས་པ་སེམས་སུ་གསོག་བཞིན་ཡོད། །
རྒྱང་རིང་མཁའ་ནས་ཉི་འོད་འཕྲོ་བ་ན། །
ས་ནས་པད་མོའི་འཛུམ་མདངས་བཞད་གྱུར་ན། །
ཁྱེད་ཉིད་ཐག་རིང་ཡུལ་དུ་ཕེབས་ན་ཡང༌། །
བརྩེ་གདུང་མདུད་པ་ཆད་ཐབས་ག་ལ་ཡོད། །
སྐྱོ་གདུང་ན་ཟུག་སེམས་སུ་འབར་བཞིན་དུ། །
སེམས་ཚོར་སྐྱུར་མོ་སྙན་ངག་རིས་སུ་ཕབ། །
ཁྱེད་ཉིད་ཕྱིས་སུ་བདག་གིས་མ་མཇལ་བར། །
དྲན་རྟེན་རྡོ་རིང་ཟོལ་གྱིས་བདག་གིས་བཞག །
༢༠༠༨ ༢ ༡༤ ཉིན་འཛམ་གླིང་རྒྱལ་སྤྱིའི་བརྩེ་གདུང་གི་ཉི་མོར་ཕྲན་རི་བོ་གངས་ཅན་པའི་ཐ་སྙད་རིག་པ་སྨྲ་བའི་གྲལ་མཐར་ལུས་པའི་བེ་རི་དཔལ་ལྡན་རྣམ་རྒྱལ་ལམ་ལས་དབང་དང་འགན་དབང་གིས་བྱིན་པའི་མིང་བེ་རི་སྨྱོན་ཕྲུག་གིས་རྡ་རམ་ས་ལ་རྣམ་རྒྱལ་གྲྭ་ཚང་གི་གཤམ་འོག་ཏུ་བྲིས་པ།
ཟླ་འོད་འོག་གི་སྙིང་གཏམ།
ཨ་ལྕགས་ T.M ལགས་སུ་ཕུལ་བ།
ལྷོ་རླུང་བསིལ་བོས་ལུས་པོ་གྲང་ཤུར་ཤུར། །
སྙིང་གཏམ་དྲོན་མོས་སེམས་ཁམས་ཚ་ལམ་ལམ། །
ཚ་གྲང་བསྣོལ་མར་འཐབ་པའི་ཧྲག་བར་ནས། །
གང་ཁྱེད་གསུང་སྐད་ཐོས་པའི་སྐྱིད་ལྷང་ལྷང༌། །
ལག་ཐོགས་ཁ་པར་འཕྲུལ་གྱི་རྒྱུད་ལམ་ནས། །
ང་གཉིས་ཕན་ཚུན་ངོ་ཤེས་གྱུར་ནས་བཟུང༌། །
ངའི་སེམས་མཛའ་བརྩེའི་འོད་ཞགས་དཀར་པོ་ཡིས། །
གང་ཁྱེད་ནམ་ཡང་གློད་པ་གྱུར་མ་ལགས། །
སུ་དང་གང་གིས་ས་བོན་མ་བཏབ་ཅིང༌། །
ཆུ་ལུད་སྦྱོར་བས་ནམ་ཡང་མ་བསྐྱངས་པར། །
ངེད་གཉིས་སེམས་ཁམས་དྭངས་མའི་ཞིང་ས་རུ། །
མཛའ་བརྩེའི་མྱུ་གུ་དབུས་འདི་ཨེ་མ་རྨད། །
དབང་ཆེན་ཚངས་པས་བཙན་བཀས་མ་སྐུལ་ཞིང༌། །
ཡུལ་ཁྲིམས་བཙན་པོས་ལྷན་དུ་མི་སྦྱོར་བར། །
ལྷད་མེད་སེམས་ཁམས་ཕན་ཚུནའདྲེས་པ་འདི། །
དོན་དམ་མཛའ་བརྩེ་དངོས་ཞེས་ཁོ་བོས་འདོད། །
གང་ཁྱེད་ཞལ་རས་མཇལ་སྐལ་མ་ཐོབ་ཅིང༌། །
གང་ཁྱེད་གསུང་སྐད་དངོས་སུ་ཐོས་མ་མྱོང༌། །
འོན་ཏེ་ང་གཉིས་ལྷད་མེད་ཡིད་སེམས་དེ། །
ཕན་ཚུན་དམ་གྱིས་འཁྱུད་འདི་ཨེ་མ་མཚར། །
ལས་ངན་ཁོ་བོས་མི་ལུས་ཐོབ་ན་ཡང༌། །
ཕ་མ་སྤུན་མཆེད་མེད་པའི་ད་ཕྲུག་གྱུར། །
དེ་སླད་ནམ་མཁའི་ལྷ་ཡིས་གནངས་པ་བཞིན། །
ཨ་ལྕགས་ཁྱེད་ཉིད་ཡོད་པས་ཡིད་བློ་ཚིམ། །
དེ་རིང་མཚན་མོར་ཟླ་འོད་དཀར་པོའི་འོག །
ལག་ཐོགས་ཁ་པར་འཕྲུལ་གྱི་རྒྱུད་ལམ་ནས། །
ང་གཉིས་ཕན་ཚུན་སྙིང་གཏམ་ལྷུག་པོ་རུ། །
གླེང་བཞིན་སྡོད་པའི་དུས་སྐབས་བརྗེད་མི་འགྱུར། །
ཉིན་མོར་ནམ་མཁའི་དབྱིངས་སུ་ཉི་མ་གསལ། །
མཚན་མོར་དུང་ཟླ་དཀར་པོའི་འོད་རླབས་འཛུམ། །
ཉི་ཟླ་ཟུང་འདི་ལྷན་དུ་མི་གནས་པས། །
ཡང་ཡང་བསམ་ཚེ་ཡིད་སེམས་ཕངས་པའི་གནས། །
ངེད་གཉིས་ཨ་རོགས་ཁམས་པའི་ཕ་ས་ནས། །
ས་མཐར་ཡོང་བའི་ཕུགས་བསམ་གཅིག་མཚུངས་ཏེ། །
མི་ཚེའི་མདུན་ལམ་ཆེད་དུ་ཡིན་ལགས་པས། །
དེ་སླད་སློབ་སྦྱོང་འབད་པས་བྱེད་པར་འཚལ། །
ཕྲན་ཆུང་བདག་ནི་ཤེས་ཚད་དམན་གྱུར་ཅིང༌། །
གང་ཁྱེད་ང་ཡི་ཨ་ལྕགས་ཡིན་ལགས་ན། །
དེ་ལྟར་གླེང་བའི་འོས་བབ་མི་འདུག་ཀྱང༌། །
མཛའ་བརྩེའི་སེམས་ནས་ཤོར་བས་ནོངས་པ་ཅི། །
༢༠༠༨ ༥ ༢༠ ཉིན་རང་ཤག་ཏུ་བྲིས།
བག་ཆགས་ཀྱི་འཕག་ཚག
T.T ཀྱི་མཛུམ་མདངས་སླར་ཡང་མཇལ་རྗེས།
གངས་ལྗོངས་གསོལ་མགྲོན་ཁང་གི་ཡང་སྟེང་ན།།
ཇ་ཞིག་བཏུང་ནས་མར་ལ་འགྲོ་ཤུལ་དུ། །
ཡུན་རིང་སེམས་ལ་གནས་པའི་ན་ཆུང་མ། །
ག་ལེར་ཕྲ་ཆུང་ཟུར་གྱིས་མཇལ་ཙམ་བྱུང༌། །
དེ་རིང་མཇལ་བ་ཐོག་མ་ག་ལ་ཡིན། །
ཁྱེད་ཉིད་མཇལ་བའི་གྲངས་ཀ་སུ་ཡིས་ཆོད། །
དེ་རིང་ཁྱེད་ཉིད་མཇལ་བའི་ཟུར་ཀ་ནས། །
གནོད་ཐབས་མེད་པའི་ཚོར་བས་མྱོས་པར་གྱུར། །
རྒྱང་རིང་དུང་ཟླ་དཀར་པོ་འཛུམ་ཙམ་གྱིས། །
སེམས་མེད་ཀུ་མུ་ད་ཡང་བཞད་གྱུར་ན། །
ཡིད་འོང་མཛེས་ལྡན་གཞོན་ནུ་འཛུམ་པ་ན། །
འདོད་ལྡན་ང་འདྲ་ཅིའི་ཕྱིར་བརྐམ་མི་འགྱུར། །
དགྱེས་པའི་ཚོར་འདུ་སེམས་དབུས་མེད་ན་ཡང༌། །
ཕྱི་རོལ་བཞིན་གྱི་དཀྱིལ་འཁོར་འཛུམ་པ་ཡིས། །
ཟོལ་གྱིས་བཅོས་པའི་སྒྱུ་མའི་བསླུ་བྲིད་འདིས། །
ངའི་སེམས་བསླུས་པ་གྲངས་ཀྱིས་ག་ལ་ཆོད། །
འོན་ཏེ་ཡུན་རིང་སེམས་སུ་གོམས་གྱུར་པའི། །
བརྩེ་གདུང་ཟབ་མོའི་བག་ཆགས་མཐུག་པོ་འདིར། །
དགའ་བའི་འཛུམ་གྱི་འོད་མདངས་འཕྲོ་བའི་ཚེ། །
བརྩེ་གདུང་སླར་ཡང་མི་འབར་རང་དབང་ཅི། །
དེ་རིང་ཁྱེད་ཉིད་འཛུམ་པས་དགའ་ལྷང་ལྷང༌། །
སང་ཉིན་ཁྱེད་ཉིད་ཁྲོས་བས་སྐྱོ་ལྷང་ལྷང༌། །
དགའ་སྐྱོ་སྣོལ་མར་འཐབ་པའི་ཧྲག་བར་ནས། །
བཏང་སྙོམས་ཚོར་བ་ཞིག་ལ་རོལ་ན་འདོད། །
དགའ་སྐྱོ་འདྲེས་མའི་མི་ཚེ་ཐུང་ངུ་འདིར། །
བརྩེ་གདུང་འདྲ་མིན་ཀུན་གྱི་འབིགས་མྱོང་བས། །
བརྩེ་གདུང་ཞེས་པའི་འཕྲང་ལམ་དོག་པོ་དེ།།
ལན་གཅིག་དྲན་པས་སེམས་སུ་འཇིགས་སྣང་འབུམ།།
བརྩེ་གདུང་ཞིང་དུ་ཇི་ཙམ་འགྲིམས་གྱུར་བ། །
བརྩེ་གདུང་འདི་ལ་ཞེན་པ་དེ་ཙམ་ལོག །
བརྩེ་གདུང་འདི་ལ་ཞེན་པ་ལོག་བཞིན་དུ། །
བརྩེ་གདུང་འདི་ལྟར་མྱོང་བ་ཅི་ཡི་ལས། །
དེ་རིང་སླར་ཡང་ཚིག་ཐག་ཆོད་པའི་ཐོག །
བརྩེ་གདུང་འདི་ནི་སྡུག་བསྔལ་རྒྱ་མཚོ་རེད། །
ཅེས་བྱའི་མི་འགྱུར་རྡོ་རྗེའི་ཚིག་ཐུང་འདི། །
ང་དང་འདྲ་བར་ཕན་ཕྱིར་འདི་ན་སྨྲས། །
༢༠༠༧ ༥ ༢༤ ཉིན་ཏྲེ་ཧོར་ཁམས་ཚན་རྙིང་པར་བྲིས།
གནོན་མ་ཐུབ་པའི་འཕག་འཚག
L.G དང་སླར་ཡང་མཇལ་རྗེས།
ཆར་བ་ཟིམ་ཟིམ་འབབ་པའི་དགོང་མོ་དེར། །
མི་ཚོགས་འཚང་ཁ་རྒོད་པའི་སྲང་ལམ་དུ། །
འགྲུལ་པའི་ཡོ་ལང་ཆེ་བའི་འདུས་ཚོགས་ཁྲོད། །
ག་ལེར་འཆམ་འཆམ་ཟོལ་གྱིས་འགྲིམས་པའི་མོད། །
དཀར་དམར་ཚོན་མདངས་སྤེལ་མའི་ཆར་གདུགས་འོག །
ཡུན་རིང་ང་ཡི་སེམས་སུ་གནས་བཅའ་བའི། །
གང་ཁྱེད་ཟུང་ཟླ་དཀར་པོའི་བཞིན་རས་དེ། །
སླར་ཡང་ཁོ་བོའི་མིག་གི་བདུད་རྩིར་ཤར། །
ཁྱེད་ཉིད་ཕྲ་ཆུང་མིག་གིས་མཐོང་ཐེང་རེར། །
བརྩེ་གདུང་མེ་ལྕེ་སླར་ཡང་འབར་མོད་ཀྱང༌། །
དེ་སྐད་ཁྱེད་སྙན་གསོལ་བའི་གློ་ཁོག་ཅིག །
ད་ལྟ་བར་དུ་ང་ལ་སྐྱེས་མ་གྱུར། །
ལག་ཏུ་མཚོན་ཆ་ཐོགས་ནས་ཕ་རོལ་ལ། །
རྒོལ་བའི་གཡུལ་སར་འཇུག་པར་ཁམས་ཕྲུག་རྣམས། །
གཞན་ལས་འཇོན་ཐང་ཆེ་ཡང་གང་ཁྱེད་དྲུང༌། །
སྡར་མ་འདི་འདྲ་གྱུར་པ་ཅི་ཡིན་ནམ། །
ཡང་ཡང་བསམ་མཐར་དེའི་ལན་ཅང་མ་རྙེད། །
ཅི་ཡང་མེད་འདི་དེ་ཡི་ལན་ཡིན་སྙམ། །
བརྩེ་གདུང་གཡུལ་སར་འགྲིམས་སྐབས་སྡར་མ་རྣམས། །
དོན་དམ་བརྩེ་གདུང་དངོས་ཀྱི་དཔའ་བོ་ཡིན། །
དེང་སང་སྲང་ལམ་ཁྲོད་ཀྱི་སྐད་ཆ་ལ། །
གང་ཁྱེད་མཛེས་སྡུག་འབར་བའི་གཟི་འོད་ཀྱིས། །
དེ་གར་དགེ་སློབ་ཀུན་གྱི་ཡིད་སེམས་རྣམས། །
ཅིག་ཅར་འཕྲོག་ཅེས་ཐོས་འདི་དངོས་ཡིན་ནམ། །
གང་ཁྱེད་པད་མ་དཀར་པོའི་ཟེའུ་འབྲུ་ལ། །
གསེར་སྦྲང་གཡུ་སྦྲང་སྟོང་གི་ལྡིང་བསྐོར་གྱིས། །
ཧབ་ཐོབ་འགྲན་རྩོད་འབར་བའི་ཟུར་ཁ་དེར། །
ཉམ་ཆུང་བུང་བ་ང་ཡང་འཁོར་བཞིན་ཡོད། །
དབྱིན་བོད་ཤེས་བྱ་རིག་པའི་གཤོག་པ་ཞིག །
ཅུང་ཟད་སྐྱེས་པར་གྱུར་ཀྱང་དཔལ་འབྱོར་གྱི། །
གཤོག་པ་ཡ་གཅིག་དེ་དང་བྲལ་གྱུར་ན། །
དེ་སླད་ཁྱེད་ཉིད་ཐོབ་པའི་རེ་བ་མེད། །
མ་གཞིས་བརྩེ་གདུང་ཞེས་པའི་སེམས་ཚོར་འདི། །
གང་ལ་འབུལ་ཡུལ་དེ་ཉིད་ཁོ་ནའི་ཆེད། །
རང་གི་ཡོད་ཚད་ཕུལ་འདོད་འདུ་ཤེས་དེར། །
དོན་དམ་བརྩེ་གདུང་དངོས་ཞེས་བརྗོད་པ་ལས། །
རང་ལ་དེ་ཉིད་འཐོབ་འདོད་རྐྱང་བ་ཡིས། །
ཕ་རོལ་དགོངས་པ་འཚོམ་པའི་བྱ་སྤྱོད་དེར། །
འདོད་ཆགསཙམ་ལས་བརྩེ་གདུང་དངོས་མིན་ཞེས། །
མཁས་དབང་ཀུན་གྱིས་བཤད་པ་དོན་ལ་གནས། །
ཁྱེད་ཉིད་བདག་ལ་ཐོབ་པའི་རེ་བ་ཞིག །
ད་ལྟ་བར་དུ་གུས་པས་མ་བཅངས་ཤིང༌། །
ཁྱེད་ཉིད་བདེ་སྐྱིད་ཡོང་བའི་རེ་བ་ཞིག །
འཇིག་རྟེན་ཕྱི་མའི་ཡུལ་དུའང་བརྒྱབ་ངེས་ཡིན། །
ཁོ་བོའི་སེམས་ལ་བརྐོས་པའི་རི་མོ་དེ། །
ཁྱེད་ལ་སྟོན་དགོས་ང་ཡི་འོས་འགན་ཡིན། །
འོན་ཏེ་ཁྱེད་ཉིད་དགོངས་པ་འཚོམ་སྙམ་ནས། །
ད་བར་ཁྱེད་ལ་དངོས་སུ་བརྗོད་མ་ནུས། །
འོན་ཀྱང་ང་ཡི་གདོང་དང་བྱ་སྤྱོད་ལ། །
བལྟས་ན་ཁྱེད་ཀྱི་གསལ་བར་མཁྱེན་ངེས་ཀྱང༌། །
སྣང་བ་མཐོན་པོའི་སྟོང་བསམ་མཁའ་དབྱིངས་ནས། །
ཉམ་ཆུང་བུང་བ་ང་ལ་གཟིགས་མ་གྱུར། །
ཉེ་སྔོན་གངས་དཀར་སེམས་ཀྱི་རང་མདངས་ཞེས། །
ཁོ་བོའི་སྙན་རྩོམ་དེབ་ཏུའང་འགས་ཤས་ཤིག །
བྲིས་ཀྱང་གང་ཁྱེད་བོད་ཀྱི་རྩོམ་རིག་ལ། །
དོ་སྣང་མེད་ཕྱིར་གཟིགས་པ་མེད་ལ་སྐད། །
ཁྱེད་ལ་དེ་སྐད་བརྗོད་པར་མ་ནུས་པས། །
གྲགས་པོ་ཀུན་གྱིས་ང་ལ་སྡར་མ་ཞེས། །
མཚང་འབྲུའི་ཚིག་གི་མདའ་མོ་འཕང་གྱུར་ཀྱང༌། །
བརྩེ་གདུང་ཕྲབ་ཀྱིས་འགོག་ཐབས་བྱེད་བཞིན་ཡོད། །
སྐྱོ་སྣང་བསྣོལ་མར་འཐབ་པའི་སྙན་ངག་ཅིག །
སླར་ཡང་ཤོག་དཀར་ངོས་སུ་ཕབ་ཡོད་ཀྱང༌། །
འབྲི་མཁན་ང་རང་ཀློག་མཁན་ང་རང་ལས། །
ཁྱེད་ལ་བཤད་ཐབས་མེད་པ་ང་ཡིས་ཤེས། །
ལས་དང་རྟེན་འབྱུང་ནམ་ཡང་མི་བསླུ་བས། །
ཉིན་ཞིག་ལས་དབང་ཕྲ་མོའི་གྲུ་ཁ་ནས། །
ང་ཡི་ཁོག་པ་བཤགས་ནས་བརྩེ་གདུང་འདི། །
གང་ཁྱེད་སྤྱན་གྱིས་གསལ་བར་གཟིགས་ན་བསམ། །
༢༠༠༧ ༨ ༡༢ ཉིན་རང་ཤག་ཏུ།
རང་མོས་བུང་བའི་གཤོག་སྒྲ།
རྙིད་ཟིན་པའི་མེ་ཏོག
བརྩེ་གདུང་གི་འཕྲལ་ལམ་རྒྱུད་ནས་
བདེ་སྐྱིད་ཀྱི་འོད་སྣང་འཚོལ་སྐབས་
བདག་ལ་ཐོབ་པ་ནི་སྡུག་བསྔལ་གྱི་ཁུར་པོ་འདིར་རེད་ལ་
ཤོར་ཚར་བ་ནི། མི་ཚེ་་་་་་་་་དམིགས་ཡུལ་་་་་་་་མདོར་ན་ཡོད་ཚད་ནས་ཡོད་ཚད་རེད།
ད་དུང་
སླར་ཡང་ལམ་ཁ་དེར་བསྐྱོད་དགོས་པ་ནི་
སུ་ཞིག་གིས་བྱིན་པའི་རྡོག་ཁྲིས་རེད།
བླ་མ་ལ་དྲིས་ན། འདི་ཁྱེད་ཀྱི་བག་ཆགས་ངན་པའི་རྣམ་སྨིན་རེད་ཟེར།
ཕ་མ་ལ་དྲིས་ན། འདི་ཁྱེད་ཀྱིས་མ་འཇོན་པའི་རང་སྡུག་རེད་ཟེར།
གྲོགས་པོ་ལ་དྲིས་ན། འདི་ཁྱེད་ཀྱི་བརྩེ་གདུང་གི་གཟི་བརྗིད་རེད་ཟེར།
རྣམ་སྨིན་ཡིན་སྲིད་ལ། རང་སྡུག་ཀྱང་ཡིན་སྲིད། གཅིག་བྱས་ན་གཟི་བརྗིད་ཀྱང་ཡིན་སྲིདཧཧཧཧཧཧ་
གང་ཡིན་ཡང༌། ངས་འདོད་པ་ནི། བརྩེ་གདུང་གི་རྙོག་འཛིན་མེད་པའི་དྲོད་འཇམ་ལྡན་པའི་འཚོ་བ་དེ་རེད་ལ།
འཚོ་བ་དེར་རོལ་དགོས་ན། ཡང་ན་ཁྱེད། ཡང་ན་ང
ལྷན་དུ་ཡོང་མི་སྲིད།
ཅིས་ནས་ཀྱང་་་་་་་་་་་་་་་་་་་་་་་་༌།།་
རབ་རིབ་ཀྱི་དྲན་སྣང༌།
ཤབ་ཤོབ་ཀྱི་ཆིག་ལབ།
དེ་རིང་གི་གནམ་གཤིས་ནི་ཅུང་གྲང་ཞིང་ཁོ་བོ་ཁང་ཐོག་ཏུ་བུད་དེ་
ནབ་ཁའི་ཉི་མ་ལ་རྒྱང་བལྟ་བྱེད་བཞིན་ཡོད།
ནམ་མཁའི་ཉི་མ་ནི། ཞོགས་པར་ཤར་ཕྱོགས་ནས་ཤར་ཞིང་དགོང་མོར་ནུབ་ཕྱོགས་ནས་ནུབ་འགྲོ་ལ་སླར་ཡང་སང་ཉིང་ཤར་ཡོང་ངེས་རེད།
ངས་འདི་ལྟར་བསམ་གཞིགས་ཤིག་བྱས་དུས། ཉི་མ་འདྲ་བའི་ངའི་སེམས་ཁོང་གི་འོད་སྟོང་འབར་བའི་ཉི་མ་ནི་རྒྱང་རིང་དུ་བཞུད་ཟིན་པ་སྟེ་ཕྱིར་ནམ་ཡང་ལོག་མི་སྲིད།
ཟ་ན་འཐུང་ན། གོན་ན་བཏིང་ན། འགྲོ་ན་སྡོད་ན། ལང་ན་ཉལ་ན།
མདོར་ན་རང་ཉིད་ཁེར་རྐྱང་དུ་ལུས་ཤིང༌། ཁེར་རྐྱང་གི་ཚོར་བ་སྐྱུར་མོ་སེམས་ཁོང་དུ་སྦས་ཤིང༌། སྐྱོ་གདུང་གི་འཆི་མ་སྙུག་རྩེ་ཡིས་ཕྱིས་ནས།
བསམ་ཚད། བྲིས་ཚད། ཀློག་ཚད།
ཚང་མ་ཁྱེད་ཀྱི་སྐོར་ཤ་སྟག་རེད།
༢༠༠༨ ༢ ༡༣ ཉིན།
མེ་ཏོག་རྐང་གསུམ།
སྐུའི་འཁྲུངས་སྐར་ ༧༣ པ་ལ་ཕུལ།
ཁ་སང༌།
ཁ་བ་དང་བུ་ཡུག་རྒོད་པའི་མཚན་མོ་དེར།
མི་ཤ་ཟ་ཞིང་མི་ཁྲག་འཐུང་བའི་ཆེས་འཇིགས་རུང་བའི་དཔུང་ཚོགས་ཏེ
མཆེ་བ་དང་སྡེར་མོ་མི་ལྤགས་ཀྱིས་བཀབ་པའི་
ཁྱི་སྤྱང་ས་ཡ་དང་བྱེ་བ་དུ་མས་
ཡ་ང་ཞིང་ཉམ་ཆུང་བའི་ལུ་གུ་འབུམ་ཕྲག་དང་འབུམ་ཕྲག་
ཧམ་ཟོས་བྱས་ཤིང་སྲོག་གི་རྒྱུ་བ་ཡང་བཅད།
དེའི་ཚེ་གངས་དཀར་རི་བོ་དམར་པོའི་ཁྲག་གིས་སྦགས་ཤིང༌།
གངས་རི་ལ་དབང་བའི་སེང་གེ་ཁྱེད་ཀྱང་
ཁྲག་གི་རྒྱ་མཚོ་འཁོལ་ཞིང་འོ་འདོད་ཀྱིས་ས་གཞི་བཀང་བའི།
མུན་ནག་གི་ཞིང་ཁམས་ལ།
ཕྱིར་མིག་ཡང་ཡང་བལྟས་ཤིང༌།
བགྲོད་དཀའི་གངས་ལམ་དུམ་བུར་གཤགས་ནས།
རྒྱུས་མེད་པའི་ས་མཐའ་རུ་འཁྱམས་དགོས་བྱུང༌།
དེ་རིང༌།
རྒྱུས་མེད་པའི་ས་མཐའི་གྲུ་ཁ་ཞིག་ནས།
གསལ་ཐིང་ཐིང་གི་འོད་སྣང་ཐེངས་གཅིག་བཀྱེད་པས།
སེམས་ཁམས་ན་བུན་གྱིས་འཐིབས་པའི་
སྐྱེ་རྒུ་ཡོད་ཚད་ནས་ཡོད་ཚད་ཀྱིས།
གང་གི་མཚན་སྙན་སྒྲོགས་ཤིང་གང་ཉིད་ཀྱི་ཞབས་རྡུལ་ལ་
སྤྱི་བོས་འདུད་ཅིང་མཐར་ཐུག་གི་སྐྱབས་སུ་བསྟེན་
ངོ་མ། རང་ཡུལ་དང་བྲལ་བའི་ས་མཐའི་འཁྱམས་པོ་ཞིག་ས་མཐའ་ནས་ས་མཐའ་ལ།
གཟི་བརྗིད་དང་གོས་བཀུར། མཚན་སྙན་དང་གྲགས་པ།
བསྟོད་པ་དང་བསྔགས་བརྗོད་སོགས་མདོར་ན།
ཕྱི་ནང་ཀུན་གྱིས་ རང་གི་ དཀོན་མཆོག་བཞིན་
གཙུག་ཏུ་བཀུར་བ་ནི།
སེང་ཕྲུག་ང་ཚོས་ཆེས་སྤོབས་པ་བྱེད་འོས་པ་ཞིག་རེད་ཨང༌།
སང་ཉིན།
མེ་མདའི་ཁ་སྒོ་ནས་ལུས་པའི།
མགོན་སྐྱབས་མེད་པའི་འོ་འདོད་གྱེར་ཤིང་
མནན་གནོན་མི་བཟོད་པའི་ཚོ་ངོ་ཤོར་ལ་
རེ་ལྒུག་གི་རྨུ་ཐག་ཆད་ལ་ཉེ་བའི་
གངས་འདབས་ན་ཡོད་པའི་ང་ཚོའི་སྤུན་མཆེད་དེ་
ཁྱེད་ཀྱི་གདུལ་བྱ། ཁྱེད་ཀྱི་འབངས།
ཁྱེད་ཀྱི་བུ་ཕྲུག་ཚོ།
འདི་ལྟར་བཞག་མི་ཕོད་ལ།
ཁོང་ཚོའི་རེ་བ་ཆུད་ཟོས་སུ་ནམ་ཡང་གཏོང་མི་རུང༌།
མདོར་ན། སེང་གེ་ཁྱེད།
ཡུན་རིང་པོར་བཞུགས་དགོས་ལ།
ཁྱེད་ལ་སྒུག་བཞིན་པའི་བུ་ཕྲུག་ཚོ་དང་ངེས་པར་དུ་
མཇལ་འཛོམས་གནང་དགོས།
ཡ་ སེང་གེ་ཁྱེད།
སྐུ་ཚེ་བརྟན་རོགས་གྱིས།
༢༠༠༧ ༧ ༧ ཉིན་བེ་རི་འཇིགས་མེད་ཀྱི་སྙན་ངག་རྐང་གསུམ་ཞེས་པ་དེ་ལ་དཔེ་བལྟས་ནས་བྲིས།
གོམ་སྒྲ།
ཉི་འོད་དང་ཟླ་འོད་མེད་པའི་མཚན་ལྗོངས་དེར། །
གསལ་ལ་མ་གསལ་གྱི་ལཱ་སྒྲོན་ཐོགས་ཤིང་་་་་་་་་
བགྲོད་དཀའ་བའི་གངས་ལམ་དུམ་བུར་བཤགས་ཏེ་་་་་་་་
མིག་བཙུམ་སྟེ་མདུན་དུ་འོངས། །
ཤུལ་དུ་བཞག་པའི་རྐང་རྗེས་མེད་ཅིང༌། །
སྔོན་དུ་བསུ་བའི་མདུན་ལམ་མེད་པར་་་་་་་་
འཁྱར་འཁྱོར་གྱི་གོམ་འགྲོས་འགའ་ཡིས་་་་་་་་
རྒྱས་མེད་ཀྱི་ས་མཐར་ལྷུང༌།
སྐྱབས་བཅོལ་སའི་མགོན་མེད་ཅིང་་་་་་་་་
བློ་འདྲི་སའི་ཕ་མ་མེད་ལ་་་་་་་
ཤ་ཉེ་བའི་སྤུན་མཆེད་མེད་ཅིང་་་་་་་
སྙིང་ཉེ་བའི་གྲོགས་པོ་མེད་པར་་་་་་་་་་
སྤུང་པོའི་བརྟུལ་ཞུགས་བཟུང་སྟེ་་་་་་་
དེ་ལྟར་འཁྱམས་ཤིང༌། འདི་ལྟར་འཁྱམ་བཞིན་་་་་་་་་་་
ད་དུང་ཡང་་་་་་་་་་
ད་དུང་ཡང་་་་་་་
༢༠༠༨ ༡ ༢༨ ཉིན་རྡ་ས་རྣམ་རྒྱལ་གྲྭ་ཚང་གི་གཤམ་དུ་བྲིས།
བེ་རི་དཔལ་ལྡན་རྣམ་རྒྱལ། སྙུག་མིང་ལ་བེ་རི་སྨྱོན་ཕྲུག ཁམས་ཏྲེ་ཧོར་དུ་སྐྱེས། ༡༩༩༤ ལོར་རྒྱ་གར་ལ་བཙན་བྱོལ་དུ་འབྱོར་ནས་བློ་གསལ་གླིང་དུ་ཆོས་ཞུགས་བྱས། ༡༩༩༦ ནས་བློ་གསལ་གླིང་སློབ་གྲྭར་ཞུགས་ཏེ་དབྱིན་བོད་ཧིན་གསུམ་ལ་སྦྱངས་ནས་ལོ་ལྟར་རྩེ་ཕུད་དང་པོ་ཁོ་ནའི་རྒྱུགས་འབྲས་བླངས། མཁས་དབང་བེ་རི་དགེ་བཤེས་འཇིགས་མེད་དབང་རྒྱལ་ལགསཧཀྱི་དྲུང་ནས་སུམ་རྟགས་དག་གསུམ་དང༌། རྩོམ་རིག རྒྱལ་རབས་ལོ་རྒྱུས་སོགས་ལ་སྦྱངས། སློབ་གྲྭའི་ནང་རྩོམ་རྀག་འགྲན་བསྡུར་གྱི་ཁྲོད་བྱ་དགའ་ཡང་བླངས། ༢༠༠༢ ལོར་ཆོས་གྲྭར་ཞུགས་ནས་ཕར་ཚད་ཀྱི་གཞུང་ལ་སྦྱངས་འབྲས་སུ་ལོ་ལྟར་རྩེ་ཕུད་དང་པོ་ཁོ་ནའི་རྒྱུགས་འབྲས་བླངས། ༢༠༠༤ ལོར་སློབ་གྲྭའི་སྤྱི་ཁྱབ་རྒན་བདག་བྱས། ༢༠༠༥ ལོར་སློབ་མཐར་ཕྱིན་ནས་གངས་སུལ་གྱི་རོལ་དབྱངས་ཞེས་པའི་སློབ་གྲྭའི་དུས་དེབ་ཀྱི་རྩོམ་སྒྲིག་པ་བྱས། ༢༠༠༦ ལོར་ཆུང་དུས་སུ་བྲིས་པའི་སྙན་རྩོམ་ཕྱོགས་བསྒྲིགས་གངས་དཀར་སེམས་ཀྱི་རང་མདངས་ཞེས་པ་ཞིག་བཏོན། ༢༠༠༨ ལོར་བློ་གསལ་གླིང་ཤེས་ཡོན་ལྷན་ཚོགས་ཀྱི་དྲུང་ཡིག་བྱས། ལོ་དེར་མཐོ་སྒང་གི་ཉི་ཟེར་སྤྱི་ཚོགས་དུས་དེབ་ཀྱི་རྩོམ་སྒྲིག་པ་བྱས། ༢༠༠༩ ལོར་རིགས་ལམ་གྱི་གཟི་འོད་ཅེས་པའི་གཞུང་ཆེན་དོགས་དཔྱོད་ཀྱི་དུས་དེབ་ཀྱི་རྩོམ་སྒྲིག་པ་བྱས། ད་དུང་དུས་དེབ་གཞན་དང་ཚགས་ཤོག་དུ་མའི་ནང་དཔྱད་གཏམ་དང༌། སྙན་ངག བསྒྱུར་རྩོམ། ལྷུག་རྩོམ་སོགས་མང་དུ་སྤེལ། ད་ལྟར་བློ་གསལ་གླིང་དུ་ཕར་ཕྱིན་ཀྱི་གཞུང་ལ་སྦྱོང་བཞིན་ཐར་ཐོར་གྱི་རྩོམ་ཡིག་འདྲ་མིན་འབྲི་བཞིན་མཆིས།