སེམས་ཚོར་ དམར་པོའི་སྒུལ་ཤུགས།

སེམས་ཚོར་དམར་པོའི་སྒུལ་ཤུགས།

 

ཝར་ཎ་མཐོ་སློབ་ ཀྱི་ཁམས་པའི་བུ་མོ་ཞིག་ལ།

 

ཚ་རླབས་འབར་བའི་ཝར་ཎའི་མཐོ་སློབ་ནས།།
བེ་རི་མཁས་པའི་ གཟིམ་ཤག་ནར་མོའི་ནང་།།
མདུན་འཇོག་གོར་གོར་སྟེང་ན་གང་ཁྱོད་ཀྱི།།
སྙན་ངག་འབྲི་དེབ་ མཇལ་བའི་སྐལ་བ་བྱུང་།།

ཤོག་ལྷེ་འདབ་མ་དལ་གྱིས་བསྒྱུར་བྱས་ཏེ།།
སྙན་ངག་རེ་རེ་ཐ་ར་ ཐོ་རེས་བཀླགས།།
ལས་དབང་རྦ་རླབས་འཕྱུར་བའི་མཇུག་སྣེ་ནས།།
སེམས་ཚོར་ལྷན་དུ་ འདྲེས་པའི་སྣང་བ་བྱིན།།

 

གེ་སར་རྒྱལ་པོའི་ཁྲག་རུས་བརྒྱུད་པ་ཡི།།
བར་ཁམས་མགོ་ནག་མི་ ཡི་ཞིང་ས་ནས།།
རྒྱུས་མེད་ས་མཐའི་ཡུལ་ན་འགྲིམས་བྱས་པའི།།
ཁམས་པའི་ན་མོ་ ཁྱོད་ལ་འཕྲེང་ཞེན་ཆེ།།

 

མིང་བྱང་ཆེན་པོའི་ཁ་གཡང་སྙན་མོའི་འོག།
ཁོག་ནས་རུལ་བའི་ དྲི་ངན་བྲོ་ན་ཡང་།།
བཅོས་མའི་དྲི་བཟང་གཏོར་བའི་འདུ་འཛིའི་འོག།
སློབ་མ་ཁྱོད་འདྲ་ ཡོད་པས་འདོད་བློ་ཚིམ།།

 

སྤྲེལ་སྐད་ཨེ་སྦི་སི་སྒྲིའི་སྐད་ཅོར་དང་།།
ཡུ་རོ་སྒྲོ་ལར་ གླེང་བའི་འུར་ཟིང་ཁྲོད།།
ཁ་བའི་རྣམ་ཤེས་ཞུགས་པའི་ན་མོ་ཞིག།
གངས་རིའི་ལས་དབང་ བསམ་པ་དགའ་བའི་གནས།།

 

སྙན་ངག་མེ་ཏོག་རེ་རེ་ཡར་བཏུས་ནས།།
དྲི་མ་སྣུམ་ཞིང་ མིག་གིས་ཡང་དུ་བལྟས།།
མིག་ཡིད་རྣ་བ་གསུམ་གྱི་དགའ་སྟོན་དུ།།
བསྟར་བའི་ལྡུམ་ར་ འདི་ཀོ་ཁ་བའི་རྒྱན།།

 

ཀུན་གྱི་ཤུལ་དུ་ལུས་པའི་ས་མཐའ་ན།།
ད་ཕྲུག་མིང་བྱང་ནག་ པོའི་བརྙས་བཅོས་འོག།
དམར་པོའི་ལས་དབང་མཐུན་པའི་སྲུབ་ཀ་ནས།།
ཡོད་ཚད་གཅིག་ཏུ་ མཐུན་པའི་སྣང་བ་བྱིན།།

 

ཞུམ་པའི་སྦགས་གཙོག་འདམ་དུ་མི་ལྷུང་ ཞིང་།།
ཨ་གསར་འཇའ་ཡི་ཟེར་ ལ་མི་འཇུ་བར།།
མགོ་ ནག་མི་ཡི་རུས་པ་མཁྲེགས་པོ་ཡིས།།
རྨོངས་པའི་མགོ་བོའི་ཀླད་རྩ་འགེམས་གྱུར་ཅིག།

 

དབུ་སྐྲ་རིང་ཡང་བློ་སྣ་ཐུང་བ་དང་།།
ལྕེ་སྣེ་རིང་ཡང་ལག་ པ་ཐུང་བ་ཡི།།
རིང་ ཐུང་མགོ་སྙོམས་མེད་པའི་དྲི་མ་ཡིས།།
མགོ་ནག་ན་མོ་ཁྱོད་ལ་འགོ་མི་ཉན།།

 

ཚིགས་བཅད་དམ་དུམ་སྦྱོར་བའི་སྤོབས་པ་ ཡིས།།
ཉིད་ཀྱི་ཐུགས་བློ་ ནམ་ཡང་ཚིམ་མི་ཉན།།
ཡངས་པའི་རྩོམ་རྩལ་རིག་པའི་འཇུག་ངོགས་སུ།།
ཟད་པའི་ཕ་མཐའ་ནམ་ ཡང་ཡོད་མ་ཡིན།།

གངས་ཅན་བརྡ་དག་རིག་པའི་རྨང་གཞིའི་ སྟེང་།།
སྲོལ་རྒྱུན་སྙན་ ངག་ཁང་བཟང་བརྩིགས་པ་དེར།།
དེང་རབས་ཚོན་རྩི་འདྲ་མིན་བྱུག་བྱེད་ན།།
རྩོམ་རིག་ཕོ་བྲང་ མཐོན་པོ་གཞི་ནས་མཐོང་།།

 

གངས་རིའི་སུལ་གྱི་མཁས་པའི་ཞབས་རྗེས་ དེ།།
ཁ་ཆར་ཟུང་གིས་ཟུབ་ ལ་ཉེ་དུས་འདིར།།
ཁ་ བའི་རྣམ་ཤེས་ཞུགས་པའི་སེང་ཕྲུག་ཚོས།།
གངས་རིའི་ལས་དབང་འཚོལ་ལ་འབུངས་ཤིག་ཀྱེ།།

 

དབྱིན་བོད་ཧིན་གྱི་འཕྲང་ལམ་དོག་པོ་ དེར།།
ཇི་ཙམ་འགྲིམས་ན་ སུན་སྣང་དེ་བས་ཆེ།།
དེ་ལྟར་ན་ཡང་དེང་རབས་དང་བསྟུན་ནས།།
དེ་དག་ལ་ཡང་མིག་ ཞགས་འཕེན་པར་མཛོད།། 

དབྱིན་བོད་ཧིན་གྱི་རིག་པའི་གཞུང་ ལུགས་ཀྱི།།
ཆུ་ཀླུང་རྣག་ཁྲག་ ལྷན་དུ་བཏུང་བ་ལས།།
ཆོས་དང་འཇིག་རྟེན་གཉིས་ཀྱི་བར་དོ་རུ།།
ཞུགས་པ་ཁོ་བོས་ སྙིང་ཁའི་མཐིལ་ནས་ཤོར།།

 

༢༠༡༠། ༠༩།༢༦། ཉིན་ཝར་ཎའི་མཐོ་སློབ་ནས་ཁམས་པའི་ན་མོ་ཞིག་གི་སྙན་ངག་དཔེར་བརྗོད་ ཀྱི་འབྲི་དེབ་ཅིག་མཐོང་བས་རྐྱེན་བྱས་ཏེ། མགོན་མེད་ཟས་སྦྱིན་གྱི་མགྲོན་ཁང་ནས་ མཚན་མོར་ཉལ་ཁར་ཤར་མར་བྲིས་སོ།།