i miss you!

hello

རྒན་ལགས། དགོངས་པ་མ་འཚོམས། ད་ང་ཐང་ཆད་སོང་།

རྒན་ལགས། དགོངས་པ་མ་འཚོམས། ད་ང་ཐང་ཆད་སོང་།

ལ་ལོང་གཡོ་བའི་སྤྲིན་ནག་གསེང་ནས་ཆར་གྱི་ཟེགས་མ་སྟོང་དུ་ཉིལ།།
ཆུ་འཛིན་རླུང་གིས་དེད་པའི་མཚམས་སུ་ཉི་མའི་ཚ་རླབས་གཤེད་དུ་འབར།།
དུས་དང་ཁོར་ཡུག་མགོ་མཇུག་ལྡོག་པའི་དབྱར་མ་དགུན་གྱི་ལྷོ་མཐའ་ནས།།
རིང་དུ་བྲལ་བའི་སློབ་དཔོན་ཁྱེད་ཉིད་དྲན་པའི་གདུང་བ་སྙིང་ཁར་ལྕི།།

མྱི་ཁའི་གདོན་འདྲེའི་རོ་དུང་འབུད་པའི་ཡོ་ལང་ཆེ་བའི་འཕྲང་ལམ་ནས།།
གོག་མ་འགྲོས་ཀྱིས་སྟངས་སྟབས་ཤིག་གིས་བདེན་པའི་རྒྱལ་སར་སྙེག་པར་བརྩམས།།
རི་སྐེད་ཅིག་ནས་ཕྱི་ལ་བལྟས་པས་ཁྱི་སྤྱང་སྟོང་གི་རྗེས་འདེད་མང་།།
ཡ་སོ་རིང་པོ་ཕྱི་ལ་ངོམས་ནས་ཟུག་རྔུ་སྟོང་གིས་རི་ལུང་གཡོ།།

སྤང་ཐང་དེ་ནས་རྩ་བཅུད་མངར་མོས་ལུས་སེམས་སྟོབས་ཤུགས་བསྐྱེད་བྱས་པས།།
ལྐུགས་པའི་ཁ་ནས་ལེགས་བཤད་ནོར་བུ་སྐྱུགས་པའི་གོ་སྐབས་ཡོད་མིན་ཡང་།།
རྩ་མཆོག་ཟས་པའི་ལྕི་བ་དྲོན་མོ་སྤང་ཐང་དེ་རུ་གཏོང་བྱེད་ན།།
ལུ་གུའི་ཟས་སུ་མི་འོས་ན་ཡང་བུད་ཤིང་དོད་དུ་རུང་ངོ་སྙམ།།

གཡང་དཀར་ལུག་གིས་འབའ་སྒྲ་སྒྲོག་པའི་སྔོ་ལྗང་ལྡན་པའི་སྤང་ཐང་ན།།
མཇུག་མ་མེད་པའི་སྤྲང་ཁྱི་རྒན་པོས་གཡང་དཀར་ལུ་གུ་བཙན་འཁྲིད་བྱས།།
མུན་ནག་བཙོན་གྱི་དྲ་བའི་གསེང་ནས་ལུ་གུ་སྟོང་གིས་ངུ་འབོད་སྒྲོག།
མགོན་སྐྱབས་མེད་པའི་ལུ་གུའི་ཚོགས་ལ་སྙིང་རྗེས་ལུས་སེམས་ཀུན་ནས་སྦྲིད།།

སྐད་སྒྲ་མེད་པའི་འོག་རླུང་ངར་མོས་མཁའ་རླུང་དྭངས་མ་སྦགས་པར་བྱེད།།
རྣག་དང་བསྲེས་པའི་ཁྲག་ཐིག་ཅིག་གིས་དྭངས་གཙང་ཆུ་བོ་སྙོག་པར་བྱེད།།
ད་ནི་སྲོག་དབུགས་ཆད་པར་གྱུར་ཀྱང་མཁའ་རླུང་འདི་ཉིད་རྔུབ་འདོད་མེད།།
བཀྲེས་སྐོམ་བརྒྱ་ཡིས་ཀུན་ནས་མནར་ཀྱང་ཆུ་བོ་འདི་ཉིད་འཐུང་འདོད་མེད།།

ཟོལ་མེད་སྙིང་གི་སྟོབས་ཤུགས་ཤིག་གིས་རེ་བའི་དཔལ་འབར་འདེགས་ན་ཡང་།།
སྤྲིན་ནག་སྟུག་པོའི་དྲག་ཆར་ཞིག་གིས་མེ་ལྕེ་གསོད་པར་རྟག་ཏུ་རྒོལ།།
དུས་ངན་ཆར་གྱི་བསྐལ་བའི་ནང་དུ་འོད་སྟོང་ལྡན་པའི་དཔལ་འབར་ལ།།
ལོངས་སུ་སྤྱོད་སྐལ་མེད་དམ་སྙམ་ནས་མེ་རླབས་ག་ལེར་ནང་དུ་བསྡུས།།

མིག་དང་ཡིད་དང་རྣ་བ་གསུམ་པོ་རྟག་ཏུ་ཡོངས་སུ་བགྲད་པ་ལས།།
དབྱིན་བོད་ཧིན་གྱི་ཤེས་བྱའི་ཉིང་བཅུད་ང་ཡི་ལུས་པོར་ཡོངས་སུ་སིམ།།
གང་དུ་བགྲོད་ཀྱང་གང་ཞིག་བྱེད་ཀྱང་ཕྱོགས་ནས་ཕྱོགས་ཀྱི་མཁས་རྒུ་ཡིས།།
རྙེད་དཀའི་མགྲོན་པོའི་ཟོལ་དུ་འབོད་པའི་འཚང་ཁའི་ངལ་བ་ཀུན་གྱིས་བསྟེན།།

དེང་རབས་ལོ་མཉམ་གཙུག་ལག་སྨྲ་བ་བརྒྱ་དང་སྟོང་གི་སྤྱི་བོ་རུ།།
མི་འཇིགས་སྤོབས་པས་དལ་གྱིས་འགྱིངས་པའི་རྫ་བ་ཚང་གི་འགྱུར་དགའི་བུ།།
བེ་རི་མཁས་པའི་ཐུགས་ཀྱི་སྲས་གྱུར་བེ་རི་དཔལ་ལྡན་རྣམ་རྒྱལ་ཞེས།།
ཉེ་བའི་གཙུག་ལག་རབ་འབྱམས་པ་དེས་ལྷོ་མཐའི་ཡུལ་ནས་ཁྱེད་ལ་ཕུལ།།

ལྷ་སྲས་འུ་དུམ་བཙད་པོ་དང་བདུད་རྒྱལ་གླང་དར་མ།

ལྷ་སྲས་འུ་དུམ་བཙད་པོ་དང་བདུད་རྒྱལ་གླང་དར་མ།

དེ་རིང་རྒྱུན་ལྡན་བཞིན་དཔེ་མཛོད་ཁང་དུ་ཡོང་ནས་རང་འཁྲིའི་ལས་ཀ་ཚར་རྗེས་རྐུབ་བཏེགས་སྟེང་བསྡད་ནས་དཔེ་ཆ་ཀློག་མགོ་བརྩམས། ཐལ་རྡུལ་ཆག་པའི་དྲ་མིག་གསེང་ནས་ཆོས་འབྱུང་མཁས་པའི་དགའ་སྟོན་དང་ཉལ་རོང་ཆོས་འབྱུང་སོགས་གནའ་དེང་གི་ལོ་རྒྱུས་གླེགས་བམ་མི་ཉུང་བ་ཞིག་བཏོན་ནས་ཤོག་ལྷེ་རེ་རེ་བཞིན་བསྒྱུར་ནས་ཡབ་མེས་དམ་པ་ཚོའི་རྣམ་ཤེས་འགུག་ཐབས་བྱས། མངར་སྐྱུར་འདྲེས་མའི་ལོ་རྒྱུས་ཀྱི་ཤུལ་ལམ་དེད་དུས་ངའི་མིག་ལམ་དུ་ཕྲ་ལྷམ་མེར་མངོན་ཡོང་བ་ནི་བོད་ཀྱི་རྒྱལ་པོ་དམ་པ་ལྷ་སྲས་འུ་དུམ་བཙན་པོའི་སྐོར་དེ་རེད།
འུ་དུམ་བཙན་པོ་ཞེས་པ་དེ་སུ་ཡིན་ཞེས་འདྲི་ན་མི་ཕལ་ཆེ་བས་མི་ཤེས་ལ་གོ་མྱོང་ཡང་མེད་ཚོད་རེད།  གླང་དར་མ་ཞེས་པ་དེ་སུ་རེད་ཅེས་འདྲི་ན་དེ་ནི་བོད་ཀྱི་བསྟན་པ་སྣུབ་མཁན་གྱི་བདུད་རྒྱལ་དེ་རེད། ཅེས་མཁས་བླུན་ཀུན་གྱིས་ཁ་གཅིག་གྲགས་རེད། དེ་ནི་ཕྱོགས་ཞེན་གྱིས་བཟི་བའི་ལོ་རྒྱུས་སྨྲ་བ་ཚོ་དང་དབང་འཛིན་པ་ཚོས་མི་མང་གི་སེམས་སུ་༼ཀླད་པ་དཀྲུ་བའི་ལམ་ལུགས༽ Brain Washing སྤྱད་ནས་གླང་དར་མ་ཞེས་པའི་མིང་གོ་བ་ཙམ་གྱིས་བདུད་རྒན་རྭ་ཅོ་ཅན་ཞིག་གི་སྣང་བརྙན་རང་བཞིན་གྱིས་འཆར་ཐབས་བཟོས་པའི་དབང་གིས་རེད་ལ། དེའི་རྐྱེན་པས་རང་གི་ཡབ་མེས་རྒྱལ་པོའི་མཚན་ཡང་མི་ཤེས་པར་བཟོས་ཡོད་པ་ནི་དེ་སྐབས་ཀྱི་ལོ་རྒྱུས་སྨྲ་བ་ཚོ་དང་དབང་འཛིན་པ་ཚོའི་བོད་ཀྱི་དེ་བྱུང་རིག་པའི་བརྒྱུད་རིམ་དང་ནག་ཉེས་ཆེ་ཤོས་ཤིག་རེད།

འུ་ཅག་བོད་པ་རྣམས་ནི་མཚམས་རེར་ཨ་གསར་གྱི་ཧེབ་ལང་རྒྱུར་ཤིན་ཏུ་དགའ་བའི་ལྗིད་ཁོག་མེད་པའི་མི་རིགས་ཤིག་ཡིན་མི་སྲིད་པ་མ་རེད། ད་དུང་རྨོངས་ཞེན་ཙམ་ལས་རིགས་ཞེན་གཏན་ནས་མེད་པའི་མི་རིགས་ཤིག་ཀྱང་རེད། བོད་ཀྱི་ལོ་རྒྱུས་རིག་པའི་ནང་མགོ་ཡི་རྒྱལ་པོ་ནས་ཐ་ན་ཁ་ལ་ཟ་རྒྱུ། ལུས་ལ་གྱོན་རྒྱུ། སེམས་ཀྱིས་སྤྱོད་རྒྱུ་ཚུན་ཆད་རང་ཉིད་ལ་ཕུན་སུམ་ཚོགས་པ་ཡོད་བཞིན་དུ་དེ་དག་རྒྱང་དུ་དོར་ནས་ཡུལ་ལུང་གཞན་ནས་གཡར་བ་དང་དཔེ་བལྟ་བ། ད་དུང་དེ་ལྟར་མ་ཐུབ་ཚེ་རང་གི་རིགས་འདི་ཡུལ་ལུང་གཞན་གྱི་རིགས་ཡིན་ཚུལ་སྒྲོག་བཞིན་པ་ནི་དེང་རབས་རྒྱལ་ཁབ་གཞན་གྱི་མདུན་དུ་ངོ་གནོངས་དགོས་པའི་གནས་སྟངས་ཤིག་ཏུ་གྱུར་ཡོད།

དཔེར་ན། བོད་པའི་སེམས་ཁམས་སུ་རྒྱ་གར་ནི་འཕགས་ཡུལ་ཞེས་གྲགས་པས་ལྷ་ཡུལ་ལྟ་བུ་ཞིག་མིན་འགྲོ་སྙམ་པའི་རྨོངས་ཞེན་གྱི་དབང་གིས་བོད་ཀྱི་རྒྱལ་པོ་དེ་ཡང་དེ་ནས་མཆེད་པར་སྒྲུབ་ཅི་ཐུབ་གནང་འདུག་པ་ནི་ཅུང་ངོ་གནོངས་དགོས་པ་ཞིག་རེད། གལ་ཏེ་དེ་ལྟར་ཡིན་ན་རྒྱ་གར་གྱི་རྒྱལ་པོས་རང་གི་སྲས་ཡིན་པ་མི་ལ་བསྟན་མི་ཕོད་པའི་མི་མདོག་ངན་དེ་འདྲ་ཞིག་བོད་ཡུལ་དུ་སྤྱུགས་པར་བོད་པ་རྣམས་ཀྱིས་ལྷ་ཡུལ་ནས་ཕེབས་པ་ཡིན་སྙམ་ནས་རྒྱལ་པོའི་ཁྲིར་ག་ལ་གསོལ་སྲིད། ལྷ་ཡུལ་ནས་ཕེབས་པ་ཡིན་ན་གཟུགས་མཛེས་ཤིང་ལྟ་ན་སྡུག་པ་ཞིག་ཡིན་པ་ལས་མདོག་ངན་པ་གདོན་འདྲེ་བཟོ་འདྲ་ཞིག་ལ་ལྷར་གཟུང་མཁན་ཞིག་སུ་ཡོད།

ལྷ་སྒྲུང་ལྟ་བུའི་གཏམ་རྒྱུད་འདི་བཞིན་ལོ་རྒྱུས་དངོས་ལྟ་བུར་བསྒྱུར་ནས་ལོ་རྒྱུས་སྨྲ་བ་གོང་མ་ཚོས་དཔྱད་པ་ཙམ་ཡང་མེད་པར་རང་སོར་བཞག་གནང་བ་ཡང་ནག་ཉེས་ཆེན་པོ་ཞིག་ཡིན། དེ་ལས་ལྡོག་སྟེ་དངོས་དོན་ལོ་རྒྱུས་རྙིང་པ་ཁག་ལ་ཞིབ་འཇུག་ནན་གྱིས་བྱེད་ན་བོད་ཀྱི་རྒྱལ་པོ་ནི་བོད་པ་རང་ཡིན་པ་ལས་རྒྱང་འབུད་བཏང་བའི་རྒྱ་གར་བ་མདོག་ངན་ཞིག་གཏན་ནས་མིན། དེ་ནི་བོད་ཀོང་ཡུལ་ནས་ཕེབས་པའི་ཨུ་བྷེ་ར་ཞེས་པའི་དཔའ་རྟུལ་དེ་ཡིན་ཞིང་དེའི་སྟེང་ནས་བོད་ཀྱི་ལོ་རྒྱུས་ཤིག་གི་མགོ་བོ་བཙུགས་ན་ཡབ་མེས་དམ་པ་ཚོ་ལ་ཞེ་ཁྲེལ་མི་དགོས་པ་ཞིག་དང་དེང་རབས་རྒྱལ་ཁབ་གཞན་གྱི་མདུན་དུ་ཡང་སྤོབས་པ་ཞུམ་མི་དགོས་པ་ཞིག་རེད།

འདི་ལྟར་ལོ་རྒྱུས་ཁག་ལ་ཞིབ་འཇུག་བྱེད་སྐབས་ལྷ་སྲས་དར་མའམ་འུ་དུམ་བཙན་པོའི་མི་ཚེའི་ལོ་རྒྱུས་ཀྱི་ནང་ནོར་འཁྲུལ་དང་སྐྱོན་ཡེ་ནས་མེད་པ་ཞིག་ཡིན་པ་སུས་ཀྱང་ཁས་ལེན་མི་བྱེད་ཀྱང་། ལྷ་སྲས་ཁོང་ནི་བོད་ཀྱི་ཆོས་དང་རིག་གཞུང་ལ་ལར་ཞེན་ཟབ་ཅིང་རྒྱལ་ཁབ་ཀྱི་ཆབ་སྲིད་དང་དཔལ་འབྱོར་འཛུགས་བསྐྲུན་དང་ཡར་རྒྱས་ལ་ཤུགས་སྣོན་ཤུགས་ཆེར་རྒྱབ་གནང་བའི་རྒྱལ་པོ་ཞིག་ཡིན་པ་ལས། བོད་ཀྱི་རྒྱལ་ཁབ་བཙོང་བའི་ཚོང་དཔོན་ཞིག་མིན་ལ་ནང་འཁྲུག་སློང་མཁན་གྱི་གསང་ཉུལ་ཞིག་ཀྱང་མིན།

འུ་དུམ་བཙན་པོ་ནི་ཆོས་ལ་དད་པ་ཡོན་མཁན་ཞིག་ནི་ཡིན་ངེས་ཏེ། ཏུན་ཧོང་ཡིག་རྙིང་ཁྲོད་དུ། ཚེའི་བར་ཆོད་ཀྱྀ་བགེགས་དང་བྲལ་ཏེ། ཚེ་ལ་དབང་ཐོབ་པར་སྨོན་ནོ། གཙུག་ལག་ཁང་དང་མཆོད་རྟེན་གསར་དུ་བརྩྀགས་ཤིང་རྙྀང་བཅོས་པ་ཡང་་་་་་ཞེས་སོགས་གསལ་བས་རྒྱལ་པོ་ཁོང་ནི་ཆོས་ལ་དད་ཞེན་ཆེ་བ་མ་ཟད་ཆོས་ཀྱི་གོ་རྟོགས་ཀྱང་མཐོན་པོར་སོན་པའི་མི་ཞིག་ཀྱང་རེད་འདུག ཁོང་གིས་སྐུའི་གཅེན་པོ་ཁྲི་རལ་པ་ཅན་གྱིས་གྲྭ་བ་རྣམས་ལ་བཀུར་བསྟི་ཞུ་རྒྱུ་ཆེ་དྲགས་པ་དང་། མཚམས་རེར་རང་གི་ཁྲི་སྟེང་དུ་ཡང་གྲྭ་བ་རྣམས་བཞུགས་སུ་བཅུག་པ་དང་། རང་གི་འབངས་རྣམས་ལ་གྲྭ་བ་རྣམས་ཀྱི་འཚོ་རྟེན་དུ་ཤ་མར་སོགས་ཕུལ་དགོས་པའི་ཁྲིམས་ཤིག་བཟོས་ཤིང་། དེ་ལྟར་མ་ཕུལ་ཚེ་ཞལ་ལྕེ་ཅི་རིགས་ཀྱི་སྒོ་ནས་ཆད་པ་གཅོད་པའི་ལམ་ལུགས་ངན་པ་དེའི་འོག་ནས་ལོ་རེ་ནས་ལོ་རེར་གྲྭ་བ་བཟོ་མཁན་ཇེ་མང་དུ་ཕྱིན་ཅིང་། དེ་ནི་ཆོས་ཀྱི་ཆེད་དུ་མིན་པར་དེ་ནི་དཀའ་ལས་གང་ཡང་མི་དགོས་པར་ལྟོ་ཟ་རྒྱུ་ཡོད་པས་རེད། དེར་བརྟེན་ལྷ་སྲས་དར་མ་རྒྱལ་ཁྲིར་འཁོད་པ་དང་། གྲྭ་བ་རྫུན་མ་དེ་དག་གནས་དབྱུང་བཏང་ཞིང་། རྒྱལ་ཁབ་ཀྱི་ཆབ་སྲིད་དང་དཔལ་འབྱོར་ཡར་རྒྱས་ལ་དམིགས་ནས་མདུན་བསྐྱོད་ཆེན་པོ་ཞིག་གནང་སྐབས་ཕྱོགས་ཞེན་གྱིས་བཟི་བའི་སྔགས་པའམ་འཆམ་འཁྲབ་མཁན་ཞིག་གིས་མདའ་བསྣུན་ནས་རྒྱལ་པོའི་སྐུ་སྲོག་བཀྲོངས་པ་ནི་བོད་ཆག་འཇིག་གི་སྟ་གོན་བྱས་པ་ཞིག་རེད།

རྒྱལ་པོའི་སྐུ་སྲོག་དགྲོང་མཁན་དེ་ལ་དཔལ་གྱི་རྡོ་རྗེ་ཞེས་ཟེར་ཞིང་། ལོ་རྒྱུས་པ་ཡིན་ཟེར་མཁན་ཚོས་དེ་ལྷ་ཡི་སྤྲུལ་པ་ཡིན་རབས་ཀྱི་རྟོག་བཟོའི་ལྷ་སྒྲུང་རིང་པོ་ཞིག་ཀྱང་བཟོས་ཏེ་ལྷ་སྲས་དར་མ་བཀྲོངས་པ་དེས་བོད་དང་བོད་ཀྱི་བསྟན་པ་ཕན་རབས་སོགས་ཀྱང་བཤད་འདུག་པ་ནི་རྟོག་བཟོ་ཞིག་ཡིན་པར་སེམས་དང་ལྡན་པ་སུས་ཀྱང་ཤེས་ཐུབ།
ལྷ་སྲས་ཀྱིས་དེ་ལྟར་གནང་དོན་ནི་གྲྭ་བ་མང་དྲགས་པའི་དབང་གིས་རྒྱལ་ཁབ་ཀྱི་ཆབ་སྲིད་ལ་འཐུས་ཤོར་འགྲོ་དོགས་ཀྱིས་གནང་བ་ཞིག་ཡིན་ལ། རྒྱལ་ཁབ་ཀྱི་ཆབ་སྲིད་ལ་འཐུས་ཤོར་ཕྱིན་ཚེ་སངས་རྒྱས་ཀྱི་བསྟན་པ་ཅུང་ཁག་པོ་ཡིན་པ་ནི་ང་ཚོས་མྱོང་བས་གྲུབ་པ་འདི་རེད། ཁོང་གིས་གྲྭ་བ་ཉུང་དུ་བཏང་བའི་ལས་གཞི་མགོ་རྩོམ་པ་དེ་ཆེས་ནག་ཉེས་ཤིག་ག་ལ་ཡིན་ཏེ། ད་ལྟའི་བོད་ཀྱི་གྲངས་ཉུང་མི་འབོར་གྱི་དཀའ་ངལ་ལ་བརྟེན་ནས་༧གོང་ས་ཏཱ་ལི་བླ་མ་མཆོག་གིས་གྲྭ་བའི་གྲངས་འབོར་མང་རབས་དང་མང་བ་ལས་སྤུས་ཀ་ལེགས་པའི་སྐོར་ཡང་ནས་ཡང་དུ་གསུངས་པ་དང་གཅིག་མཚུངས་ཤིག་མིན་ནམ།

ལྷ་སྲས་ཁོང་གིས་ལས་གཞི་གང་ཞིག་བརྩམས་ཀྱང་མི་མང་གིས་ཁོང་ལ་ནི་སེམས་གཏིང་ནས་ཡིད་ཆེས་དང་རྩི་བཀུར་ཡོད་པར་མངོན་ཏེ། དཔལ་གྱི་རྡོ་རྗེས་ལྷ་སྲས་བཀྲོངས་མ་ཐག་རྟ་དང་གོས་ཀྱི་མཚོན་མདོག་བསྒྱུར་ནས་བྲོས་མ་ཕྱིན་ན་རྗེས་འདེད་ཀྱིས་ཁོ་རང་ཡང་བཟུང་ངེས་པ་ཡིན་པས་དེའི་ཐོག་ནས་ཀྱང་ལྷ་སྲས་དར་མ་ནི་ནམ་ཡང་མི་མང་གི་སེམས་སུ་རྒྱལ་པོ་དྲིན་ཅན་ཞིག་ལ་རྩི་གི་ཡོད་པ་མཚོན་ཐུབ།

གང་ཞིག་ལ་དབང་ཆའི་རྐུབ་བཏེགས་ཡོད་ན་དེའི་ཕྱོགས་འགལ་གྱི་མི་རྣམས་གསོད་གཏུབ་ཅི་རིགས་བྱེད་པ་ནི་འདི་ཙམ་མིན་པར་མནའ་དང་དེང་གི་ལོ་རྒྱུས་ཚང་མའི་ནང་བྱུང་ཡོད་པ་བཞིན་ལྷ་སྲས་ཁོང་གི་ཕྱོགས་འགལ་གྱི་མི་ཁ་ཤས་ནི་བསད་ཡོད་ངེས་ལ། དེ་ལ་ཧང་སང་དགོས་དོན་ཡང་མེད། ཁྲི་སྲོང་ལྡེའུ་བཙན་གྱི་དུས་སུ་ཁོང་གི་བློན་པོ་གྲགས་ཅན་མ་ཞང་དྲོན་པ་སྐྱེད་དང་། སྟག་ར་ཀླུ་གོང་བཅས་མ་ཉེས་ཁག་གཡོག་གིས་སྐུ་གླུད་དུ་བརྫངས་པ་དང་། ད་དུང་གཞན་རྣམས་གསོན་པོ་དུར་དུ་བཅུག་པ་ཞེས་པའི་ཞལ་ལྕེ་སྐྱུགས་དྲོ་བ་དེ་འདྲ་ཡང་གནང་འདུག་པས་ཕྱོགས་ཡོངས་ནས་བལྟ་ན་གཅིག་མཚུངས་ཤིོག་ལས་ཁྱད་པར་གང་ཡང་མེད།

དེ་ལྟར་ན་ཡང་། བོད་ཀྱི་ལོ་རྒྱུས་སྨྲ་བ་ཕལ་ཆེ་བས་དངོས་དོན་ལ་ཡེ་ནས་མ་རེག་པར་ཕྱོགས་ཞེན་ཁོ་ནའི་དབང་དུ་སོང་འདུག་ཅིང་། ཐ་ན་ལྷ་སྲས་དར་མའི་མཚན་ཙམ་ཡང་གཙང་མར་བྲིས་མེད་པ་ནི་སེམས་གཏིང་ནས་ཕངས་དགོས་པ་ཞིག་དང་། མཁས་དབང་དགེ་ཆོས་ཀྱིས་དེབ་དཀར་དུ་དར་མ་ཞེས་མཚན་དངོས་སུ་བྲིས་པ་ནི་གཟི་བརྗིད་ཅིག་ཡིན་ངེས།

ད་དུང་དེ་ལས་འཕྲོས་ནས་ལྷ་སྲས་དར་མ་དང་བོད་ཀྱི་གནས་བབ་བཅས་ཀྱི་ཐོག་དཔྱད་པ་བྱེད་དགོས་པ་མང་དུ་སྣང་ན་ཡང་། དེ་རིང་དེ་ཙམ་གྱིས་འཐུས་པར་བྱས་སོ།

ན་བུན་བསྟིམས་པའི་ཡབ་མེས་དུར་ས་ནས།།
གང་ཁྱེད་རྣམ་ཤེས་འཁྱམ་པོ་འཚོལ་བ་ན།།
ལོ་རྒྱུས་འཁྱོག་པོའི་འཕྲང་ལམ་དོག་པོ་ནས།།
ལྷ་སྲས་ངོ་མ་རྙེད་པས་དགའ་ཚོར་བྱིན།།

ཞེས་པ་འདི་ནི་ཡབ་ཆེན་དམ་པ་དང་དགེ་རྒན་མཁས་པའི་བཀའ་དྲིན་ལ་བརྟེན་ནས་འཕགས་བོད་དབྱིན་གསུམ་གྱི་ཐུན་མོང་དང་ཐུན་མོང་མ་ཡིན་པའི་རིག་པའི་གཞུང་ལུགས་ལ་འཆད་རྩོད་རྩོམ་གསུམ་གྱི་སྤོབས་པ་ཡངས་པའི་མདོ་ཁམས་བེ་རི་རྒྱལ་པའི་ཁྲག་རུས་བརྒྱུད་པའི་ཉེ་བའི་གཙུག་ལག་རབ་འབྱམས་སྨྲ་བ་དེང་རབས་ལོ་མཉམ་གྱི་མཁས་པ་ཀུན་གྱི་གཙུག་ཏུ་མི་འཇིགས་སྤོབས་པའི་གོམ་པ་དལ་གྱིས་སྤོ་བའི་རྣམ་དཔྱོད་མཆོག་ཏུ་དགེ་ཡང་།  མགོ་མཇུག་ལྡོག་པའི་སྤྱི་ཚོགས་རལ་པོ་འདི་ལ་མིག་ཞགས་ནམ་ཡང་འཕེན་མི་འདོད་པའི་བློ་གསལ་གླིང་དཔེ་མཛོད་ཁང་གི་གད་ཕྱི་བ་བེ་རི་དཔལ་ལྡན་རྣམ་རྒྱལ་དུ་འབོད་པས་༢༠༡༠།༡༡།༦ཉིན་འབྲས་སྤུངས་བློ་གསལ་གླིང་གི་དཔེ་མཛོད་ཁང་དུ་གད་རྒྱག་ཞོར་དུ་ཤར་མར་སྤེལ་བའོ།།

མཁས་དབང་ཟླ་བ་ནོར་བུ་དང་བོད་ཀྱི་གྱོང་གུད།

མཁས་དབང་ཟླ་བ་ནོར་བུ་དང་བོད་ཀྱི་གྱོང་གུད།

བཙན་བྱོལ་ནང་གི་ནོར་བུ་གསུམ་ཞེས་པ་ནི་ལོ་རྒྱུས་དང་རྒྱབ་ལྗོངས་ཤེས་མིན་ལ་མ་ལྟོས་པར་ཀུན་གྱིས་གོ་མྱོང་བ་ཞིག་ཡིན་ལ། དེའི་ནང་གི་ཟླ་བ་ནོར་བུ་ནི་ངེས་དོན་གྱི་མཁས་པའི་དབང་པོ་ཞིག་དང་ཕུགས་རྒྱང་རིང་པོའི་བསམ་བློ་ལྡན་པའི་དྲན་དབང་ཁྱད་པར་བ་ཞིག་ཀྱང་རེད།

ཁོང་ནི་༡༩༤༩ལོའི་ཟླ་བ་བདུན་པའི་ཚེས་༡ཉིན་ལ་བོད་དུ་འཁྲུངས་ཤིང་ང་དགུའི་ལོར་བོད་མི་སྤྱི་ཡོངས་དང་འདྲ་བར་རྒྱ་གར་ལ་སྐྱབས་བཅོལ་དུ་ཕེབས། ཀ་ལིང་པོང་དུ་སློབ་འབྲིང་མཐར་ཕྱིན་རྗེས་ལྡི་ལི་གཙུག་ལག་སློབ་གྲྭ་ཆེན་པོའི་ནང་དབྱིན་ཇིའི་རྩོམ་ཡིག་རིག་པའི་སློབ་སྦྱོང་གནང་སྟེ་གཙུག་ལག་རབ་འབྱམས་པ་ཐོན་འདུག མཐོ་སློབ་ནས་ཐོན་མ་ཐག་སྤྱི་ཚོགས་ཀྱི་ཞབས་ཞུ་དང་པོ་དེ་ནི་བོད་དོན་བསྐྱར་ཞིབ་Tibetan Review ཅེས་པའི་དུས་དེབ་ཀྱི་རྩོམ་སྒྲིག་པའི་ཕྱག་ལས་དེ་རེད། དུས་དེབ་དེའི་རྩོམ་སྒྲིག་པའི་བྱ་བར་མ་ཞུགས་པའི་སྔོན་དུ། ཁོང་གིས་དུས་དེབ་དེའི་རྩོམ་སྒྲིག་པ་ལ་རྩོམ་སྒྲིག་གི་རང་དབང་ཚད་ལྡན་ཞིག་དགོས་སྐོར་དང་གལ་ཏེ་དེ་ལྟར་མེད་ཚེ་རྩོམ་སྒྲིག་པའི་ལས་དུ་ཞུགས་རྒྱུ་མིན་པའི་སྐོར་ཡང་གསུང་འདུག

གནད་དོན་འདིའི་ཐོག་ནས་ང་ཚོས་ཤེས་དགོས་པ་ཞིག་ནི། ང་ཚོས་རྒྱལ་སྤྱིའི་ནང་དུ་བོད་དུ་སྨྲ་བརྗོད་རང་དབང་དང་རྩོམ་སྒྲིག་གི་རང་དབང་མེད་ལུགས་ཀྱི་ཁྱབ་བསྒྲགས་ཇི་ཙམ་བྱས་ཀྱང་རང་ཉིད་ཀྱི་སྤྱི་ཚོགས་ནང་དུ་སྨྲ་བརྗོད་དང་གསར་འགོད་རང་དབང་ག་ཚོད་ཅིག་ཡོད་མེད་ལ་བསམ་གཞིགས་གཏན་ནས་མེད་པར་དུས་དེབ་དང་ཚགས་ཤོག་ཁག་ལ་རྩོམ་སྒྲིག་རང་དབང་ཚད་ལྡན་ཞིག་མེད་པ་ནི་རང་སྐྱོན་བཀབ་ནས་གཞན་སྐྱོན་འཚོལ་བ་ཞིག་མིན་མི་སྲིད་པ་ཞིག་རེད། དེར་བརྟེན་སློབ་དཔོན་དམ་པ་ཁོང་གིས་ཀྱང་རང་ཉིད་རྩོམ་སྒྲིག་པ་ཞིག་གནང་དགོས་ན་རང་ཉིད་ལ་རྩོམ་སྒྲིག་གི་རང་དབང་ཆ་ཚང་དགོས་ཞེས་གསུང་པ་ཡང་བོད་ལ་བཞག་པའི་བཀའ་སློབ་ལྗིད་པོ་ཞིག་ཡིན་ཆོག

དེ་སྐབས་ཁོང་གིས་བོད་པའི་སྤྱི་ཚོགས་ནང་གི་ནོར་འཁྲུལ་ཐེར་འདོན་དང་སྐྱོན་ཡོན་ཡོ་བསྲང་སོགས་ལན་མང་དུ་གནང་སྐབས་བསམ་བློའི་སྨིན་ཚད་མ་རྫོགས་པའི་བོད་པ་དག་གིས་ཁོང་ལ་རྒྱ་མིའི་གསང་ཉུལ་དང་ཡི་ཤུའི་ལྟ་བ་ཅན་སོགས་ཀྱི་བསྙོན་འཛུགས་འདྲ་མིན་གྱི་རྐྱེན་པས་ཁོང་བོད་པའི་སྤྱི་ཚོགས་དང་རྒྱང་རིང་དུ་མ་གྱེས་ཀ་མེད་དུ་གྱུར་འདུག

བོད་པའི་སྤྱི་ཚོགས་སུ་བསམ་བློ་སྔོན་ཐོན་ཞིག་སླེབས་ཚེ་བོད་པ་རྣམས་ཀྱིས་ཁྱི་སྤྱང་ལག་སྦྲེལ་གྱིས་བོད་པའི་སྤྱི་ཚོགས་ནས་རྒྱང་འབུད་དུ་གཏོང་བའི་ལུགས་སྲོལ་ཞིག་སྔོན་ནས་བྱུང་འདུག་པ་བཞིན་སློབ་དཔོན་ཁོང་ལའང་དེ་ལྟར་བྱུང་འདུག་པ་ནི་ད་ལྟ་ང་ཚོ་གཞོན་སྐྱེས་ཚོའི་འགྱོད་པའི་ཡུལ་ལས་མ་འདས། སློབ་དཔོན་ཁོང་ལྟ་བུ་ནི་བོད་ཀྱི་ལར་ཞེན་བཟུང་ནས་བོད་པའི་སྤྱི་ཚོགས་སུ་ཞབས་འདེགས་གནང་བ་ལས་ཕྱི་རུ་ཕེབས་ས་མེད་ནས་ལུས་སོང་བ་ཞིག་གཏན་ནས་མིན་ཏེ། The Institute of Asian and Pacific Studies in San Francisco California ཨ་རི་ཁེ་ལི་ཕྷོ་ནི་ཡའི་གཙུག་ལག་སློབ་གཉེར་ཁང་གི་ངེས་སྟོན་པའི་ལས་རོགས་ཡིན་པ་དང་། ལྡི་ལི་ནེ་རུ་གཙུག་ལག་སློབ་གྲྭ་ཆེན་མོའི་སློབ་དཔོན་ཞིག་ཀྱང་ཡིན་པ་རེད། འཛམ་གླིང་ནང་སྙན་གྲགས་ཡོད་པའི་གཙུག་ལག་སློབ་གྲྭ་ཆེན་མོའི་སློབ་དཔོན་ཆེན་མོ་ཞིག་བོད་པའི་སྤྱི་ཚོགས་སུ་ཉར་ཚགས་མ་ཐུབ་པར་རྒྱང་དུ་བསྐྲད་པ་ནི་ཕྱོགས་གང་ནས་བལྟས་ཀྱང་ཕངས་སེམས་ཤིག་ལས་མ་འདས།    དེར་བརྟེན། ཁོང་གིས་རྩོམ་དེབ་དང་པོ། Red Star Over Tibet བོད་ཐོག་གི་སྐར་མ་དམར་པོ། ཞེས་པའི་ནང་དུ།  The innocent and wild Tibetans in India, Nepal and Bhutan were literally after my blood. ཞེས་ཀྱང་གསུང་ཡོད་པ་རེད།

མཛད་པ་ཀུན་ལས་གསུང་གི་ནི།། མཛད་པ་མཆོག་ཡིན་་་། ཞེས་པ་ལྟར་ཁོང་གིས་བོད་ཀྱི་ཤུལ་དུ་བཞག་པའི་དཔེ་དེབ་གལ་ཆེན་ཁ་ཤས་ཤིག་བརྩམས་གནང་མཛད་ཡོད་པ་ནི། Red Star Over Tibet,   Tibet The Road Ahead, China’s Tibet Policy, Culture and Politiccs of Third World Nationalism, Roots of Neonationalism བཅས་རེད། དཔེ་དེབ་དེ་དག་ལས་ཁོང་གི་བསམ་བློ་དང་། བོད་དོན་ལ་གཞིགས་པའི་ཁ་ཕྱོགས་རྣམས་ང་ཚོས་མཐོང་ཐུབ།

འགྲན་ཟླ་མེད་པའི་བོད་ཀྱི་མཁས་པ་ཆེན་པོ་ཞིག་བོད་པའི་སྤྱི་ཚོགས་སུ་བདག་པོ་མ་སྤྲད་པར་དེ་ལྟར་ཕྱི་ཡི་སྤྱི་ཚོགས་ཤིག་གི་ནང་དུ་གཡུག་བཞག་ནས་༢༠༠༦ལོར་འཇིག་རྟེན་འདི་དང་གྱེས་མཇལ་གནང་རྗེས་གྱོང་གུད་ཐེབས་ས་ནི་བོད་པའི་སྤྱི་ཚོགས་ཉག་གཅིག་ལས་གཞན་གང་ཡང་མིན། དེ་ནི་སློབ་དཔོན་ཁོང་གི་གྱོང་གུད་ཅིག་མིན་པར་བོད་ཀྱི་གྱོང་གུད་ཅིག་ཡིན་ངེས་ལ། བོད་ཀྱི་འདས་མ་འོངས་ད་ལྟ་གསུམ་གྱི་གྱོང་གུད་ཅིག་ཀྱང་ཡིན།

གྱོང་གུད་འདི་ལྟ་བུ་ནི་བོད་ལ་ཐེངས་གཅིག་གཉིས་མིན་པར་ལན་མང་དུ་ཕྲད་ཟིན་ཀྱང་ད་དུང་ཡང་གྱོང་གུད་འདིའི་ལམ་བུར་མུ་མཐུད་འགྲོ་བཞིན་པ་ནི་ང་ཚོ་བོད་པའི་ཀླད་པའི་ནང་ནད་འབུ་གང་ཞིག་གིས་ཟིན་ཡོད་ཚོད་འདུག

ཁྱོད་ཀྱིས་འཁྲབ་དང་། ངས་ལྟད་མོ་བལྟ་ཆོག

               ཁྱོད་ཀྱིས་འཁྲབ་དང་། ངས་ལྟད་མོ་བལྟ་ཆོག


སྣབས་ལུད་སྦགས་པའི་དཔེ་ཁུག་དྲུད་ནས་མཁས་པ་སློབ་པའི་གྲྭ་བར་བསྙེགས།།
འཁྱར་མ་འཁྱོར་གྱི་གོམ་འགྲོས་ཤིག་གིས་མི་ཚེ་རིང་མོའི་ལམ་སྣེ་འཚོལ།།
ཕུགས་འདུན་བརྟན་པོའི་རྨུ་ཐུག་འཇུས་ནས་ས་ཕྱོགས་ངེས་མེད་དྲུད་པར་བྱས།།
ད་ཕྲུག་བྱིས་པའི་གོག་འགྲོས་འདི་ལ་བཞི་ཤད་རི་མོས་བཅད་མ་མྱོང་།།

མི་ཚེ་རིང་པོའི་འཕྲང་ལམ་དེ་ན་རྩེ་མོ་རྣོ་བའི་རྡོ་ཧྲུག་མང་།།
གཡས་དང་གཡོན་གྱི་ལྷགས་རླུང་ཚ་བོས་དཀར་མཛེས་བཞིན་ལ་འགྲམ་ལྕག་སྟེར།།
ཁྱི་རྒན་རྒྱ་བོའི་ཕྱག་དབང་ཞིག་གིས་མགོ་བོ་བཏེགས་པའི་གོ་སྐབས་འཕྲོག།
སུག་ལག་བཞི་ག་ས་ལ་བཙུགས་ནས་ཕུགས་འདུན་འཚོལ་བའི་ངལ་བ་བསྟེན།།


ཁྱི་སྤྱང་ཚོགས་ཀྱིས་ཁྱུ་དང་ཁྱུར་བྱས་རི་ཀླུང་འགུལ་བའི་ངུ་ཟུག་ཁྲོད།།
ཉམ་ཆུང་བྱིས་པས་རྣ་བའི་བུ་ག་ཤོག་བུ་ཞིག་གིས་བཅད་བྱས་ནས།།
ངེས་པ་དོན་གྱི་རྒྱལ་ཁའི་དཔལ་འབར་ཀུན་གྱི་མིག་སྔར་བཤམ་པ་ན།།
རྔ་མ་སྐུང་ནས་ངུ་ཟུག་སྒྲོག་བཞིན་རི་བོའི་ཐུར་དུ་བྲོས་པར་བརྩམས།།

 
མགོ་མཇུག་ལྡོག་པའི་སྤྱི་ཚོགས་ནང་དུ་རྒད་མོ་བྲོ་བའི་གཏམ་རྒྱུད་མང་།།
རྒད་མོ་འཆོར་བའི་གླིང་ག་དེ་ན་རྒད་མོ་སློབ་པའི་སྤྲེ་རྒན་མང་།།
རྒད་མོར་དགའ་བའི་སྤྲེ་ཕྲུག་མང་པོས་རྒད་མོའི་སློབ་ཚན་ཤུགས་ཀྱིས་སྒྲོག།
རྒད་མོ་ཤོར་བའི་སྒྲ་དབྱངས་སྙན་པོས་རྒད་མོའི་གླིང་ག་ཅི་ཡང་མཛེས།།

 སྤྲེ་ཕྲུག་མང་པོས་རྔ་སྦུབས་དཀྲོལ་དུས་སྤྲེ་རྒན་དགའ་བའི་གར་ལ་རྩེན།།
སྤྲེལ་རྒན་རྒྱ་བོས་རྐུབ་དམར་ངོམས་ནས་ས་ཁུག་དེ་ན་ཤུགས་ཀྱིས་འཁྲབ།།
ད་དུང་ཁྱོད་ཉིད་མུ་མཐུད་འཁྲབ་དང་འཁྲབ་ཚན་ལེ་འུ་ཇེ་འཕྲུག་རེད།།
ཁོ་བོས་ཁྱེད་ལ་རྒྱང་རིང་ཞིག་ནས་བརྒྱ་ཆའི་ཨང་གྲངས་སྤྲོད་ཆོག་ལགས།།

ངའི་རབ་རིབ་ཀྱི་རྨི་ལམ།

ངའི་རབ་རིབ་ཀྱི་རྨི་ལམ།

ལྷུང་ལྷུང་འབབ་པའི་སྦྲང་ཆར་ཟེགས་མས་ཀུན་བཟོད་སྒེག་མོའི་བཞིན་རས་བརླན།།

བསིལ་ལྷང་ལྷང་གི་རླུང་བུ་ཞིག་གིས་དགུན་གྱི་རྒྱལ་མོ་མགྲོན་དུ་འགུག།

འཁྱག་སིག་སིག་གི་འཚོ་བའི་ཁྲོད་ནས་མིག་ཟུང་འདབ་མ་ཟུམ་བྱས་ནས།།

ཁ་དོག་མེད་པའི་རབ་རིབ་རྨི་ལམ་ཡང་བསྐྱར་ཐེངས་གཅིག་གཏོང་མགོ་བརྩམས།།

རྐང་འཐུང་སྒེག་མོའི་འདབ་མའི་རྩེ་ནས་ཆར་གྱི་ཐིགས་པ་མགོ་ལ་ལྷུང་།།

ཕྲ་ཆུང་མིག་ཟུང་འདབ་མའི་མཐའ་ནས་མིག་ཆུའི་ཟེགས་མ་དལ་གྱིས་ལྷུང་།།

ཆར་དང་མིག་ཆུ་འཐབ་པའི་སྲུབ་ནས་མངར་སྐྱུར་འདྲེས་མའི་འཚོ་བ་ཡིས།།

ཟུར་གསུམ་སྙིང་ཆུང་སྡུག་གིས་གས་ནས་ཟུངས་ཁྲག་དམར་པོ་དྲག་ཏུ་འཕྱོ།།

ངེས་མེད་རླུང་བུ་ཤུགས་ཀྱིས་ལྡང་དུས་སྟོན་མཇུག་ལོ་མ་སེར་པོ་བཞིན།།

དྲི་བཞོན་བུ་མོའི་ལྷན་དུ་འགྲོགས་ནས་མགོ་མཇུག་མེད་པའི་ཡུལ་ལུང་འགྲིམས།།

ཕྲ་བོའི་མཚོན་གྱིས་ཡོངས་སུ་སྦངས་པའི་འཕྲང་ལམ་དོག་པའི་ཟུར་ཀ་ནས།།

ཁ་དོག་མེད་པའི་རྨི་ལམ་ཞིག་གིས་མི་ཚེ་ཐུང་ངུའི་དབུ་ཁྱུད་བྲིས།།

ལྷམ་གོག་ལྗིད་པོས་རྡོག་པས་རྫིས་དུས་རྐང་པའི་འོག་གི་ས་འབུ་བཞིན།།

སུག་ལག་ཆག་པའི་ན་ཟུག་ཅིག་གིས་མགོ་བོ་བཏེགས་པའི་གོ་སྐབས་འཕྲོག།

རེ་ཐང་ཆད་པའི་དབུགས་ཀྱི་རྒྱུ་བ་བཞི་ཤད་རི་མོས་མ་བཅད་པར།།

ཁ་དོག་མེད་པའི་རྨི་ལམ་ཞིག་གིས་རང་སེམས་གསོ་བའི་ཉེར་བསྡོགས་བསྐྲུན།།

ལས་དབང་བཙན་པོས་འགྲམ་ལྕག་གཞུས་དུས་ཆང་བཟི་རྒྱ་བོའི་གོམ་འགྲོས་བཞིན།།

འཁྱར་མ་འཁྱོར་གྱི་སྟངས་སྟབས་ཤིག་གིས་ཕུགས་བསམ་ཕྲ་མོའི་ལམ་སྣེ་འཚོལ།།

ཕུགས་འདུན་རྨུ་ཐག་དམ་གྱིས་འཇུས་ནས་ས་ཕྱོགས་ངེས་མེད་དྲུད་པར་བྱས།།

ཁ་དོག་མེད་པའི་རྨི་ལམ་ཞིག་གིས་རང་ཉིད་རྙེད་པའི་དགའ་ཚོར་བྱིན།།

༢༠༡༠། ༠༩།༢༠ཉིན་འབྲུག་གི་མགྲོན་ཁང་ཞིག་ནས།

རྒན་རིན་པོ་ཆེ། ཐུགས་རྗེའི་གཟིགས་པ་མ་ཆུང་རོགས།

                       Great Beri &  Little Beri

རྒན་རིན་པོ་ཆེ། ཐུགས་རྗེའི་གཟིགས་པ་མ་ཆུང་རོགས།

ངེས་མེད་རླུང་གི་རྒྱུ་ཕྱོགས་ཤིག་གིས་ཐལ་འཚུབ་ལངས་པའི་སྟ་གོན་བརྩམས།།

ཐལ་བའི་རྡུལ་གྱི་ནག་ནོག་དྲི་མས་དཀར་མཛེས་བཞིན་རས་ཡོངས་སུ་སྦགས།།

མི་མངོན་ཁེར་རྐྱང་འཕྲང་ལམ་ཞིག་ནས་འཁུན་སྒྲ་ཤུགས་ཀྱིས་གྱེར་བ་ན།།

ཀུན་གསལ་ཀློང་ནས་ཉིན་མོའི་མགོན་གྱིས་འོད་ཀྱི་རླབས་ཕྲེང་འཁྱུད་པར་མཛོད།།

ཁ་དོག་མེད་པའི་ན་བུན་ཞིག་གིས་གངས་དཀར་རི་བོའི་མཐའ་ནས་འཁྱུད།།

རྨི་ལམ་ཕྲ་བོའི་སྤྲིན་ལ་བཞོན་ནས་གོ་ལ་ཟླུམ་པོར་རྒྱང་བལྟ་བྱས།།

རེ་ཐང་ཆད་པའི་དབུགས་རིང་ཞིག་གིས་ཡོད་ཚད་ས་ལ་བརྡབས་པར་བྱས།།

ས་ལ་རྡབ་པའི་ན་ཟུག་འདི་ཡིས་རང་ཉིད་སུ་ཡིན་ངོ་སྤྲོད་གནང་།།

མདུད་པ་མང་བའི་རྨུ་ཐག་འཇུས་ནས་གཙང་པོའི་ཕ་རོལ་བརྒལ་ན་བསམ།།

མདུད་པ་རེ་རེ་ཆད་པར་གྱུར་ན་ཆུ་སྲིན་བཙན་པོའི་ཁ་རུ་ལྷུང་།།

མི་མངོན་སེམས་ཀྱི་རེ་ལྟོས་འཆའ་བའི་རྒྱང་རིང་སློབ་དཔོན་ཁྱེད་ཉིད་ཀྱིས།།

ཐུགས་རྗེའི་འོད་ཀྱི་ཞགས་པ་དཀར་པོ་ད་དུང་བདག་ལ་དཔྱང་པར་མཛོད།།

སྤྲང་ཁྱི་རྒན་པོས་མཇུག་མ་སྐུང་ནས་གསེར་ཁྲིའི་སྟེང་ནས་འགྱིངས་པ་དང་།།

མུན་པའི་ཀློང་ནས་སྲིན་འབུ་མེ་འཁྱེར་རང་རློམ་འབར་ནས་འཕུར་པ་དང་།།

ཁྱི་སྤྱང་ཚོགས་ཀྱིས་ལག་གདང་སྦྲེལ་ནས་ངུ་ཟུག་ཤུགས་ཀྱིས་སྒྲོག་པ་འདིར།།

བེ་རི་སྨྱོན་ཕྲུག་ཞེད་དོན་མེད་ཀྱང་སུན་པོ་བཟོས་པ་ཉུང་ཉུང་མིན།།

གསེར་རྩི་བཏང་བའི་ར་གོན་འོད་ཀྱིས་མི་སེམས་བསླུ་བའི་ཟློས་གར་འཁྲབ།།

ས་དུང་བྲུས་ནས་དོན་དམ་གསེར་དངུལ་འོབས་སུ་སྦས་པའི་ཉེར་བསྡོགས་བརྩམས།།

གོ་ལྡོག་ལས་ཀྱི་བྱ་སྤྱོད་འདི་ཡིས་གངས་དཀར་སེམས་པར་ཆག་གྲུམ་ཤོར།།

ཆག་གྲུམ་ཤོར་བའི་སེམས་པ་འདི་ཡིས་འགྱོད་པ་འབུམ་ཕྲག་ཁོག་ཏུ་སྦྲུམ།།

བསམ་བཞིན་བསམ་ན་རེ་ཐང་ཆད་ནས་དབུགས་རིང་སྟོང་གི་འཚང་ཁ་རྒོད།།

དབུགས་རིང་རེ་རེའི་མཇུག་སྣེ་དེ་ན་སྐྱོ་གདུང་འབུམ་གྱིས་སྙིང་ཁ་བཀས།།

སྙིང་ཆུང་དམར་པོ་སྙིམ་པས་སྐྱོར་ནས་ཁེར་རྐྱང་འཕྲང་ལམ་དལ་གྱིས་བཞུད།།

ངུ་ངག་འདྲེས་མའི་ཆིག་ལབ་སྙོམས་པོས་རང་སེམས་གསོ་བའི་ཐབས་ལ་འབད།།

ཡབ་ཆེན་དམ་པའི་རེ་བའི་རྣམ་ཤེས་དོན་མེད་མཁའ་མཐར་གཏོང་འདོད་མེད།།

འཇིགས་མེད་མཁས་པའི་གསོ་སྐྱོང་བཀའ་དྲིན་ཡང་པའི་རླུང་ལ་སྐུར་འདོད་མེད།།

བེ་རི་སྨྱོན་ཕྲུག་མིང་སྐམ་འདི་ཉིད་སྐམ་རུལ་ཅན་དུ་བསྒྱུར་འདོད་མེད།།

འགྱུར་དགའ་དམ་པའི་ཁྲག་དང་རུས་པ་འདི་ལྟར་ས་ལ་གཏོར་འདོད་མེད།།

ལས་དབང་བཙན་པོའི་བརྙས་བཅོས་འོག་ནས་ཕུགས་བསམ་དཔལ་འབར་མ་ཉམས་པར།།

ཡིད་ཆེས་གཙང་མས་མིག་ཟུང་བཙུམ་ནས་འདི་ལྟར་མདུན་བསྐྱོད་བྱས་ཡོད་པས།།

ངེས་མེད་རླུང་བུའི་རྒྱུ་ཕྱོགས་འདི་ཡིས་ཐལ་འཚུབ་ལངས་པའི་མཇུག་སྣེ་ནས།།

དགེ་རྒན་དམ་པས་སློབ་མ་ཁོ་བོར་ཐུགས་རྗེའི་གཟིགས་པ་མ་ཆུང་རོགས།།

༢༠༡༠། ༠༩།༢༠། ཉིན་འབྲུག་གི་རྒྱལ་ས་ཐིམ་ཕུག་ནས་བེ་རི་སྨྱོན་ཕྲུག་གིས།

རྒྱལ་ཡུམ་ཆེན་མོའི་རྐང་སྤོལ་རྩེད་འགྲན།

རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་དེ་ཇི་ལྟར་བྱུང་བ་རེད། བེ་རི་དཔལ་ལྡན་རྣམ་རྒྱལ།
 
 
སྤོ་ལོ་རྩེད་མོ་འདི་བོད་དུ་ཇི་ལྟར་དར་ཚུལ་ནི་དུས་རབས་ཉི་ཤུ་པའི་འགོར། དབྱིན་ཇི་དང༌། དེའི་རྒྱ་གར་དམག་མི་རྣམས་ཀྱིས་རྒྱང་རྩེ་རུ་རྐང་སྤོལ་ཐོག་མར་རྩེས་པ་དང༌། ཕྱི་ལོ་ ༡༩༡༣ ནས་རིམ་བཞིན་དམག་མི་རྣམས་ཀྱིས་ཕན་ཚུལ་རྐང་སྤོལ་རྩེ་བ་ནས་བཟུང་བོད་དུ་རྐང་སྤོལ་རྩེད་མཁན་མང་དུ་ཕྱིན་ཅིང༌། ༡༩༤༩ ལོར་རྒྱ་དམར་གྱི་བོད་བཙན་བཟུང་མ་བྱས་བར་མུ་མཐུད་ནས་རྩེས་བ་རེད།

 ༡༩༥༠ ལོར་བོད་དུ་ཅུང་གྲགས་ཆེ་བའི་རྐང་སྤོལ་རུ་ཁག་ཀྱང་ཁ་ཤས་ཤིག་བྱུང་བ་སྟེ། ལྷ་ས། པོ་ཏཱ་ལ། གྲྭ་བཞི་དང༌། སྐུ་སྲུང་བའི་རུ་ཁག་སོགས་བྱུང་འདུག ཁོང་ཚོས་ནང་ཕན་ཚུན་རྩེད་འགྲན་ཐེངས་མང་བྱས་ཤིང་རྒྱ་ནག་དམག་མི་ཚོའི་ལྷན་དུའང་འགྲན་བསྡུར་མང་པོར་བྱས་ཡོད་པ་རེད། དེ་ནས་ ༡༩༥༩ ལོར་རྒྱ་གར་དུ་བཙན་བྱོལ་བོད་གཞུང་དབུ་བརྙེས་ཤིང༌། ༡༩༦༠ ལོར་སློབ་གྲྭ་གསར་འཛུགས་བྱས་སྐབས་གཞོན་སྐྱེས་སློབ་ཕྲུག་གི་ཁྲོད་ནས་རྐང་སྤོལ་ལ་དོ་སྣང་ཤུགས་ཆེར་གནང་ནས། སློབ་གྲྭ་ནང་ཕན་ཚུན་བར་རྩེད་འགྲན་བྱས་ཤིང༌། དེ་ནས་རིམ་བཞིན་བོད་པའི་གཞོན་སྐྱེས་ཀྱི་ཁྲོད་རྐང་སྤོལ་ལ་དོ་སྣང་དང་དགའ་སྣང་ཤུགས་ཆེར་ཕྱིན་པ་རེད།
 ༡༩༨༡ ལོར་བོད་མའི་རྐང་སྤོལ་རྩེད་འགྲན་ཆེན་མོ་དེ་མགོ་བཙུགས་པ་ཡིན་ལ་དེ་ཡང་རྒྱལ་ཡུམ་ཆེན་མཽ་མཆོག་ ༡༩༨༡ ལོར་རྡ་སར་གྲོངས་བར་མྱ་ངན་གུས་འདུད་ཀྱི་ཆེད་རྩེས་པ་ཞིག་ཡིན་པས་རྩེད་འགྲན་འདིའི་མིང་ལའང་རྒྱལ་ཡུམ་ཆེན་མོའི་དྲན་རྟེན་རྐང་སྤོལ་རྩེད་འགྲན་གསྐྲརྒྱཞེས་ཆགས་པ་རེད། དེ་ཡང༌། ༡༩༨༡ ལོར་བོད་ཕྲུག་ཁྱིམ་སྡེ་ཡི་རྩིས་པ་ཟུར་པ་ཇོ་ཚེ་རིང་གིས་དབུ་འཁྲིད་པའི་འོག་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་ཐོག་མར་རྡ་རམ་ས་ལ་རུ་ ༡༩༨༡ ལོའི་ཟླ་བ་༨ པའི་རྩེས་་ཐུབ་པ་བྱུང་བ་རེད།
 དེས་ན་ཁོང་ནི་རྩེད་འགྲན་འདི་ཡི་ཐོག་མར་དབུ་འཛུགས་མཁན་དུ་ངོས་འཛིན་བྱེད་ཆོག རྩེད་འགྲན་དང་བོའི་སྐབས་རྩེད་འགྲན་བ་ཡོངས་རྫོགས་རྡ་ས་རང་ནས་ཡིན་ཞིང༌། མཐའ་མའི་རྒྱལ་ཁ་དེ་བོད་ཕྲུག་ཁྱིམ་སྡེ་ལ་ཐོབ་ཡོད་པ་དང༌། ༡༩༨༢ ལོ་ནས་བོད་པའི་གཞིས་སྒར་དུ་མ་ནས་རྩེད་འགྲན་དུ་སླེབས་ནས་ ༡༩༨༩ ལོའི་བར་མུ་མཐུད་དེ་རྩེས་པ་རེད། འོན་ཏེ། དེའི་ཕྱི་ལོ་ནས་བརྗོད་མི་ཤེས་པའི་དཀའ་ངལ་དུ་མ་ཞིག་ལ་བརྟེན་ནས་རྩེད་མོ་འདི་རྩེ་མ་ཐུབ་པར་ལུས་པ་རེད། དེ་ནས། དབུས་གཙང༌། མདོ་སྟོད། མདོ་སྨད། གཅིག་སྒྲིལ་ཚོགས་པ། གཞོན་ནུ་ཚོགས་པ། བུད་མེད་ཚོགས་པ་དང་བཅས་པའི་ཚོགས་པ་ལྔའི་གོ་སྒྲིག་འོག་རྩེད་མོ་འདི་ཉིད་སླར་གསོ་བྱས་ཡོད་ཀྱང༌། རྗེས་སུ་གཞོན་ནུ་དང་བུད་མེད་གཉིས་ཚོགས་པ་ནས་མར་འཐེན་ཞིང༌། ལྷག་མ་གཞན་བཞིས་གོ་སྒྲིག་འོག་ ༡༩༩༧ དང་ ༡༩༩༩ལ་རེ་ཞིག་རྩེས་ཡོད་ཀྱང༌། དེ་ཡང་མཇུག་སྐྱོང་ཐུབ་མེད་པ་རེད། 
༡༩༩༨ ལོེར་ཨི་ཊ་ལི་ནས་བོད་རིགས་རྣམས་རྐང་སྤོལ་རྩེད་འགྲན་ཆེད་ཐོག་མར་མགྲོན་དུ་བོས་ཤིང༌། དབུས་བོད་ཕྲུག་ཁྱིམ་སྡེ་ནས་བཀའ་འཁྲོལ་བྱུང་བ་བཞིན། ཆེས་ཐོག་མའི་བོད་རྒྱལ་ཁབ་ཀྱི་རྐང་སྤོལ་རུ་ཁག་གི་རྩེད་མོ་བ་འདེམས་སྒྲུག་གིས་ལི་ཊ་ལི་རུ་ལོ་དེའི་ཟླ་བ་དྲུག་པའི་ནང་རྩེས་རྒྱུ་བྱུང་བ་ནི་བོད་རིགས་རྣམས་ལ་རྐང་སྤོལ་རྩེད་མོའི་སྒོ་ཕྱེ་བ་དང་རང་རིགས་ལ་ཆེ་མཐོང་མི་དམན་པ་ཞིག་གནང་བ་བཅས་ནི་བོད་ཀྱི་རྐང་སྤོལ་རྩེད་མོའི་ལོ་རྒྱུས་ནང་ནམ་ཡང་བརྗེད་མི་རུང་བའི་དུས་སྐབས་གལ་གནད་ཆེན་པོ་ཞིག་ཡིན། ༢༠༠༡ ལོར་རང་རེ་བོད་པའི་རུ་ཁག་དེ་བཞིན་གྷི་རི་ལེཊ་གཔྱྟྟརྣརྡཎརྣརྟདང་ལྷན་རྩེས་པ་དང༌། དེ་ནས་རིམ་བཞིན་ཁྟརྣནཎཔྱྡསོགས་ཀྱི་རྒྱལ་ཁབ་དང་ལུང་པ་ཁ་ཤས་ཤིག་དང་ལྷན་རྩེས་རྒྱུའི་གོ་སྐབས་བྱུང་ཡོད་པ་རེད། ལྷག་པར ༢༠༠༢ ལོར་བོད་རྒྱལ་ཡོངས་རྩེད་རིགས་ཚོགས་པ་དབུ་བརྙེས་ཤིང༌། དེ་ནས་ད་བར་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་དེ་ལྷན་ཚོགས་དེའི་གོ་སྒྲིག་འོག་རྩེས་པ་རེད། རྩེད་འགྲན་འདི་ནི་ ༡༩༨༡ ལོར་ཐོག་མར་དབུ་བརྙེས་པ་ནས་བཟུང་ད་བར་རྒྱ་བལ་གྱི་བོད་པའི་གཞིས་ཆགས་དུ་མའི་ནང་ཐེངས་བཅུ་བཞི་ཙམ་རྩེས་མྱོང་བ་མ་ཟད། རྩེད་འགྲན་དེ་དག་གི་ཁྲོད་ནས་བོད་ཀྱི་རྩེད་རིགས་ལྷན་ཚོགས་ཀྱིས་རྩེད་མོ་བ་རྣམས་འདེམས་སྒྲུག་གིས་བོད་ཀྱི་རྐང་སྤོལ་རུ་ཁག་གི་ནང་རྩེ་རྒྱུའི་གོ་སྐབས་གནང་གི་ཡོད་པ་རེད། དེ་ལྟར་ཁོར་ཡུག་དང་མཐུན་རྐྱེན་ལ་དཔག་པའི་བོད་པའི་རྩེད་མོ་བ་ཡང་མང་དག་ཅིག་བྱུང་ཡོད་ཅིང༌། དེ་དག་ཀྱང་ལས་དོན་གཞན་ཞིག་གི་ཞོར་དུ་རྐང་སྤོལ་རྩེ་བ་ལས་རྒྱལ་སྤྱིའི་རྐང་སྤོལ་བ་གཞན་རྣམས་དང་འདྲ་བར་རྐང་སྤོལ་གཅིག་པུའི་ཐོག་ནས་མི་ཚེ་བསྐྱལ་ཐབས་བྱེད་མཁན་ཕལ་ཆེར་མེད་ལ། དེ་ལྟར་བསྐྱལ་སའི་ཁོར་ཡུག་ཀྱང་མེད་པ་རེད། གལ་ཏེ་མཐུན་རྐྱེན་བྱུང་ཚེ་རྩེད་མོ་གཅིག་པུའི་ཐོག་རིགས་གཅིག་རྐང་འཛིན་གྱི་སློབ་མ་དེ་འདྲ་བསྐྱེད་བསྲིང་བྱེད་ཐུབ་ཚེ་རྗེས་མར་བོད་རང་བཙན་བྱུང་བའི་སྐབས་བོད་རྒྱལ་ཁབ་དེ་རྒྱལ་ཁབ་གཞན་དང་འདྲ་མཉམ་གྱི་ཐོག་རྩེད་མོ་རྩེ་ཐུབ་པ་ཞིག་ད་ལྟ་ནས་འཆར་གཞི་བསྒྲིགས་དགོས་སྙམ། 

ད་བར་རྩེད་འགྲན་དེ་ཐེངས་བཅོ་ལྔ་ཙམ་ཞིག་རྩེས་ཟིན་པ་དང་།  རྩེད་འགྲན་འདིའི་སྐབས་རྙོག་གླེང་ཡང་མང་པོ་ཡོང་གི་ཡོད་ལ།  ཁ་ཤས་ཀྱིས་རྩེད་འགྲན་དེ་མི་ལེགས་པའི་དགོངས་ཚུལ་ཡང་མང་པོ་ཞིག་ལ་ཡོད་པ་རེད།

འགོག་བདེན་སྟོང་ཉིད་ཡིན་ནམ་ མིན། ༡

༡ དཔྱད་བརྗོད་འདིའི་གླེང་སློང་བ།

འགྲོ་ བ་མི་ནི་སྲོག་ཆགས་གཞན་དང་མི་འདྲ་བའི་ཡུལ་ལ་རྣམ་པར་འབྱེད་པའི་ཤེས་རབ་ལྡན་ ཞིང་། དེའི་ནང་ནས་གྲུབ་མཐའ་སྨྲ་བ་དང་རིགས་པ་སྨྲ་བ་ཞིག་ཡིན་ན། རང་རང་གི་ འདོད་ཕྱོགས་ལ་སྒྲུབ་བྱེད་ཀྱི་རིགས་པ་མང་ལ། གཞན་གྱི་འདོད་ཚུལ་དངོས་ཤུགས་ བརྒྱུད་གསུམ་ནས་འགོག་བྱེད་ཀྱི་ལུང་རིགས་དེ་བས་མང་། ཡིན་པ་ཞིག་མིན་པར་སྒྲུབ་ ཐུབ་ལ། མིན་པ་ཞིག་ཀྱང་ཡིན་པར་སྒྲུབ་ཐུབ་པ་ཡིན་པས། སྔོན་གྱི་བཤད་ཚུལ་ལ། ཡིན་ པ་མིན་པར་སྒྲུབ་ཤེས་ན། བསྡུས་ར་ཤེས་པའི་འབྲས་རྟ

གས་ཡིན། ཞེས་ཀྱང་བརྗོད་པ་ནི་གཅིག་བྱས་ན་དངོས་དོན་ཞིག་ཡིན་ངེས།

གང་ ལྟར་གཞུང་ལུགས་ནས་བཤད་པའི་མཁས་པ་སོ་སོའི་བཞེད་ཚུལ་ལ་མཁས་པ་གཞན་དང་གཞན་གྱིས་ དགག་སྒྲུབ་མང་དུ་གནང་ཡོད་པས། རང་རང་སོ་སོའི་བསམ་བློའི་ཁ་ཕྱོགས་དང་མཐུན་མིན་ ལ་ལྟོས་ནས་འཐད་དང་མི་འཐད་ཀྱི་རྣམ་གཞག་བྱེད་པ་ལས། འདི་མཐའ་གཅིག་ཏུ་རིགས་པ་ དང་མི་རིགས་པའི་ཁ་ཚོན་སུས་ཀྱང་གཅོད་མི་ཐུབ་ལ།  བདེན་པ་དང་རྫུན་པའི་རྣམ་གཞག་ ཀྱང་རང་གི་བསམ་བློ་ལ་ལྟོས་ནས་འཇོག་དགོས། ཡིན་པའི་འདོད་ཕྱོགས་ལ་སྒྲུབ་བྱེད་ ཀྱི་ལུང་རིགས་མང་བ་དང་བཙན་པ་ཡོད་བསམ་ན་དེ་ཉིད་རང་ཉིད་ཀྱི་འདོད་པ་ཡིན་དགོས་ ཀྱང་། མིན་པའི་ཕྱོགས་ཀྱི་སྒྲུབ་བྱེད་ཀྱི་ལུང་རིགས་རྣམས་ཀྱང་དོར་དུ་མ་འཇུག་ པར། དེ་དག་ལའང་བསམ་གཞིགས་མང་དུ་བྱ་དགོས་པ་ཡིན། རྒྱུ་མཚན་ནི། སངས་མ་རྒྱས་ པའི་འགྲོ་བ་ཀུན་གྱིས་ཐག་གང་བཅད་པ་རྣམས་ནི་གནས་སྐབས་རང་རང་གི་བསམ་བློའི་ འཁྱེར་སོ་དང་བསྟུན་པ་ཤ་སྟག་ཡིན་པ་དང་། བསམ་བློའི་སྨིན་ཚད་འགྱུར་བ་ཐེབས་པའི་ འོག་ནས་སྔར་གྱི་གྲུབ་མཐའ་དང་རང་ལུགས་རྣམས་ཀྱང་འགྱུར་འགྲོ་བ་ནི་རང་རང་གི་ མྱོང་བས་གྲུབ་པས་སོ།

དེས་ ན། ངའི་མ་མཇལ་བའི་རིགས་པའི་བཤེས་གཉེན་ཆོས་རྗེ་དགེ་ཆོས་རིན་པོ་ཆེས།

བྱིས་པའི་དུས་ནས་རྒས་ཤིང་འཁོགས་པའི་བར།།

སེམས་ ཀྱི་འཁྱེར་སོ་སྣ་ཚོགས་བརྗེས་གྱུར་པ།།

རང་ གི་མྱོང་བས་དཔྱད་ན་ཤེས་ནུས་པས།།

ད་ ལྟའི་འཆར་སྒོ་འདི་ལ་ཡིད་བརྟན་ཅི།།

ཞེས་ གསུངས་པ་ནི་གདམས་ངག་ཆེས་རྨད་དུ་བྱུང་བ་ཞིག་གོ།

དེས་ ན། འདིར་དབུ་མའི་གཞུང་ལས་མཁས་པ་སོ་སོའི་བཞེད་ཚུལ་མི་མཐུན་པ་ཆེས་མང་པའི་ འགོག་བདེན་སྟོང་ཉིད་ཡིན་མིན་གྱི་སྐོར་ནི་ཁོ་བོས་དབུ་མ་གསར་དུ་བལྟས་པའི་ སྐབས་གལ་གནད་ཆེ་ཤོས་ཤིག་དང་། ཡང་ཕྱོགས་གཞན་ཞིག་ནས་བཤད་ན་འཁྲུག་ཤོས་ཤིག་ཀྱང་ མཐོང་སོང་བས་དེའི་ཐོག་བསམ་གཞིགས་བྱ་རྒྱུ་ནི་ངའི་དགའ་ཤོས་ཤིག་ཏུ་གྱུར།

༢ འགོག་ བདེན་དང་སྟོང་ཉིད་ཅེས་པ་ཅི་ཞིག་ཡིན།

ནང་ པའི་གཞུང་ལུགས་ནང་བདེན་བཞི་ཞེས་པ་ནི་ཐེག་པ་ཆེ་ཆུང་ཀུན་གྱི་མགྲིན་གཅིག་ཏུ་ སྨྲ་བའི་བརྡ་ཆད་ཅིག་ཡིན་ལ། བདེན་གཉིས་ཞེས་པ་ནི་ཐེག་པ་དམན་པའི་ནང་དེ་ཙམ་ ཡོངས་གྲགས་མིན་ཞིང་ཐེག་ཆེན་པའི་གཞུང་ནང་ཆེས་གལ་གནད་དུ་རྩི་བའི་མིང་ཚིག་ཅིག་ ཡིན། བདེན་པ་བཞི་བཤད་པའི་ནང་ཚན་གྱི་འགོག་པའི་བདེན་པ་ནི། རྟག་མི་རྟག་གཉིས་ ལས་རྟག་པ་དང་། ཀུན་ཉོན་དང་རྣམ་བྱང་གཉིས་ལས་རྣམ་བྱང་ཡིན་ཟེར། རང་འཐོབ་བྱེད་ ཀྱི་བར་ཆད་མེད་ལམ་གྱིས་ངོ་སྐལ་གྱི་སྤང་བྱ་སྤངས་པའི་བྲལ་བ་ཞིག་ལ་འགོག་བདེན་ ཟེར་ཞིང་། སྤང་བྱ་ལ་ཕྲ་རགས་ཡོད་པའི་དབང་གིས། བྲལ་བ་དེ་ལའང་། འགོག་བདེན་ ཙམ། ཐར་པ་དང་མྱང་འདས། གློ་བུར་རྣམ་དག་གི་ངོ་བོ་ཉིད་སྐུ་དང་སྤངས་པ་ཕུན་ཚོགས་ སོགས་ཀྱི་ཁྱད་པར་འབྱེད་བྱེད་ཀྱི་ཐ་སྙད་བྱེད། ༼འོན་ཀྱང་ལེགས་བཤད་གསེར་ འཕྲེང་སོགས་ཀྱི་གཞུང་ཁ་ཤས་ཀྱི་ནང་འགོག་བདེན་ཀུན་ལ་མྱང་འདས་ཀྱི་ཐ་སྙད་བྱས་ ཡོད་ལ། དེ་ནི་ཐ་སྙད་བཀོལ་སྤྱོད་བྱེད་ཕྱོགས་ཀྱི་ཁྱད་པར་ཙམ་ཡིན་སྙམ་ལ། ཞིབ་ ཏུ་དཔྱད་ན་དེིའི་སྐད་དོད་ཀྱི་ལེགས་སྦྱར་གྱི་མིང་ཚིག་ཅི་ཞིག་ཡིན་མིན་ལ་ལྟོས་ ནས་བརྟག་དགོས་པར་སྣང་།༽

སྟོང་ པ་ཉིད་ནི་ཆེས་གྲགས་ཆེ་བའི་ཚིག་ཅིག་ཡིན་ལ། གྲུབ་མཐའ་སྨྲ་བ་རང་རང་གི་བསམ་ བློའི་སྨིན་ཚད་ལ་གཞིགས་ནས་འགྲེལ་ཞིང་།  རང་རང་གི་བསམ་བློའི་འཁྱེར་སོ་དང་ མཐུན་དང་མི་མཐུན་གྱི་ཁྱད་པར་ལས་བདེན་དང་རྫུན་གྱི་རྣམ་གཞག་བྱེད་དགོས་པས་ གྲུབ་མཐའ་དེ་དང་དེས་བཤད་པའི་སྟོང་ཉིད་ཀྱི་རྣམ་གཞག་དེ་འཐད་དང་མི་འཐད་ཀྱི་ རྣམ་དབྱེ་བྱེད་དུ་མེད་པ་ནི། རང་གི་བསམ་བློ་ལ་འཐད་པ་དེ་འཐད་པ་རང་ཡིན་པ་ལས་ ཀུན་གྱི་ངོར་འཐད་པའི་ཆོས་ཤིག་གང་དུ་དང་ཇི་ཙམ་ཇི་ལྟར་བཙལ་ཡང་རྙེད་དུ་མེད་པས་ སོ།

དེས་ ན། སྟོང་ཉིད་ཅེས་པ་ནི། རང་རང་གིས་བསམ་བློས་སྒྲོ་བཏགས་པའི་ཀུན་བཏགས་དེས་ སྟོང་བའི་ཆོས་ཤིག་ལ་ཟེར་ཞིང་། དེ་ལ་གནས་ལུགས་མཐར་ཐུག་དང་གཤིས་ལུགས་མཐར་ ཐུག དེ་བཞིན་དེ་ཁོ་ན་ཉིད། དེ་བཞིན་ཉིད། ཅེས་སོགས་ཀྱི་ཐ་སྙད་བྱེད། ༼འོན་ཀྱང་གསེར་ཕྲེང་སོགས་ལས་ དེ་བཞིན་ཉིད་དང་སྟོང་ཉིད་དོན་མི་གཅིག་པར་བཤད་ཅེས་ཟེར་ཡང་དེ་གཉིས་ཀྱི་སྐད་ དོད་ཀྱི་མིང་ཚིག་གཉིས་ཀྱི་གོ་དོན་གཅིག་མིན་ལ་ལྟོས་ནས་བརྟག་དགོས་པ་ལས་བོད་ ཡིག་གི་མིང་ཚིག་ནང་ཕར་འཐེན་ཚུར་འཐེན་གང་ཞིག་བྱས་ཀྱང་དོན་ལ་མི་འབབ་ཅིང་སྙིང་ པོའང་གང་ཡང་མེད་སྙམ།༽

སྟོང་ ཉིད་ཅེས་པ་ནི་སྟོང་པ་རང་ཡིན་པས་དེའི་སྐད་དོད་དུ་ལེགས་སྦྱར་དུ། Sunyata ཤུན་ ཡཏ་ཞེས་གསལ་ཞིང་། དེ་ཡང་ཤུན་ཞེས་པ་ནི་ཤུན་ནི་ཞེས་པའི་ཚིག་བསྡུས་ཡིན་ ཞིང་། དོན་ནི་ཀླད་ཀོ་ལ་གོ་ཞིང་། ཀླད་ཀོ་ནི་གྲངས་ཀུན་གྱིས་སྟོང་ཞིང་། དེ་ ཉིད་མེད་ན་གྲངས་གཅིག་ཀྱང་མེད་པ་ལྟར། རྟག་མི་རྟག་གི་ཆོས་ཀུན་སྟོང་པ་ཡིན་ ཡང་། སྟོང་པ་དེ་ཉིད་མེད་ན་ཆོས་རྣམས་ཡོད་པར་འཇོག་མི་ཐུབ་པས་འདྲ་མཚུངས་ཀྱི་ སྒོ་ནས་ Sunyata ཞེས་བཏགས་པ་ནི་མཁས་པ་མང་པོའི་བསྟོད་བསྔགས་ཀྱི་ཡུལ་དུ་གྱུར་ པ་ཡིན། ཆོས་ཉིད་ཀྱི་སྐད་དོད་དུ་ནི། རྡརྨ་ཏ་Dharmata ཞེས་པ་དེ་ཡིན་ཞིང་། དེ་ ཡང་། Dharma ཞེས་པ་ནི་ཆོས་ལ་གོ་ཞིང་། ta ཞེས་པ་ནི་ཉིད་ཅེས་པའི་དོན་དུ་གོ་ བས་ཆོས་ཉིད་ཅེས་ཐད་བསྒྱུར་བྱས་པ་ཞིག་ཡིན་འདུག

དེ་ ཁོ་ན་ཉིད་ཅེས་པའི་སྐད་དོད་དུ་ལེགས་སྦྱར་ནང་ཏ་ཏྭ་ཞེས་པའི་གོ་དོན་ཅི་ཡིན་མི་ ཤེས་ཀྱང་། ཨིན་སྐད་དུ་Thatness ཞེས་བསྒྱུར་འདུག་ཅིང་། That ཞེས་པ་ནི་འདི་ དང་དེ་གཉིས་ལས་དེ་དང་། ness ཞེས་པ་ནི་ཉིད་དང་ངོ་བོ་སོགས་ལ་གོ་བས་ Thatness ཞེས་ཆེས་ཐད་བསྒྱུར་བྱས་འདུག་ཅིང་། དེ་བཞིན། དེ་བཞིན་ཉིད་ཅེས་པའི་ སྐད་དོད་དུ་ལེགས་སྦྱར་གྱི་མིང་ཚིག་མ་རྙེད་ཀྱང་། ཨིན་སྐད་དུ་ནི་སྔོན་དང་འདྲ་ བར།  Suchness ཞེས་བསྒྱུར་འདུག་ཅིང་། དེ་ཡང་Such ཞེས་པ་དེ་བཞིན་ལ་གོ་ ཞིང་། Ness ཞེས་པ་ནི་ཉིད་ལ་གོ་བས་ Suchness ཞེས་ཐད་བསྒྱུར་བྱས་པ་ཡིན་འདུག

སྟོང་ ཉིད་དང་དེ་བཞིན་ཉིད་གཉིས་དོན་གཅིག་མི་གཅིག་སོགས་ཀྱི་རྣམ་དབྱེ་ལེགས་པར་ཤེས་ དགོས་ན་དེའི་སྐད་མིང་ཚིག་དེ་གང་ལས་བྱུང་བའི་སྐད་ཡིག་དེའི་ནང་གང་ཞིག་བསྟན་ ཡོད་མེད་ལ་ཞིབ་འཇུག་བྱེད་དགོས་པ་ལས། བོད་ཀྱི་མིང་ཚིག་ཁོ་ན་ལ་ལྟོས་ནས་བཤད་ན་ གང་དང་གང་གི་སྒྲ་བཤད་དུ་ཡོད་པའི་ཆོས་ཀུན་དེ་དང་དེ་རུ་འགྲེལ་ནས་ཐ་སྙད་གཏིང་ ཚུགས་པ་ཞིག་མེད་པར་འགྱུར་ངེས་ཏེ། དཔེར་ན། བུམ་པ་བདེན་སྟོང་ཡང་དགག་བྱ་བདེན་ པར་གྲུབ་པ་བཀག་པའི་བདེན་པ་ཡིན་པས་འགོག་བདེན་ཞེས་འགྲེལ་འགྲོ་བ་སོགས་ཀྱི་ནོར་ བ་མང་དུ་འབྱུང་བས་མིང་ཚིག་དེའི་གོ་དོན་ཅི་ཞིག་ཡིན་མིན་ཞིབ་ཏུ་དཔྱད་ན་དེ་དང་ དེའི་འབྱུང་ཁུངས་ཀྱི་སྐད་ཡིག་དེའི་ནང་གི་གོ་དོན་མི་ཤེས་ན་བཤད་དཀའ་བ་ཞིག་ སྣང་ངོ་།།